![]() |
رقم المشاركة : 1 | |||||||||||||||||
|
السلام عليكم ورحمة الله هذا موضوع كنت كتبته في احد المنتديات لكي اجيب على كل من لديه استفسار عن الدراسه و السياحه في كندا. ابحط الكم جميع الاستفسارات اللي جتني و اجوبتي عليها عشان يستفيد منها كل من يرغب في السفر الي كندا اما للدراسه او للسياح. و اللي عنده اي استفسار ما ورد في الردود اللي بتقرونها ممكن يحط للي استفساره و انا انشاءالله اجاوبه عليه. [line] اقتباس:
الجواب على الاستفسار السابق: ما بين شهر 11 و 3 ميلادي بيكون فترة الشتاء في فانكوفير ، لكن و بما انك منت قاعد في المدينه الا 3 اسابيع فنشاءالله ماهو جايك اكتيئاب فترة الشتاء للي ما تعود على البرد و الثلج. صحيح ان البرد في العاده في فانكوفير بسيط بالمقارنه بباقي اجزء كندا ولكن روحتك في الفصل هذا بيحرمك من جمال و سحر فانكوفير لو انك تروح الها ما بين شهر 3 و 9 ميلادي. انا اعتقد و انت ابخص في الموضوع هذا ان فترة 3 اسابيع لدراسة اللغه الانجليزية غير كافيه بالمره و يمكن ما تستفيد منها. لكن اذا كان الهدف الرئسي هو السياحه و من ثم الدراسه فلا ضرر من ذلك ، مع اني افضل انك تروح خلال فصل الربيع ( بس انتبه اذا رحت خلال فصل الربيع يمكن معاد ترجع من فانكوفير ، جمالها بيسحرك و هذا شي لا شك فيه). اذا رحت في فصل الشتاء منت محتاج شي غير موجود في المدينه ، الملابس الشتويه عندهم افضل و ارخص. المصاريف تعتمد عليك بالدرجه الاولي ، ولكن بختصار التكلفه خلال 3 اسابيع بدون سكن بتكون كما يلي: ( الدولار الكندي يعادل 3 ريال سعودي ) 1) المواصلات: - اذا حبيت تستأجر سياره ، التكلفه لسياره صغيره ( كرولا ، صني ، ماليبو ، فوكس ) بتكون في حدود 45 دولار في اليوم ، طبعاً بتحتاج الي رخصه دوليه او تكون رخصتك مكتوبه باللغه الانجليزيه ، و بتحتاج الي بطاقة ائتمان لستئجار السياره. ( تكلفة السياره لمدة 21 يوم بتكون 945 دولار). طبعاُ لا تنسي انك تحتاج تعبي بنزين و مع اسعار البترول المرتفعه بيكلفك البزين حدود 10 الي 15 دولار في اليوم. - اذا منت مستاجر سياره ممكن تستخدم التكاسي و معدل سعر المشوار الواحد هو 10 الي 15 دولار. - و ممكن تستخدم الباصات و القطارات ، سعر الباص للمنطقه الوحده 1.5 دولار ، و القطار الكهربائي نفس الشي تقريباً. 2) الاكل و الشرب: على افتراض انك منت طابخ في البيت و بتعتمد على المطاعم ، تكلفة الاكل و الشرب بتكون كماء يلي: - الفطور 10 دولار. - الغداء 20 دولار. العشاء 20 دولار. طبعاً كل الاسعار هذي هي كمتوسط ولا تشمل الاكلات السريعه ( مكدونلدز و برقر كنق ... الخ) ، الاكلات السريعه تكلف في المتوسط 5 دولار. و اذا كنت من محبي الاكل الصيني فهو ثاني ارخص اكل بعد السريع ، يعني ممكن تاكل في بوفيه مفتوح الين تشبع بحدود 10 دولار. و فيه طبعاً مطاعم اغلى ولكن بجوده افضل. التمشيات: - اذا انت من محبي السنماء ، التذكره تكون في حدود 10 دولار للفلم و 5 دولار للفشار و المشروب. - اغلب