إجابة

[عبدالعزيز ابراهيم المنصور]

بسم الله الرحمن الرحيم

خاطرة على حافة الشعر علها ترتقي لذائقتكم :

قالوا علامك قلت لاتسالوني=مالاسئلتكم , عندي اية إجابه
لكن اصروا !! للجواب اطلبوني=وجاوبتهم على السؤال بذرابه
قلت اسمعوا لما اقول اسمعوني=لعل مافيكم غشيم .. وزلابه
لو بشتكي فاضت دموع العيوني=والجرح بالشكوى يزيد التهابه
ياوجد حالي وجد من بالسجوني=في غبة الديجور محد ٍ درابه
مسجون ظلم وفوق هذا مغبوني=شيب وذابت زهرته في شبابه
تمضي حياته في شقاه محزوني=بزنزانته وحده ومقفول بابه
عانى من الغربه وشاف المهوني=ولحقه من زيادة همومه كآبه
ماني سجين ٍ بين قيد وحصوني=لكن حالي مع حواله تشابه
والا وجود اللي غشته الشجوني=درب الأمل ايس يطارد سرابه
انسان مايبغى الخطا والجنوني=ابعد عن الفوضى واحب الكتابه
بي النوايا صافيه والظنوني=مثلي طريق الشر ماقد مشى به
ولاجهل مثل اللذي يجهلوني=ولابار في حق الاهل و القرابه
ولااغلط على من بالغلط بادروني=لان الردي ماهوب من يقتدى به
قالوا تفلسف قلت ماتفهموني !؟=لاتسالوني دام فيني غرابه !!
قالوا رتابه , قلت فيها سكوني=وكل ٍعلى نهجه يوجه اركابه
لو البشر يدرون وش هي طعوني=او علتي والقلب واللي سطابه
ان كان مايبدو علي يغلطوني=ولاجددوا جرح ٍ عطيب ٍ صوابه
ياليتهم من عذلهم ينصفوني=لكن وحيد ومثلهم مايجابه
وياليت بعض الناس لو يتركوني=من شرحهم في خاطري واقترابه
حتى عن دموعي بدوا يشغلوني=ويش السبب في ذرفته وانسكابه
واقول دمعي يسكبنه عيوني=وش دخلكم فالحال واللي غدابه
ياعاذلين القلب لاتعذلوني=الهم فيني قد تعدى نصابه
همي ثقيل ولاتشيله متوني=ولاحولي اللي محزم ٍ ينتخى به
هالوقت بعض الناس ماينفعوني=وماكل شي ٍ فالحشا ينحكابه
كل ٍ على ليلاه جر اللحوني=وكل ٍعلى همه سرى او سرابه
ناس ٍ ليا من طحت بك يفرحوني=الله يوريهم شدايد عقابه
بديتهم بالطيب لكن غشوني=بجمرالشقا مع كاس مر ٍ شرابه
يوم اعتزلت بْعزلتي ماتركوني=زادوا بهمي لين زبر سحابه
امطر بحزن ٍوابله كالمزوني=وفاضت سدود القلب لاقصى شعابه
ناديتهم بالصوت ماجاوبوني=راحوا وخلوني اعاني .. صبابه !
لكن على الله كل شي ٍ يهوني=وعسى دعايه ينقبل باستجابه
من واحد ٍلاقال شي ٍ يكوني=رب ٍ عظيم الشان كل ٍ يهابه
عساه يرحمني بلطفه يصوني=من شر خلقه والجحيم وعذابه
وصلاة ربي عد مزن ٍ هتوني=على النبي المصطفى و الصحابه

[الطائر المهاجر]

بوح رائع من شاعر رائع
لاهنت ولاهان مغليك
صح لسانك مليون
تحياتي العطره

[صعبة المنال]

جزلة ووافية
متجدد كالعادة

صح لسانك وحرفك

صعوووب

[الطامي]

ع المنصور
صح الاسنك ملايين
رائعة جدا
لاهنت اخي

[حرف وشعر]

الله صلي علي محمد وال محمد


المنصور صح بوحك

نص جميل ومتقن

[داعي الشوق]

........................

صح لسااااااااااااانك مليوون يا بو ابراهيم

و الله يعينك و هونها و تهون

و لاهنت

***********

[حوريه]

عبدالعزيز الله يسر امرك
وصح لسانك على الجزاله الرائعه
دمت ودام نبضك
ودمت بأحسن حال

[عبدالعزيز البليهد]

اللهم صلي على محمد وآله وصحبه

الله يعين ياعبدالعزيز تغيرو الناس وشانت النوايا الله يغنينا بالصحه والعافيه

صح لسانك وصح فكرك علىى هذه الشامخه

[الـزلـزال]

منصور العبدالله

بوح رائع ومميز وجميل
من شاعر متميز ورائع في كل مايقدمه لنا
أبدعت وأمتعت شاعرنا حماك الله
دمت بخير وسلام ودام لنا حرفك
صح لسانك ملايين ملايين
ولك فائق تحياتي وتقديري

[جهاد الشعلان]

صح لسانك يابو براهيم

شاعر مبدع وجزل

لك وافر اعجابي وتقديري

دمت بود