مواقف وتصرفات

[الطائر المهاجر]

الكثير منا تعرض في حياته لمواقف معينة لايزال يتذكرها ، ويتذكر كيف تصرف معها ، وقد يكون تصرفه هذا قد
نتج عنه آثار قد تكون ايجابية وقد تكون سلبية ..
المطلوب من كل عضو أن يسجل أهم المواقف التي قد يكون وقعت له شخصياً ، وكيف تصرف حيالها بشكل مختصر ، لنبدأ بمناقشتها لمعرفة ما إذا كان العضو تصرف تصرفا سليما أم أن هناك طرق اخرى أكثر ملائمة لذلك الموقف . ثم بعد الإنتهاء من ذلك سنطرح مواقف قد يقع فيها أي منا ، لمعرفة كيف سنتصرف حيالها ،
وما افضل الطرق لمواجهتها...

تفضلوا .... وكل واحد يكتفي حاليا بـ 3 مواقف فقط ..

[الغريب]

عن نفسي راح أسجل موقف واحد لضيق وقتي

بس هو موقف ما يتنسي خصوصاً اذا شفت خالتي أم زوجتي

في يوم من الأيام كنت اتصل فيني جاري وقال تعال ترى العيال بيسهرون عندي وخلى الأهل يجوون يسهرون مع اهلى

المهم قلت لمرتي تبين تجين معي ترى السهرة عند أبو على ومرته تبيكي تسهرين

وقتها كان يدق التلفون قلت لمرتي إذا احد يبيني قولي له سهران برا

وقتها كانت زوجتي بعيده عن التلفون المهم جلس فترة يرن رديت إلا هذي ( خالتي ) أم زوجتي

بعد السلام ومن ها السوالف قالت وين فلانة

قبل ما أقولكم وش رديت

إنا من الناس اللي اعكس الكلام تلقوني أبي أقول فلان أقول فلان ثاني ويبيلى ساعة عشان ارجع للخط

المهم رديت وقلت والله المرأة سهرانه عند شباب

إنا قلت ها بكل هدوء ولا كأني غلط ولا شي ولا وقتها كنت متحمس أبي انهي المكالمة عشان البلوت

ما دريت إلا وها اللي تصارخ وش تقول

إنا ضعت دريت إني جبت العيد بس وش قلت ما انتبهت وش السالفة يا خاله صلى على النبي

أنت ما تستحي وش ها ألحكي

وانأ ببرود قلت لها وش إنا قايل ،،، تقول بنتي سهراته عند شباب

يوم التفت إلا والمرأة ميتة ضحك اترها سمعتني

المهم خذت ألسماعه وتفاهمت مع أمها وشرحت طبيعتي بس وبعدين كل المقربين فهموني وصاروا يدرون إني أجيب العيد في إي وقت

طبعاً اعتذرت و شرحت لخالتي الموقف وانتهى كل شي على خير


أبو عبد الله إذا تبي المواقف ابشر بسعدك اذا فضيت راح أعلمك

[الطائر المهاجر]

نستنى موقفين آخرين ، وكيف تصرفت فيهما ، حتى نناقش

[أم ريما]

فكره رائعه يا مشرفنا الغالي

ما شاء الله عليك دايم افكارك جديده وحلوه وهادفه


بتذكر مواقف وبرجع للموضوع


تحياتي وتقديري لك

[الريم]

والله فكره حلوه مره

بس حاليااً ما اذكر مواقف

لي عوده ان شا الله اذا تذكرت

[أم ريما]

الموقف الأول

صاحبتي الروح بالروح كذا مره تقول بزورك وتخلف وعدها اكون مجهزه كل شيء وفي الأخير تقول لا ما اقدر خليها بكره ولا يوم ثاني وتكون مشغوله بأشياء سخيفه احيانا ازعل واتضايق اني مجهزه كل شي ولا تجي
واحيانا اقول خلاص اوكي وانسى ..........


الموقف الثاني
وحده من الأقارب تتدخل كثيرر في حياتنا الأسريه ودائما تقول لأمي لا تسون كذا واعملوا كذا ومدري ايش تتلقف
في اشياء مالها دخل فيها ودايم نتحملها ونسكت خوفا من ان تصير مشكله وتكبر خاصه هي غير متفهمه
بس تعتبر نفسها هي اللي تمشي العائله كلها وهي اللي تعرف كل شيء ودي اتكلم معها بس اخاف امي وابوي يزعلون مني عشان كذا كلنا نسكت ونمشيها..........