المتنزهات الموجوده في المدينه يكون الدخول لها مجاني ، و اذا كان فيه رسم دخول بيكون في حدود 15 دولار. - التسوق مكلف ولكن انا ارا بانه ارخص من عندنا. و يعتمد على الشي اللي انت بتشتريه. مدري اذا فيه شي ثاني. انا عن نفسي اصرف معدل 100 دولار في اليوم من غير السياره. يعني حدود 3000 دولار مصاريف انشاءالله تبسطك. انت ما سألتني عن المعهد ، لكن قلت احط الرابط حقه اللي على الانترنت: YMCA اذا تحتاج اي معلومات عن المعهد انا في الخدمه. و انا في انتظار باقي استفساراتك. لك اجمل تحية. [line] اقتباس:
الجواب على الاستفسار السابق: ارا بانك حايراً في الاختيار بين دراسة اللغة الانجليزية في بريطانيا ، نيوزيلندا او كندا ، سوف استطيع مد يد العون لك بما لدي من قليل المعلومات عن معشوقتي كندا و بالاخص فانكوفير. ( تراني قاعد اجرب لغتي العربية الفصحا ، و شكلي جبت العيد). المهم نرجع لموضوعنا ، انا بعطيك بعض الاسباب اللي تجعل كندا هي الخيار الانسب للدراسة على وجه العموم: - اول شي لازم تعرفه هو ان المعاهد الكنديه غيرخاضعه للتصنيف الرسمي للدولة ، يعني ما فيه شي رسمي ممكن تعتمد عليه عندما تقول ابغا افضل المعاهد الكندية ، كل اللي ممكن تعتمد عليه هو ما تراه بنفسك و ما يقال لك من ناس جربو المعاهد هذي. - مقياس او الستاندرد التعليمي عندهم هو الاصعب و الاكثر دقه و بالطبع الافضل في العالم المتقدم. - الحكومه الكنديه تصرف على التعليم اعلى نسبة بالمقارنه بدخلها القومي من اي دوله اخرا من دول العالم المتقدم. - خريجي الجامعات و المعاهد الكنديه يعدون الافضل عالميين في مجال العلوم و الرياضيات. - الشهادات الدراسيه الكنديه بانواعها في الكثير من التخصصات الدراسية هي الافضل و الاكثر قبولاً على مستوا العالم. - النضام التعليمي و الصحي في كندا حسب دراسه اعدتها الامم المتحده هو ما بين افضل ثلاثه على مستوا العالم من عام 1994 و حتي الان. - مستوا الجريمة و العنف عند الكنديين هو من الاقل في العالم المتقدم. - التكوين السكاني الفريد من نوعه في جميع انحا كندا و بالذات في مدينة فانكوفير ، تبي تحصل ناس من كل عرق ولون و ديانه ، عشان كذا منت حاس انك غريب ولا شكلك يختلف عن غيرك. - طبعاً بالاضافه لكل ما سبق ذكره ، عندهم شي يميزهم بزياده عن غيرهم و بالذات في مقاطعة برتش كلومبيا (مدينة فانكوفير هي اكبر مدينة في المقاطعه هذي) هو جمال الطبيعه الخلاب اللي يسحر و ياخذ الانفاس من روعته. ( طبعاً يمكن تقول انا وش دخلني في اغلب النقاط هذي ، انا بس حبيت اذكرها عشان يستفيد منها اي شخص يقراء الموضوع ) الحين بعد ما اقنعتك بالدراسة في كندا ( انشاءالله انك اقتنعت:think) ، لازم تختار اي مدينه ودك تدرس فيها. طبعاً انساء المقاطعات الشرقيه لانهم كلهم يتكلمون فرنسي ( ما عدا مقاطعة نوفا سكوشا ، بس ترا اغلب سكان المقاطعه هذي من البيض و على طول بيدرون انك اجنبي) ، المقاطعات الوسطي من كندا و الشماليه الحقيقه ما انصح فيها لانك و بكل