مطعم ( تاو ) في الرياض

السلام عليكم ورحمة الله


هذا الموضوع ليسا دعاية أو نقد بأي شكل من الإشكال للمطعم ، الموضوع هو فقط تجربتي الشخصية فيه ، و رغبة مني في تعريف أهل الرياض و زوارها ببعض مطاعمها.

[line]


مطعم تاو (ابو ساق)



الموقع :

الرياض ، شارع التحلية ، بجانب مطعم الريف اللبناني و مركز النخبة الطبي.


يوم الأحد 11/7/2005 عزمتني المعزبة على حسابي في المطعم المذكور ، إنا عن نفسي أول مره اسمع بالمطعم هذا ، إما المعزبة فكانت وحده من خوياتها قالت لها إن المطعم زين.

المهم إنا مقدر أرد للمعزبة طلب ولا يا ويلي ، لذلك ركبنا الموتر و حركنا إلي شارع التحلية شارع العز و الصياعة في الرياض.

أول مشكلة صادفتني هو إني ما لقيت موقف للسيارة قدام المطعم ، و أبدا اللفلفة كود إني إلقاء محل اصفط فيه الموتر ، لكن ما فيه أمل ، أخيرا لقيت موقف جنب زبالة في حارة جنب المطعم ، و اخذ المشوار كعابي الين وصلت للمطعم.

إنا يوم جيت قبال المطعم ما عرفته لان ما علية لوحة واضحة و واجهته كانت قزاز و جواه كاونتر كان عليه 2 شباب سعوديين ، و يشق واجهت المحل من قدام ساق و فخذ ادمي (اللهم يا كافي) ، قالت لي المعزبة هذا هو المطعم و يله خل ندخل ، مشينا لم الباب و يوم قربنا منه و ينطلق ذاك الشاب السعودي من المحل عشان يفتح الباب للمعزبة ، إنا ما أخفيكم قلت لنفسي و إنا اكشر عن أنيابي (يعنبو هالشباب يغازلون الحريم حتى و أزواجهم معهم ) ، المهم الأخ فتح الباب و سلم و رحب فينا في المطعم (صار أبو الشباب يشتغل في الاستقبال حق المطعم). إنا الحقيقة أول مره أشوف مطعم فخم في الرياض يوظف سعوديين في الاستقبال ، بس الحق أنهم كانوا قمة في التهذيب و الأخلاق.





هذا المطعم من برا ، وشوفو الساق.


سألنا الشاب السعودي اللي في الاستقبال إذا عندنا حجز ، فقلت له لا ، فقال اقعدو و انتظروني بجيكم الحين ، بعد حول دقيقة ولاه راجع و قال الحقوني ، لحقناه ولاه مودينا لذاك المحل الصغير في أخر المطعم و كان فيه كم طاوله كل وحده منها جنب الثانية ، و حول كل طاولة ستائر أمتدلية من السقف تقل حقت الغرف المشتركة في المستشفيات.




هذا السيب اللي مشينا معه عشان نوصل للجلسة حقتنا.





هذي الجلسات اللي ودونا لمها.





هذي الستائر اللي قلت الكم عنها.

راح ابو الشباب و خلانا ، بعدن اقبل علينا ذاك الخواجة و إعطانا قوايم الطعام بعد ما رحب فينا و اعطانا ذيك الابتسامة العريضة ( الجرسون اللي في المطعم ابيضاني من جنوب إفريقيا).





هذا الجرسون و هو امتشقق ، ما تعود احد يصوره.

إنا لقطت قائمة الطعام و المشروبات و فتحت على أول شي اطلبه دائما اللي هو البيرة (متعود على أمريكا) ، و أدور في القائمة ولا ما عندهم إلا بيرة هولستن الشينة المره (ما عندهم المزيونه البدوايزر) ، ما جاز لي الوضع فخذت شراب السعوديين كوكاكولا دايت بسعر 8 ريال ، و المعزبة طلبت عصير أسمة xxo بسعر 20 ريال ، طبعا لا تسألون عن أسعار المشروبات لأنها نار الله ألموقده.





هذا قائمة المشروبات في المطعم.





و هذي بعض أسعار المشروبات



طلبت لي ابتايزر أسمة (دمسم) و هو بعض المعجنات الصينية المحشوة باللحم ، إما المعزبة فطلبت شوربة تايلندية. سعر الدمسم كان 55 ريال إما الشوربة فكانت 39 ريال.

إما للوجبة الرئيسية فنا طلبت على شور الجرسون صدر دجاج على الطريقة الكاريبية بسعر 75 ريال و المعزبة طلبت مكرونة بولوقنا بسعر 37 ريال..

جاب لنا الجرسون الله يجزاه خير كم خبزه في سلة على حسابه هو لأني إنا ما طلبته ، و بعدها جاب طلبي و طلب المعزبة.





هذا الخبز اللي جابه الجرسون على حسابه (الله يجزاه خير)

هذا الكوكاكولا حقي.





هذا شراب المعزبة الـ xxo.


