الطفل ما ينسى

الطائر المهاجر · 01-02-2006, 10:02 PM

الطفل ما ينسى ولو كان دهدوه = يذكر الى منّه كبر ويش نابه
ووشلون عمره بالسنه يوم لدوه= طفلٍ عليل وما دروا وش مصابه
ثلاث مرات إلى القبر شالوه = واحياه ربه يوم أجّل كتابه
جايع ومن حوله شباعا ولا اعطوه= من ترث جده ينقذه من تبابه
إلا قريطيعٍ وتخشى يشوفوه= تجيبه اللي مثلها ما تشابه
حرّه مرة حرٍّ الى من تطاروه = يجزاه بالفردوس يجزل ثوابه
ويسبغ عليها العافيه كلما ارجوه = نفرح لشوفة من غذت للذيابه
ويذكر ابيّه كيف بالذل هانوه = وهو البعير لكل حملٍ يجابه
امضى العمر في كل شيٍ يكدوه= حبة شعيرٍ تنهضم باستعابه
يكدح شرف محروم من ترثة ابوه= حتى ولو شغله فلا اهتنى به
الجوع يفرس في عياله ولا اسقوه= إلاّ همومٍ صابته بالكآبه
اهل الكرم للصيت واللي يهابوه = سيف رديٍ عضّته في قرابه
اهل القلوب القاسيه كيف يرهوه= والدم واحد كيف ينسى انسيابه
حدّوه يرحل تاركٍ ما يريدوه= ما معه شئ كود اردى ثيابه
ومن قبل ما يرحل على الظلم حدّوه= يكتب تنازل بالنفاه لجنابه
للي الى من جيب ذكره يعدوه= راع الكرم والمرجله والمهابه
راح وتركهم ماشتكى لو توطوه= عيبٍ على الرجال يشكي القرابه
رزقه على اللي عالمٍ ما يكنّوه= ما خاب من ينصاه ياقف ببابه
الله رزقه ورغم هذا إذا جوه= يلقون عنده كل خير ورحابه
وحتى عياله ظلهم لو يمدوه = الطيب منهجهم يعلّوا ركابه
هذا رحل وهذا رحل/ يوم يلقوه= ربٍ عليم وعادل في حسابه
واللي ثبت من بعدهم ذكرٍ ابقوه = يا حظ من ذكره حسن في غيابه