قصيدة 24 شارع الحجاز (هشام الجخ)وبصوته

قصيدة ( 24 شارع الحجاز )
للشاعر / هشام الجخ

إتدلّعي .. واتبغدَدِي .. واتفاخري .. واتباهي
قولي لكل الناس ..ده عشقني والله ..
لِـمِّي العيال حواليا زِفُّـوني ..
ظاظوا عليّا وحَدِّفُوني طوب ..
ما انا اللي سِبْت عنيكي لَفُّوني ..
وانا اللي استاهل كل يوم مركوب ..

فاتدلعي .. واتبغددي .. واتفاخري .. واتباهي ..
آدي ضَحِيَّة كمان فِدا رِمشك الساهي ..
موت الضحايا جَزَايَـا .. ما انا اللي وَدِّيـتِـك ..
ولْـحَدْ حَدْ ما وَدِّتُـوش ولا حَدْ وَدِّيـتـك ..
وقَلَعْت كل سنيني على خَصْرِك ..
ضَفَّرْت شَعْرِك عِشّ جُوَّايا ..
بايَـعْت حُكمِك وابتَدِيت عَصْرِك ..
ووقَفْت ورا عرشِك ومَسَكْت هـوَّاية ..

موت الضحايا جَزَايَـا وكُلَّها ضحايا ..
مين اللي قال الحب آخره عَمَار ؟؟؟
الحب آخره نهاية في رحَاية .. ( الرحاية هي طاحونة يستخدمونها في الريف المصري )
القسوة طاحنة والحجر دوَّار ..

فاتدلعي .. واتبغددي .. واتفاخري .. واتباهي ..
واستنكري من عزتي .. واستهتري بـجاهي ..
خَلِّيني مضرب مَثَل من بعد هيبة و وزن ..
كُبَّي المرار في العسل .. واملي الفرح بالحزن ..
يعني انتي أولهم ؟؟؟ ولا انتي اول همّ ؟؟؟
ولا انتي اول سهم إتْسَنْ لي واتسمّ ؟
لو تكشفي ضهري تلقي السهام علامات ..
وانا زي زرع ف هوا وَطَّى حِيِـي وعَلا مات ..
موت العلالي شرف .. بس اسمها موتة ..
مش عدل تبقي ف ترف وانا باطفح الكوتة ..
ما يا إمَّا نَقْسَمْهُم وَخْزَة قُصَاد وخزة ..
يا إمَّا لا مواخذة .. توتة يا حدوتة ..

وابقِي اكدبي براحتِك .. واتدلعي براحتِك ..
طعم الهزيمة جِزَا للي يزور ساحتِك ..
وانا قلبي يا ما غلب .. مش عيب يبات مغلوب ..
اهو برضه فِدْتينا وكَفَّـرنا بيكي ذنوب ..
ولَـحَسْـنا من شَهْدِك وشرِبْـنا من رِيقِك ..
وسْكِرْنا من كاسِك وكَسَرْنا إبريقِك ..
وطْعِمْنَا من حُسْنِك وشْبِعنا بِـبَـريقِك ..
ومْشِينا في طَريقِك ..
ورجِعْنا مَـلْـوِ اليَدّ ..
جَرْحِي قُصَاد جَرْحِك .. ولا حد ظالم حد ..
ولا انتي فاكرانا رجالة خيبانة ؟
نبكي على النسوان ونْسِحّ في بكانا ؟
كنتي اسألي "نانا"
اللي اسمها "نانا"
يا دوب زِعِلْنا يومين واهي دنيا لاهْيَانا

ما تكدبيش ع الناس .. الناس دي عارفاني
قلبي خشب لو غطس بِيْقِب من تاني
فماتحرجيش روحِك وتقولي ده عشقني
بدال ما صاحباتك يقولك آدي دقني
حِبِّي على قَدِّك واحكي على قدك
وان جت سيرتنا ف يوم ابقي الزَمِي حَدِّك
تتدلعي ماشي .. تتبغددي ماشي
وتقولي حبني موت برضه ما يـجراشي
بس انتي من جوا فاهمة ان زمنك مات
وبقيتي زي اميرة قلبها شحات

لِفِّي على صحابي .. سِبِّـيني في غيابي
قولي ان عمرك يوم ما وقفتي على بابي
لا كَوِيتي قِمْصاني ولا جِيتِـي زُرْتِيني
وللا تعرفي مكاني ولا تعرفي تـجيني

واني يا دوب واحد دايب ف دباديبك
عامل كما عَيِّل شابط في جلاليبك
وانتي يا عيني أُف
زهقانة مني خلاص
عملتي زار بالدُّف
وسُقْتِي كُلّ الناس
وانا برضه لازِقْلِك
معلش حَظِّك كدة رَبِّك ورازِقْلِـك

روحي يا شاطرة هناك انضمي للالبوم
انا كل عشرتي بيكي 22 يوم
عملتي نفسك حكاية ؟؟
ومحبة فيَّـاضة ومَخَدَّة بَكِّاية ؟
وسهر وسُهْد وويل ؟
وبكا و غنا و مواويل ؟
في 22 ليل !!
على اي حال
شكرا وشكرا ثم شكرا للقصيدة
قَلَّما تأتيني امرأةٌ بأفكارٍ جديدة
لتحميل القصيدة بصوت هشام الجخ نفسه الدخول على هذا الرابط
http://rapidshare.com/files/15778912...575___1586_.rm

[نجم الإبداع]

يسلم فكرك اخوي هشام

ولكن القصيده مكانه في قسم اللهجات الاخرى

ياليت الاخوان المشرفين يقوموا بنقلها

ليتم التفاعل معها

لاهنت

تحياتي وودي

[كريمة محمد]

صح لسانك وفكرك الاخ هشام على هذه الابيات المعبرة
تسلم اخى
واتمنى ان تتقبل مرورى واعجابى الشديد
تحياتى لك

طيب يا جماعة سمعتوها ولا لأ ؟؟

يا ويلنا منكن

[الهميم]

بارك الله فيك
جميل ما قرأته
تحياتي

[بليهان]

شكراً لما امتعتنا به
تحياتي

[البتار]

مشكور
على المعلومه الجيده
تحياتي

[البتار]

لك الشكر
على ما فاض به قلمك
تحياتي

[الهامس]

وفقك الله
وسلمت اناملك
تحياتي وتقديري