ونحتمي بوجوهنا كل قادي

[نجم الإبداع]

ضاع الامل ياوقت في بعض الاصحاب=من عقب عيش وملح ينكّْب زادي
تغير الصاحب ووجه القمر غاب=والشمس باهت ضوها بالبوادي
كنا ولايف بيننا مابه اغراب = نحفظ قفا الصاحب ونشقي المعادي
كان الوفاء نبراسنا بين الاعطاب=والصدق فينا كان كل المرادي
كنا نغطي بعضنا وقت الانشاب =ونحتمي بوجوهنا كل قادي
سرنا الدروب وماشكينا من الغاب=وكانت لنا بالطيب تسعى الشوادي
كان الهدف واضح وماعندنا احزاب=ولا نصدق قول مغتاب غادي
كنا على وضح النقاء نفتح الباب = واليوم خلف استار حد الحدادي
تغير المفهوم والحق منصاب = والزيف حول ارقابنا له قيادي
سرنا ورى اهل الكذب من دون الالباب=من عقب راحه حل فينا السهادي
تفرعنت بقعاء وغنت بالاسلاب =من شجرة الزقوم تكوي فؤادي
تصور الشينه لنا عشق غلاب=والحق لونه تقلبه لي رمادي
ضاعت مبادينا على سود الاهداب=والشر صوته فوق صوت الحيادي
كنا على صوت الربابه والاطراب=والحين صوت الغدر فينا قتادي
ننبش قبور الناس ونشب الاعشاب=وننزيّ الي يستحي بالهدادي
راحت عوايدنا مع عكف الاشناب=نتبع هفى ونسيب درب السدادي
مابيننا الا كل جاير وقصاب = مات الوفاء وانحط فكر المجادي
عقولنا كانت لنا بين الاحباب =واليوم سلمنا القياده هنادي
نسمع فحيح سجاح والحان زرياب=ولانفرق بين يابس ونادي
بعنا اقرب الاصحاب لعيون حطاب=نمنا وسلمنا المفاتيح دادي
صرنا بيدّين المرائين سكراب=نتبع هوى الحاقد ونرعى الجرادي
ننسج خيوط الكيد حتى للانجاب=ونقول هذا عقلنا اللاارادي
ياحيف يالصاحب وش امنك للداب=الي سقى الحيه وسمه وكادي
راعي النفاق الي مرد دوم مرتاب=يخفي النوايا السود بين المبادي
ينمق الهرجه وللغول كساب = يرمي بغيضه من شرر كل نادي
جنوده الكذبه وراعي تزلاب = خلف النذاله ينتشي والفسادي
من ذاق من سم الحياياجني الحاب = والي يطاوع راعي الغدر رادي
لافي سمانا نجم ضاوي ولا اسحاب=لابرق لاراعد ولا صوت شادي
مابه حيا بالارض لاروض خلاب=ديار جدباء بور! مابه سمادي
لاعين بين جبالنا تروي عقاب=مابه شجر لاظل لا نبت كادي
تكدر الصافي ولي زاد ماطاب =من عقب مابان المخبى حدادي
بانت خيوط الكيد وانهدت قباب=واهل الردى خابو وثار الزنادي
الي بنو للشر مقعد ومرءاب = وطاوعو وسواس معثور لادي
عصابة الشيطان تاهو بالاقطاب = مسيلمه خطط ونفذ نجادي
غنت سجاح لمحور الشر بالكاب=واهتز عرش الظلم جاه ارتعادي
تساقطت عمدانهم بين الاطناب =والذعر فيهم حل والانتكادي
تساهلو الموضوع وتراقصوا لراب=وعيونهم بالمكر جاها كسادي
تناولو الموضوع من باب مغتاب=وكذبو الصادق وقاموا لمزادي
عقولهم مثل العصاقير الازغاب=واجسامهم مثل البغال البلادي
ماخافو الرحمن وقت التخضاب=خضاب من نبع الخنى والغدادي
مايفلح الساحر ولو دش محراب=واهل النميمه قيحهم سال صادي
الي على الغيبه مرد ذاك نصاب=والي ينافق جا له اليوم حادي
للشر حطو والردى سبعه القاب=واسترسلو في كيل كذب وعنادي
تصورو انا مانعرّف اهل الاطباب=وانا صغار عقول والا جمادي
ماقدرو بعد المسافه والاقراب = ولا تأنو قبل صقل الهنادي
سارو ورى الشيطان في درب ثلاب=واعطوه عهد الطاعه الارتدادي
طبو بحفرتهم على سن كلاب = صاحو من الفجعه بسجن انفرادي
تطايرن احلامهم وقت الانجاب=مولودهم ميّت مشوه خمادي
خابو ولا شافو لهم أي شجاب = ولاجنو غير الخوى والنكادي
ماحصلو بضهورهم غير مشعاب=عور العيون مكسرين الايادي
تاهو وضاع الدرب منهم والاسلاب=وكبيرهم خنّس لطرق الكمادي
راحو لدكتور الهوى واهل الاعشاب=ولا لقو لجروحهم طب جادي
مصابهم فادح ولو راحو الزاب =لا الحبه السوداء دوى والرشادي