أكلت الدمسم حقي ولا عاق فهو كله كان 5 قطع صغيره ، إما المعزبة فما شربت شوربتها لأنها ما جازت لها ، ناديت الجرسون و قلت له إن الشوربة مهيب زينة ، فطلع أجودي و راح و جاب نوع ثاني من الشوربة بدل التايلندية.





هذا الدمسم





و هذي الشوربة التايلندية الوعة.

بعدها جاب الجرسون الطلابات الرئيسية ، ولا طلبي مغير صدر دجاجة مفرود و جنبه شوي بطاطس مهروس و سبانخ مغلي.





هذا الدجاج حقي.





هذي مكرونة المعزبة.




أكلت أكلي و طلبت الحساب ولاه مع الخدمة 301 ريال (الخدمة كانت بـ 39 ريال) ، حطيت فوق المبلغ هذا المقسوم من البخشيش و مسكت الباب.





هذي فاتورة الحساب.

و إنا ماشي في السيب إلي يودي للباب لاحظت إن فيه جلسات حلوه على شكل كنبات وسيعة تونس اللي ما يتونس ، سألت عن الجلسات هذي فقال لي حق الاستقبال ان الجلسات هذي كلها محجوزة ، و اعطاني رقم المطعم عشان احجز قبل ما أجي المرة الثانية و اقعد في احد الجلسات الونيسة .


هذا رقم تلفون المطعم كان ودكم تروحون له ، احجزوا قبل ما تروحون عشان تقعدون في الأماكن الونيسة:

الرياض: 4653020



نوع الأكل في المطعم:

المطعم عنده تشكيلة مختلفة من المأكولات ، الايطالي و البحري و اللحوم المشوية و متفرقات أخرا ، لكن يغلب على الطابع الغربي بصفة عامة.



ملاحظات على المطعم و الأكل:

1) الجلسات الأمامية في المطعم حلوه و تجنن ، لكن يبي لها حجز مسبق.
2) الخدمة في المطعم كانت حلوه و زينة.
3) عصير المعزبة xxo زين . أشور عليكم به.
4) المشروبات و المأكولات بصفة عامه غالية بزيادة.
5) لو المطعم يشوف له واحد يوقف سيارات الزبائن كان ريح العالم من المشورة.
6) الدمسم زين بس غويلي.
7) الدجاج الكاريبي مو إلي ذاك الحد و ما يستأهل سعره.
8) المكرونة كانت زوينة


تقييمي للمطعم:

[الــذاهبه]

ماشاءالله

حلو مره واكلاتهم تشهي

ايه اعرض لنا مناطق سياحيه ومطاعم حلوه لاعلى وعسى

هالشباب يركدون بديرتهم

يعطيك الف عافيه

[ثار التميميه]

خخخخخخخخخخخخخخخخخخخخخخخ

والله لو يموتون ماشتري الكولا ام ريال بثمانيه

هذا اسمه فسق

لابلاني الله جبت معي كولتي وحطيتها بالشنطه

<------- اسكتي فشلتينا

--------> وانا صادزه

بس تصدق وش احلى شي بصحن الدجاج حقك ؟؟

الشخابيط اللي عاليمين

خخخخخخخخخخخخخخخخخخخخخخخخ

رحله رائعه بس بصراحه ماش مايفرح هالمطعم

اذا تبي نصيحتي رح للمذاق الايطالي اللي على طريق خريص

على نفس امتداد محلات الجميح

مره حلو ومرتب وسعره معقول جدا بالنسبه لهذا

مطعم تاو لا وبو ساق بعد .. لا وفي شارع التحليه ،، وخذ بعد سعر أكلهم .. لا والكوكا بثمانية ريال ..

إيه هين أبروح بس بشوفه من بعيد ثم بروح ليمال الشام عندهم أكلات حلوه ,, والعصير رخيص ..

ابتسامة هالجنوب أفريقي تروع .. أنتم متأكدين من اللي كلتوه ..

تحيتي Esperanza

وااااو كل ذا .. لا تكون مسويلهم اعلان وحنا ماندري..
بس شكل المطعم زوين يبيلي اروح له بس سالفه الكولا اللي ب8 ريال ذي صراحه ماتنبلع
>>>>>والله ماعندي سالفه بروح اتعشى شورما ام ريالين اصرف لي

يعافيك ربي على المعلومات
وبصراحه من كلامك والصور المطعم شكله حلو
بس مايبي واحد معاه اطفال لانهم راح يسلخونه بالسعر
يصلح لاثنين وبس عشان يطلع الحساب معقول
لكن فعلآ ليه الببسي بثمانيه ريااال والله قهر

لاعدمناك

فخذت شراب السعوديين كوكاكولا دايت بسعر 8 ريال

ضعو تحتها خطين

============================== =========


وبعدين معليش الغلط مو على زوجتك الغلط على اللي يطاوعون حريمهم بكل شي.... وهذي اخرتها ما شربت شوربتها .


بس سمعت عن المطعم وانت وياها رحتوا تدربووون روووسكم



============================== =


لا تزعل يا اخي الكريم بس انقهرت عشانك


تحياتي