رد اسبرانزا على طلبات البنات بعد الزواج

السلام عليكم ورحمة الله

انا الحقيقه عقب ما نزلت موضوع (طلبات البنات بعد الزواك من ألاف الي اليأ) ، و الموجود على الرابط التالي:

http://www.fatahilah.com/showthread.php?t=129


و بديت امخمخ فيه ، خفت ان اللي يقراء الموضوع يحسبني انا اللي كاتبه او يعتقد انه يمثل وجهت نظري.
لذلك قررت اني ارد على كاتب الموضوع الاصلي ( انا ما اعرفه ) و ابين وجهت نظري في ما كتبه:

الالف : ابي فلوس بروح معزومة على شاى ضحى

يعني وش فيها اذا تبي فلوس ، انت منت رجال البيت و مسئول عنها. ياخي عطها كل اللي هي تبيه ، هي الحين ما عطتك نفسها ونت قاعد تتكيثر عليها كم ريال. بعدين وش فيها اذا هي طلعت الضحى مهوب انت اصلاً تقيل و تتركها مرتزه في البيت بلحالها تقل جني.

الباء : بكره ابيك تودين لبيت اهلي عندهم عزيمة

ودها لم بيت اهلها ، اول شي تكون اجتماعيه و ثانياً صلة الرحم و ثالثاً تفتك منها كم ساعة. انت وازن الامور و فكر فيها زين ترا روحتها لهلها ذو فايده عضيمه.

التاء : ترى اليوم انا ماني مسويه عشاء روح للمطعم جيب لنا عشاء

المفروض انك ما تخليها تطبخ ابد ، هو انت ناوي تخرب على نفسك ، انت تبيها تحرق اصابعها ولا ودك يديها تمشق من غسل الصحون ولا ودك انها يفوح منها ريحة بصل و زفر ، صدق ما عندك دم ، اذا انت ما تبي اكل المطاعم ، قم انت وطبخ العشاء جعلك الكسر ولا وش الفايده منك.

الثاء : ثلاث اسابيع ما طلعنا للمدينه الترفيهيه يالله ودنا اليوم

ثلاث اسابيع ، والله مجرم ولا تخاف ربك ، المفروض على الاقل تمشيها 5 مرات في الاسبوع. و ترا التمشيه لها فوايد اهمها رياضة المشي وحرق الدهون و الشحوم اللي ممكن تتراكم بسببك.

الجيم : جيب خدامه تساعدني بشغل البيت ........ (والبيت نص شقة)

والله لو البيت غرفه ياخي جب لها شغاله ، هو انت ناوي تخرب على نفسك ، خلها دايم مرتاحه خلها دايم تفضا لتزيين نفسها ، تراك انت الكسبان في النهائة. هو انت تعاف انها كل يوم تطلع لك بشكل و للون هو انت ما ودك تستانس و يستاسع صدرك ، صدق من قال يخربون على انفسهم بيديهم.

الحاء : حبيبى .. ودى بساعة شوبارد , مليت من ساعتى الاوميغا (شوفوا بنت النعمه )

يا عيباه عليك تشتري لها ساعه اوميغا ، المفروض تشتري لها كل شهر ساعة رولكس ، و كل اسبوع تشتري لها ساعة يا قوتشي او قفينتشي او فلب شريول. يعني تاخذها من بيت اهلها و في الاخير تتكاثر عليها ساعه بكم ملطوش ياخي استح على وجهك.

الخاء : خل الاستراحة عنك اليوم .. انا عازمتك نتعشى بره , بس على حسابك يا حياتي

احمد ربك انها عازمتك حتي لو على حسابك ، صدق انك رجال ما تستحي.

الدال : دور لنا فله على 3 شوارع وفيها قبو (حتى راتبة نص الشهر رايح وكل هذا مطلوب وعنده ديون )

يعني هذا جزاها اللي قلبها عليك و تبيك تملك لك بيت.

الذال : ذيك السنة (قبل 10 سنوات) قلت لك اشتر لنا سيارة فان اوسع وما شريت

صدق اللي اختشو ماتو ، يعني ما لقيت تشتري الا فان ، ياخي المفروض تطق الها روز.

الراء : روح قدم على اجازة خلنا نسافر لاوروبا ,, اووف حر

تقل اني داري اذا جيت تدلعها و تسافر بها وديتها للشرقيه مسوي نفسك رومنسي ، الله ياخذك انت و رومنسيتك ، هو انت ما سمعت في باريس ولا فينا ولا روما ولا فانكوفير.

الشين : شيل ولدك شوفه يبكي

يعني انت تكون السبب في جيت ورعك ، ولا ودك تشيله و تساعد في تربيته. عيب والله عيب.

السين : سو للبيت حديقة كشخة , حط فيها نافورة , زين !!

يعني هذا جزاتها اللي قلبها عليك و ودها انك تستنشق اكسجين طازج. وراكم يا الرجال ما نفكرون بعقل البنت يمكن تتطورون و تصيرون اذكيا.

الصاد : صفط الملابس هناك منثرة , مليت وانا القط وراك

لا ولك وجه بعد تعترف انك قاعد تجدع ملابسك في كل محل. صدق هزولت.

الضاد : ضبط اوضاعك .. ترى كبرت المسؤولية (حتى حرف الضاء ماسلم منهم)

ما قلت لك انكم يا الرجال تسوون من الحبه قبه ، الحين هي قلبها عليك و تبيك تكون دايم رافع راسك بين جماعتك و في الاخير هذا جزاتها.

طاء : شف السيارة خرده تفشل قديمة , نبي شبح

يعني انت فكر في الموضوع قاعد تسوق ددسن ( ابو عزيز ) موديل 1982 ولا تبيها تقول شي.