بساطه تبي تهج من البرد ( تخيل درجة الحراره تاصل الي ناقص 40 في الشتاء ، و اذا ما تعرف وش معنا ناقص 40 ، فعرف انها الدرجه اللي فيها اذانك تشقق من نفسها و يتجمد الدم قبل ما يطلع منها اذا ما دفيت اذانك و غطيتها). بما انك اكيد استثنيت شرق و وسط كندا معاد يبقا الا المقاطعات الغربيه المطله على المحيط الاطلسي ، مقاطعة يوكون في الشمال بارده بالحيل و تكون مغطيه بالثلج اغلب فترات السنة ، معاد يبقا الا مقاطعة برتش كلومبيا. مقاطعة برتش كلومبيا ماهي صغيره و تمتد بشكل عمودي من الشمال الي الجنوب ، المدن الموجوده في الشمال قريبه من القطب الشمالي يعني اكيد بارده ، معاد يبقا الا الجزء الجنوبي في المقاطعه ، و بما ان اكبر مدينه في المقاطعه هي مدينة فانكوفير و هي موجوده في الجنوب فمالك الا هي. شفت وشلو انت الحين اقتنعت بمدينة فانكوفير ( انا كان ممكن اقولك فانكوفير على طول بس بغيتك تقتنع اول:su)). الحين بعد ما انت اخترت فانكوفير خلني اعطيك بعض المعلومات عنها: - هي ثاني اجمل مدينة في العالم بعد جنيف السويسرية.( هذا حسب كلام الكنديين ) - المدينه تقع على امتداد جبال الروكي الامريكية ، عشان كذا اجزاء كبيره منها جبلية. - عدد سكان المدينة في الوقت الحالي في حدود 2 مليون. - عدد سكان المدينه يزيد سنوياً بما مقداره 20000 نسمه ( يعني الحق عليها قبل ما تزدحم ولا تلقالك ماطا قدم ). - تعد المدينه ثالث اكبر مدينه من حيث عدد السكان في كندا بعد مونتريال و تورانتو. - المدينه فيها ثاني اكبر جاليه صينيه في امريكا الشماليه ( يعني حدود 300000 الف صيني). - عدد سكان المدينه من العرق الهندي في حدود 60000. - عدد سكان المدينه من العرق الياباني في حدود 30000. - و باقي السكان موزعين بين بيض من اوربا الغربية و الشرقيه ، ايران ، دول عربية و القليل من الاعراق الثانية. و اخيراً وليس اخراً انصحك ما تروح الها لاني خايف انها تسحرك بجمالها ولعاد ترجع لديرتك و يدعون على اهلك. تكلفة الدراسه و المعيشة في فانكوفير: حسب معلومات الماخوذه من المواقع الرسمية للمدينة ، يقولون ان تكلفة الدراسه عندهم لمدة 6 اشهر ما بين 4000 و 15000 دولار حسب نوع الدراسة اللي انت تبحث عنها ( اللغة الانجليزيه بتكلف حدود 8000 دولار). المعيشه حسب مصادر المدينة بتكلف لمدة 6 اشهر مل بين 2500 و 17000 دولار ( فرق السعر يكمن في نوع السكن و موقع السكن ، بالاضافه لاي نوع من الناس انت في الصرف). انت تقول انك من النوع الصريف ، عشان كذا اتوقع انك تصرف حدود 100 الي 150 دولار في اليوم ( هذا ما يشمل السكن و السياره ). ممكن تستفيد من بعض المعلومات المذكوره في المشاركه السابقه. بالنسبه للمعهد اللي انت ذكرته (The Canadian Collage) انا الحقيقه ما اعرفه ، ولا لقيت اي معلومات عنه على الانترنت ، اذا انت متاكد من الاسم انا ممكن ابحث عنه زياده و يمكن القاء معلومات عنه. و اذا انت تبيني ادور لك على بعض المعاهد و الجامعات اللي تدرس انجليزي ، تراني في الخدمه. قبل ما انساء اذا تبي زود معلومات عن مدينة فانكوفير ، سير على الموضوع اللي انا قاعد اكتبه عنها ( اشتقت لكي يا فانكوفير). لك اجمل تحية. [line] اقتباس:
الجواب على الاستفسار السابق: هذي مجموعة من المعاهد و مواقهم على الانترنت ، ارجو ان تكون ذو فايده. معهد اكسيس للغات معهد اي ال سي للغات معهد ال اس اي للغات معهد بي ال اي للغات جامعة كوينز جامعة ويسترن تاون طبعاً هذي مجموعة بسيطة من المعاهد و الجامعات و فيه الكثير غيرهم. و اذا محتاج المزيد من المعلومات او المساعده بالاتصال بالمعاهد او الجامعات هذي ، انا في الخدمة. لك اجمل تحية. [line] اقتباس:
الجواب على الاستفسار السابق: والله ما ودي اكسر مجاديفك و احطم حلمك بكلامي ، لكن انت سألت ونا بجاوبك. طبعاً كلامي بيكون مبني على 15000 ريال لمدة 3 اشهر ، اذا كان هذا صحيح بيكون معك فقط 5000 دولار كندي ، خلني اعطيك اسعار الدراسة في مونتريال و انت احكم. 1 ) الدراسة لمدة 12 اسبوع ( 25 ساعة في الاسبوع ) = 2800 دولار كندي ( 8400 ريال ). 2 ) السكن مع عائلة كندية مع الفطور و الغداء و العشاء لمدة 12 اسبوع = 2300 دولار كندي ( 6900 ريال ). بكذا تكون فلوسك خلصت ولا بقاء معك فلوس للكتب و المواد الدراسية و المواصلات ، و اكيد انك تبي تمشاء و تروح و تجي. كان والله ودي افيدك اكثر لكن زي منت شايف الفلوس اللي معك ما تكفي. ولا تفكر في فانكوفير لانها اغلى من تورانتو. اذا تبي رائي الشخصي ، رح و ادرس لمدة 4 اسابيع فقط و انشاءالله فلوسك تكفي. و بتكون التكلفة لمدة 4 اسابيع كماء يلي : 1 ) الدراسة لمدة 4 اسابيع ( 25 ساعة في الاسبوع ) = 975 دولار كندي ( 2925 ريال ). 2 ) السكن مع عائلة كندية مع الفطور و الغداء و العشاء لمدة 4 اسابيع = 2300 دولار كندي ( 2340 ريال ). 3 ) الكتب و المواد الدراسية 200 دولار كندي ( 600 ريال ). 4 ) المواصلات العامة 50 دولار كندي ( 150 ريال ). يصير المجموع 6015 ريال ، يعني يبقاء معك 9000 ريال ، مبلغ حلو و ممتاز و بتدرس و تبسط في اونتاريو. انت اكيد في 4 اسابيع او حتي 12 اسبوع منت متعلم انجليزي زين ولكن 4 اسابيع بتعطيك بعض الاساسيات و بتتعلم الكثير عن السفر و الدراسة في الخارج. و اذا جاز لك الموضوع حاول تجمع مبلغ اكبر و ارجع كمل دراسة الانجليزي. لك اجمل تحية. [line] اقتباس:
الجواب على الاستفسار السابق: الحقيقة انا المعهد هذا ما اعرفه ، ولكن من المعلومات الموجوده في موقع المعهد يبدو انه معهد كويس. ولكن اعتقد ان افضل مكان لدراسة اللغة الانجليزيه هي في المناطق اللي يتحدث اهلها اللغة الانجليزية. مدينة ( اوتوا ) هي عاصمة كندا و تقع في مقاطعة كيوبك ، مقاطعة كيوبك عندهم اللغة الرسمية الاولي اللغة الفرنسية. و انت لازم تحط في بالك ان دراسة اللغة الانجليزية لوحدها ما تفيدك انما الفايده الكبرا هي في الاختلاط بمن يتحدث هذه اللغة و الاستفاده منهم. يعني لو الموضوع هو فقط الدراسة في معاهد كان تدرس في معهد في ديرتك