ما عندي موقف ثالث خلها يا مشرفنا موقفين بس على بال ما نتذكر مواقف ثانيه


وشكرا لك على مجهودك يعطيك العافيه

عمري ماراح انسى هالموقف

هذا في يوم كنت بثالث ثانوي واهلي مانسمع وقتها منهم الا ذاكري وإذ غيروها يعني قالوا ادرسي
المهم كانوا متاملين فيني كثير
اليوم كان الجمعه وامي وابوي طالعين
وخواتي لاهين

وانا طفشانه مره
نزلت للصاله ولقيت اختي الضغيره قاعده تلون وجلست جمبها أقرأ الجريده ويوم خلصت للحين انا احس بالطفش
الا وتجيني ذيك الفكره
المهم قلت لها ساره عطيني ألون وقعدنا نسولف
قلت لها ساره أنتي تحبيني
قالت ايه انتي اختي
قلت لها بس انا مو اختك
ساره انتي مو اختنا
حنا أخذناك من المستشفى أمك الصدقيه تركتك تقول بنتي دبه ماأبيها
وعطتها أمي فلوس وشريناك
وهنا شفت الصيحه جتها
رحمتها بس قلت باكمل للاخير

وقلت انتي ماتذكرين امي هذيك المره يوم تهاوشك
وابوي
وقعدت اذكرها
وهذيك المره يوم رحنا السوق امي ماشرت لك شيء

البنت صدقت وقعدت تصيح
قلت ياساره بس ميخالف انا احبك

شوي ودق التليفون ولهيت انا عنها


وبعد المغرب كالعادة جمعتنا وقهوتنا
يوم تجمعنا فقدناها
وراحتي اختي تدورها ولا لقتها حسنا البيت ولا لقيناها
المهم آخر شيء تخيلوا لقيناها بغرفة الخدامة قاعدة ورى الباب تصيح
وتقول انتم ماتحبوني
انتم ماشريتوا لي لعبة فله
جاء ابوي وضمها ويقولها وش فيك وهي تحاول تبعد عنه
انا هنا انصدمت ماتوقعت يصير كذا كل الدعوى مزح
ففضلت السكوت

وشوي الا يجي اخوي ويقول كل السالفه هو كان قاعد بالمطبخ وحنا بالصاله واثريه سمعنا

هنا اخذت تهزئ من امي وابوي ومن خواتي
انتي خبله ماتعرفين تمزحين وانتي وانتي........الخ
لو البنت طلعت من البيت
البنت توها باول ابتدائي بتتاثر وبتتعقد نفسيا
وبتربط كل شيء صار او بيصير باللي قلت لها
من جد كبروها وهي صغيره

بس بعدين رحمتها وعرفت ان للمزح حدود
صدقوني هذاك اليوم اللي كنت طفشانه فيه اللي سويته طفشني زياده
من جد عرفت ان للمزح حدود

[الطائر المهاجر]

طيب مواقف تستحق النقاش يا ام فيصل ويا نجود ولكن كيف كان تصرفكم ؟؟

[أم ريما]

مشرفنا الغالي

موقفي اسكت وامشيها

كتبت لك في الموقف اني دائما اسكت وامشيها او اكون زعلانه ومنقهره من جوا بس ما اسوي شي اسكت

وش الحل وش التصرف الصحيح ؟

نجود ذكرتيني باللي صار لي مع بنت الجيران

انا صار لي موقف مع بنت جيرانا وكنت في وقتهاانا وياها صغار (2 او 3 ابتدائي) بس احس هي ماتنساه ابد
هي عايشه مع اهل مو اهلها اخذينها ومربينها واتوقع فاهمين
كنت اسمع الكبار من جيران جدد يعني سوالف الحريم يوم كانوا يسألون امي ويقولون هي من وين جابوها و...و...
انا سمعتهم امي حست اني مندمجه معهم في السالفه فحبت ترقعها قالت جابوها من المسجد((وهذي هي المشكله ان الكبار يتكلمون بمواضيع المفروض مايقولونها قدام صغار))
انا يوم قابلت بنت جيرانا وقلت لها انتي مسكينه تقال بقهرها وتعرفون حركات البزارين قالت ليش ((عاد هي اكبر مني بسنه))
قلت انتي جايبينك من المسجد واللي عايش عندهم مو امك وابوك وانا عايشه عند امي وابوي وهي قعدت تبكي وتقول لا والله هذولي امي وابوي
وانا اقول لا وشكلها البنت قالت لهم وماادري وقتها قالوا لها ولا لا((عاد اللي مربيتها زوجت ابوها الثانيه مرضعتها واللي مربيتها متزوجه اخو اللي مرضعتها يعني اللي مربينها اختها من الرضاع وخالها من الرضاع))
كبرنا وهي كبرت السالفه معاها وعرفت الحقيقه يوم كبرت لكن احس البنت ماتطيقني إذا جبت سالفه ام ولا ابو
وبالذات إذا قلت لها يابنت الحلال على اني اقولها لها بدون قصد يعني كلمه متعوده عليها دايم واقولها وإذا قلت لها بعد واللي يرحم والديك

هذي الكلامات اقولها انا بعفويه على اساس متعوده عليها على اني اتحاول اتجنب مااقولها قد مااقدر بس بعض الاحيان تطلع غصب

هي والله تحبني وصداقتنا انا وياها قويه مره لدرجه انا نقنع اهلنا نسافر مع بعض وبالفعل اعتمرنا كذا مره مع بعض ورحنا الطائف وجده مع بعض وفي شقه وحده سفرنا كله
يعني نمون على بعض مره لدرجه حتى في رمضان يوم كامل عندنا ويوم كامل عندهم بفطوره بسحوره بالعصر الظهر النوم بكل شيء ماعدا الكبار بس الفطور والسحور
كاننا عايله وحده بس المشكله تتضايق وتتذكر كل ماقلت لها يابنت الحلال ولا واللي يرحم والدينك
انا ودي اوضح لها بس مو قادره افتح الموضوع معاها