ابيات وردها ووصف الرحله الأيمانيه للشام

[الطامي]

وصلتني رساله من احد الأمورات بناتي ارسلتها مسج بأبيات شعريه وانا بالشام ورديت عليها
هي تقول :-

يامن عن اديارنا سافرت وابعدت = وجهت وجهك يايبه صوب سوريه
اوصيك في دينك وربك اذا اسهبت = واعيونك اقصر شبحها هالقويه
وعليك باللي لاجفاك المنام وقمت = وطلبت منه طلبة جات دغريه
اذكره واكثر من ذكر ربك ولاهنت = يحفظك حيث ان المعاصي جهريه
وعشان عينك عزوتي بس انا احببت = اذكرك وادع لي لاجبت طاريه

الرد :-

في جو ضيقه فيه فكري مشتت = جتني رساله من عزيزٍعليه
من اسمها فتحتها ماترددت = ومضمونها حرك ادموع الشقيه
اتقول فيها رحت يابه وتوجهت = لديرة تنسي الرجل من ذويه
من طيب مافيها تشببك لو شبت = فيها الطبيعه والفواكه طريه
توصين بالديان ان نمت وان قمت = وحنا قبلنا منها ذا الهديه
وارد الها واقول ياهيه يابنت = اخذي العلوم الطيبه الافضليه
ماني وانا تاجش الى رحت خربت = وجميع حسناتي تبدل بسيه
مامن خطا في شبَتي وبعدها تبت = وقدايمي في سكتي ابرحيه
لولا الامر من ديرتي ماتغربت = وفعايل المعروف تجزى بذيه
قالو انسافروانت معنا ولاهنت = قلت امركم حق على العين تيَه
وحنَا بخوة واحد دايم بصمت = ماغير ذكرالله وذكرى نبيه
جوله على تاريخ ناس لهم رمت = اصحاب من هو قد بعث للبريه
وابن تيميه شفت بيته وقفت = وصليت انا بمسجد ابن الجوزيه
ثم ريت مجلسهم وابَابه تصورت = وتدريسهم في مسجد الحنبليه
والاموي جيته وصليت مانمت = وايضاً ابي الدرداء جيته اشويه
واخذت لفه يم عمَان واجنبت = صوب العيال وديرتي القطريه
انا اشهد انها رحلت مابها كمت = رديت منها ونفسي لها قابليه

[سعيد الصاعدي]

الاخ الفاضل/ الطامي
صح لسانك وعلى شانك
وعسى الله يحفظ الاموره واخوتها
عند قرائتي للقصيدة تذكرت هذا البيت!!!
(وينشى ناشي الفتيان فينا على ماكان عودة اباه)
تحياتي
أخـــــــــوك
س / ص

[الطامي]

سعيد الصاعدي
صح بدنك
وماعليك زود
شكرا لك على المرور والمتابعه
لاهنت عيني

[عبدالله الشويمان]

صح السانك بنتك والله يستر عليه..

وصح السانك يا ابو محمد

دمت بخير ولا هنت

[حوريه]

الله على الرديه بين اب وابنته
مشاء الله تبارك الرحمن
رووووووووووووووعه
أبيات ولا أحلى منها
وين بنتك خلها تسجل عندنا ما دامها شاعره..
الله يخليها لك ويخليك لها
يعطيكما العافيه ولا هنتما.....

صح لسانك

الى ماله نهايه

[ابومياس]

ابو محمد

الله يحفظ لك ذريتك من كل شر

ويصلحهم

صح لسانك ولسان بنتك

دمتم بخير من الرحمن

[الخنساء]

صح لسانك اخي الشاعر الطامي
لاهان را سك قصيدة رائعه
ولاهانت بنتك
سلمت وسلم شعرك
دمت بخير

[الطامي]

الشويمان
صح بدنك
وماعليك زود
شكرا لك على المرور والمتابعه
لاهنت عيني

[الطامي]

بن دويرج
صح بدنك
وماعليك زود
شكرا لك على المرور والمتابعه
لاهنت عيني