هذا مصير الي يبي جمع الاقتاب=بالغش والغيبه وظلم العبادي
فكره عقيمه تافهه مالها خصاب=ولا لها بين المخاليق سادي
على الخوى قامت وبنيانها خراب=مساكنن للبوم واهل الهمادي
ياقاف لاتجحف ولاتلحق انساب=صب الغضب صبه على اهل الكيادي
والله ان راعي الغيبه ملعون قناب=دبور من زنّه يضيع الرشادي
يصب غيضه للردى يا للاعجاب=لايستحي من نقص والا انتقادي
يضحك بوجهك والقفاء لابس نقاب=يتقن فنون الكيد كنه سعادي
ياشين طبعه بين الاطباع ينعاب=لايبلعه عاقل وناره رمادي
لامن حضر ريحه تقل ريح سنجاب=متفيهق النبرات يبدي الودادي
يمدح وهو بالذم ضاري وخطاب = يضحك وهو من غيض يخفي الصفادي
من يأمنه يلسعه بالذيل والناب =ماله صديق ولا عليه اعتمادي
حصني ضبح صحى الاسد فوق الاخشاب=والذيب من ضبحه عرف بالمرادي
صلى على روحه صلاة اهل الاحداب=وشب نار الغدر تحت القيادي
علباه فوق الجمر يصلى التقلاب =مما جنته ايديه ممصوخ هادي
يسمع من المعتوه زيفه والارياب=ويقول هذا العالم الانفرادي
ثوب الردى ماهو كما باقي الاثواب=والبغل ماهو صافنات الجيادي
في ديننا النمام مذموم الارتاب=ياكل لحوم الناس مثل العوادي
كريه مايلقى مع الناس مشراب=يدخل مع الطاقه بكسر الرصادي
يجمع شياطينه على نهج الارهاب=ويسمم افكار البشر بالصوادي
ينهق كما الشيطان في صف الاذناب=من سمْع صوته قال هذا عبادي
عوده من الغيره وله صوت صخاب=والحانه الغيبه لكل الفنادي
يجول بين اهل الردى في تعتاب=والي يطيع امره عليه اعتيادي
سيفه خشب لاهل المغاريف سلاب=مايخفي العوره ولاله ضمادي
قصير تافه بالبشر كنه ذباب = ماياقع الا فوق زبل الجنادي
لامن كبير القوم غنى كما الشاب=لاخير بالدنياء وحر وبرادي
الشيخ عقله مايسلمه هراب = الا اذا خرف وجاه انسدادي
والي يسلم دقنه الناس الاجراب=يجرب ويكسيه الجرب بالسوادي
العقل زينه والهوى جمر الاعقاب=والشور مايوخذ من اهل الرقادي
الصدق نور وراعي الغيبه هبهاب=والجهل فوق الروس صار الريادي
مالي بمن يلبس على الذل جلباب=ولا من ام قرين ضاع اعتدادي
عايش بتفكيري على شم الاطياب=يوم ان غيري بالخساعه قرادي
اطرب لنسج القاف واحب الاسهاب=وابني بديع القول زين المشادي
على النقاء والود والطيب كساب = وبالمواقف لي مع الناس هادي
اشره على العقال لاطاعو مصاب= واعطوه مفتاح الحكم والوفادي
يشوم فكري عن صدى صوت زرناب=واغض طرفي عن جميع الغيادي
اقدر اهل العلم واشوف الاحساب =واقنع بما يكتب وزاد المعادي
عايش على الفطره كما سيف بنصاب=مايخرج الا للقلوب الروادي
سيفن صقيل الحد طاريه ينهاب=لاصوب ارقاب الرذيله زيادي
اتبع طريق الحق من رب الارباب=لامتبع مرجف ولا فكر مادي
احزن على غزه ولي صبر خباب=وان فاض صبري سقت روح المفادي
اعرف لئيم الناس واعز الاقطاب=واحب بين الناس فكر الجهادي
حاولت نسيان الردى بين الارقاب=وازريت من جور الشحيح البجادي
ماقد عصاني القاف سلمي وحراب=ينصاع لي في قربتي وابتعادي
وارث من اهل العرف ترتيب الارداب=من كيل وافي يذهل اهل التمادي
صافي من الغثرات وافكار ثراب=لاغبت يعلن للقلوب افتقادي
اصوغ جزله من صدى فكر منساب=مثل الذهب والجوهر المستقادي
تمت وصلو عالنبي ياهل الالباب = عد النجوم وعد مقبل وغادي

[الطوير]

شكراً لكل جهودك الرائعه
تحياتي

[اللهيب]

شكراً لكل جهودك الرائعه
تحياتي

[اصيل]

شكراً لما امتعتنا به
تحياتي

[بليهان]

كتبت فأمتعت
شكراً لك
تحياتي

[اللهيب]

كتبت فأمتعت
شكراً لك
تحياتي

[الهميم]

شكراً لما امتعتنا به
تحياتي

[البتار]

شكرا لك
على الجهد الطيب
تحياتي

[البديعي]

مشكور
على ما افدتنا به
تحياتي

[الهامس]

جزاك الله خيراً
على ما افدتنا به
ودي واحترامي