الظاد: الظاهر انت ما تحبنى .. ليش ما شريت لى العقد الالماس اللى بغيته

وش عذرك ما شريت لها عقد الالماس ؟؟ ما عندك فلوس !! ترا هذا مهوب عذر ، ترا السالفه راس مالها مسدس طرطعان و ادخل على مؤسسة النقد و ضف كل ما عندهم ، و اذا انت خيخه ولا تقدر على علوم الرجال رح اشتر لها عقد زركون تراه اخو الالماس و صدقني ترا ماهي عارفه الفرق.

النون : نبى نحجز شاليه شرم الشيخ طول الصيف ..لا تنسى

ما قلت لك انكم يا الرجاجيل تطيرون في العجه ، ترا هي قصدها تبيك تستاجر الشاليه طول الصيف عشان يطلع عليك بسعر رخيص و بعدين تقدر تاجره على جماعتك بالتقطيع ، يعني الموضوع بختصار استثمار يا الدلخ.

الهاء : ها عاد .. ترى اروح بيت اهلى ! اذا مو قد الزواج وتكاليفه ليش تزوجني ؟؟!ا

ونت من جدك تبي تزوج ونت ما عندك حق الزواج و تكاليفه ، يعني انت شايفها اندونيسيه ولا مصريه ولا سوريه ، لا يا الحبيب هذي سعوديه على سن و رمح ، الغالي يرخص لها ، هي كل الزين و كل الحلاوه ، هي بنت العز وبنت البيوت الاصيله هي من احفاد الرسول هي شذا السعودية.

الواو : ورني شطارتك روح عند اخوك خذ منه الورث (راعية مشاكل)

انت الحين عندك ورث و زارفه منك اخوك ولا انت قادر تاخذه منه ، يعني صاير رجال علي مرتك وبس ، ياخي عيب والله عيب كل ما قالت لك ابي عقد الماس ولا ساعة جديده قلت ما عندي فلوس و في الاخير طلع اخوك زارفك و طلعت انت الحرمه قدام اخوك.

اللام : لازم تتحقق مطالبى اول بعدين ارد لك

يعني فرحان انت ويا وجهك ، يقولون شف وجه التيس و احلب لبن ، انت وشلون من الاساس تتجرا و تزعلها عليك و تخليها تروح بيت اهلها ، افا بس معاد اهنا رجال ، ياخي انت المفروض خدام تحت رجليها ، هي تامر ونت اتطامر.

الكاف : كافى كلام .. كسرت خاطرى راح اردلك بس بشرط

شفت حتي ونت مزعلها منك اول ما شافت الدمعه في عينك كسرتا خاطرها و وافقت ترجع لك ، حتي لو بشروط انت بس احمد ربك و كل تبن.

الياء : يالله ايدك على 2000 ريااااااااااال بشتري فستان بروح لعيد ميلاد صديقة صديقتي...و و و و و و و

انا ما قلت لك انك ما تفهم ، ترا هذي زوجتك مظهرها من مظهرك ان لبستها رخيص فنت رخيص ون لبستها غالي فنت غالي.

مسكيييييييييييين اللي بيتزوج وحده مثل هدي..

لا والله في هذي انت غلطان ، انت لو يحصل لك ضفر من اضافر وحده زي هذا فنت امك وبوك و اخوالك و عمانك داعين لك ، هو من اللي يقدر يطول و ياصل لوحده زي هذي.

[ثار التميميه]

خخخخخخخخخخخخخخخخخخخخخخ

حسبي الله ونعم الوكيل

بغيت اموت من كثر الضحك

مدري ليه احس ان معزبتك هي اللي كاتبه هالموضوع

الله يرجك...
متشققه ضحك شكل المعزبه مستانسه فيك..

يا اسبرانزا بلا رجه في عجه تكبر روس البنات علينا خخخخخخخخخخخخ

بس وش نسوي حكم القدر:]

[الريم]

ايه بعديييي بااخووي اسبيرنزا والله هذذا عين العقل صراحه ردودك ولا احـــــلـــــى منها ..واائيد كلام البنات شكلها المدام الي راده الموضوع ليتها هي الي ترد عنك دايم

[شموخ سدير]

بصراحه انا مايعجبني هذا الكلام كله لان في النهايه( طبعا في رأيي) الشخصي أنا ماأعتبره رجال وبعدين يعني ماشاء الله عليها الي هذي طلباتها وين مصدق نفسها بتاخذ احد سنع كل السعوديين يجيبون ......لاومن زين الاخلاق................انفسهم لاوزود الرواتب كحيانه واذا كان سنع ومافيها كلام والله لوأيش ماراح أطلب كل هذا لان القناعه كنز لايفنى واحنا عارفين انفسنا إذا ذاك اليوم بنتزوج مافيه إلا ابو5000أوإن كثر ومبسطين عليه7000 وحرام كل هذا يجيبه عشان في النهايه هي إلي بتتورط إذا جا يسدد كلما طلبت قال انا ألحين اسدد ونص الراتب طاير في السداد او ثلاثه ارباعه وانا احب الناس اللي يدبرون انفسهم وخاصه حنا يالبنات يعني كل وحده بتتفهم زوجها بدون هذي الاشياء كلها ومشكور يا أخوي اسبيرانزا

تعيييييييش العداله والمساواه

>>مبسوطه حدها خخخخخخخخخخ

لابس بجد ات ديموقراطي

شوف ياامالمعزبه هي اللي كاتبه الموضوع او انها واقفه فوق راسك خخخخخخخخخخ

بس بجد يعطيك مليون عافيه يالغالي

[البتار]

مشكور
على ما افدتنا به
تحياتي

[البتار]

بارك الله فيك
على ما تقوم به
احترامي

[نديم الحيارى]

وفقك الله
وسلمت اناملك
تحياتي وتقديري