ارخص لك و اقرب لك من اهلك. انا اخاف تروح اوتوا و ترجع تتكلم فرنسي بدل من انجليزي. بالاضلفة انه حسب اسعار المعهد هذا ، السعر هو تقريباً نفس سعر معاهد اونتاريو. اذا تبي الرخص حاول تبحث عن المعاهد الموجوده في مقاطعة البرتا ( ALBERTA ) و بالذات في مدينة ادمنتن ( EDMONTON) ، لان المقاطعة هذي ما عندهم ضرايب ، لكن لا تتوقع انهم يكونون ارخص بكثير. و اذا عندك اي استفسارات اضافية ، انا في الخدمة. لك اجمل تحية [line] اقتباس:
الجواب على الاستفسار السابق: انا ما حطيت الموضوع هذا الا عشان اتشرف بخدمتك انت و باقي الاعضاء بلي اقدر علية . هل افهم من كلامك انك موافق على الدراسة لمدة 4 اسابيع فقط ، اذا كان صحيح و انت ناوي تروح بعد رمضان انا افضل انك تدرس في مدينة فانكوفير لان الجو فيها بيكون اقل بروده من باقي اجزاء كندا. و صدقني باقي اجزاء كندا البرد عندهم ما ينلعب معه. رد على عشان اقدر ابدا ادور لك على المعهد المناسب. لك اجمل تحية [line] اقتباس:
الجواب على الاستفسار السابق: لو ممكن تقول للي اخوك وش ناوي يدرس ممكن افيدكم اكثر. بالنسبة للتسجيل موضوعه سهل ، بس حددو للي التخصص و الباقي يتيسر. لك اجمل تحية. [line] اقتباس:
الرد على الاستفسار السابق: ا نا بعد ما قراءت مشاركتك ، دخلت على موقع الهجره و الجوازات البريطانية و كانت النعلومات اللي فيه كما يلي: - اذا انت مسافر ترانزيت ولا انت طالع من المطار ما تحتاج فيزا. - اذا رحلتك ترانزيت و بتطلع من المطار لمده تقل عن 24 ساعة ، ما تحتاج تاشيره. اما سالفة انك لازم تقعد في لندن يوم قبل مواصلة الرحله ، فهذا يعتمد على اي ايام الاسبوع اللي انت مسافر فيها ، لانه من فانكوفير الي لندن فيه رحلتين يومياً و لكن من لندن للرياض ما فيه الا ثلاث رحلات اسبوعياً ، انت اطلع من فانكوفير في اليوم اللي يسبق موعد رحلة لندن للرياض ( يعني اذا الرحلة من لندن للرياض يوم الخميس ، اطلع من فانكوفير يوم الاربعاء). الا اذا كانت الخطوط البريطانية غيرت جدول رحلاتها ، فهاذا شي ماني متاكد منه. ممكن انك تطلع من الرياض على الخطوط السعودية و من لندن تطلع على الخطوط البريطانية او الكندية ، و انشاءالله ما تنتضر يوم في لندن. مدة الرحلة من الرياض الي لندن حوالي 6 ساعات ، و من لندن الي فانكوفير 9 ساعات. انا على كثر سفراتي لكندا ما عمره صار للي مشكله او تم معاملتي بطريقة شينه ، مع العلم باني سافرت الي فانكوفير مرتين بعد احداث 11 سبتمبر. لك اجمل تحية. [line] اقتباس:
الرد على الاستفسار السابق: اول شي لازم ينحط في الاعتبار قبل التفكير في دراسة اي تخصص في بلد اجنبي هو مدا المام الدارس بلغة البلد اللب هو ناوي يدرس فية ، من هذا المنطلق لازم اسألك عن مستواء اللغة الانجليزية لخوكي ، لازم تعرفين انه كل جامهة سواً في امريكا او كندا تطلب درجة معينة في التوفا على حسب التخصص المراد دراستة. انا الا و افضل انكم تبدون بالخطوه الاولي الا وهي ارسال اخوكي لدراسة اللغة الانجليزية ( هذا اذا كانت لغتة ضعيفة ) و الرفع من مستواء اللغة عنده حتي يتمكن من الحصول على مالا يقل عن 500 نقطة في اختبار التوفل. بعد ما يعدي المرحلة هذي و يصير بلبل في اللغة الانجليزية و يجيب شهادات من امريكا او كندا تفيد بانه اخذ دورات لغة انجليزية و انه حاصل على ما يزيد عن 500 نقطة في اختبار التوفل ، يقدر يكمل دراسته الجامعية على كيفة في اي تخصص سواً في بلده او في اي بلاد خارجية ، و بمشيةالله يقدر يحط في بطنة بطيخة صيفي لانه بلغتة الانجليزية الممتازه و بشهادتة الجامعية ( اياً كان التخصص ) بيحصل وظيفة زينة. اما عن التخصصات التي ارا بان مستقبلها انشاءالله زين ، انا بالقياس على السعودية و بمتابعتي للتطورات الاقتصادية الانمائة اللي قاعده تصير ، انا اقول و بكل ثقة ان الفلوس الواجده بتكون في المجالات البنكية ( اقتصاد ، محاسبة ، تجاره ) بالاضافة الي التأمين. لكي اجمل تحية. [line] اقتباس:
الرد على الاستفسار السابق: خلني انا وياك نحسبها و نشوف كم تصير التكلفة لو انت درسة في مقاطعة البرتا الكندية ( المفروض المقاطعة هذي هي الارخص في كندا لان ما عندهم ضرايب) : الدراسة لمدة 4 اسابيع ( 25 ساعة في الاسبوع ) مع السكن في منزل عائلة كندية و مع الاكل و الشرب = 5000 - 6000 ريال. تذكرة الطيران حدود 4000 ريال. المجموع 10000 ريال. يعني اللي بيبقاء معك فقط 2000 ريال. اعتذر منك اخوي تركي لكن اعتقد فلوسك ماهي كافية عشان تدرس في كندا او امريكا. لك اجمل تحية. [line] اقتباس:
الجواب على الاستفسار السابق: بناً على طلباتك ( في مدينة فانكوفير ) ، اقترح عليك المعهد التالي ( مع الاخذ في الاعتبار الميزتنية المتوفره عندك ) : جامعة YMCA الدولية. و بتكون تكلفة الدراسة و السكن لمدة 8 اسابيع و 24 ساعة قي الاسبوع كما يلي: -) تكلفة الدراسة 5700 ريال. -) السكن مع عايلة كندية مع ثلاث وجبات في اليوم بسعر 2160 في الشهر ، يضاف الي المبلغ هذي 660 ريال عند تقديم الطلب و لمره واحده. المجموع 8520 ريال سعودي. طبعاً يتبقاء عليك مصاريف المواصلات و المصاريف الشخصية. و هذا رابط المعهد : YMCA انا ما اقدر اقولك المعهد كويس او مهوب كويس ، بس اللي انا اعرفه ان الجهه الحكومية المشرفة على التعليم في فانكوفير عندهم مقياس محدد للجهات التعليمية لازم يتقيدون فية ، و المقياس هذا هو من الافضل في العالم. اذا ناسبك المعهد هذا رد على بمشاركة عشان اقولك وشلون تسجل و تحصل على الفيزا. و بالمناسبة اذا كنت ناوي تروح مباشره بعد رمضان ، يمكن هذا ما يحصل لان اجرات القبول في المهد و الحصول على التاشيره يمكن ياخذ اكثر من شهر. [line] اقتباس:
الجواب على الاستفسار السابق: فيما يخص الدراسة ودي لو تقدر تعطيني زيادة معلومات عشان اقدر افيدك اكثر: -) هل عندك حد معين للميزانية. -) وشلون لغتك الانجليزية الان. -) ترغب في السكن لوحدك او مع عائلة كندية. -) هل يهمك تتعلم اللغة الانجليزية على اصولها في الجامعات الكندية الحكومية ، مع العلم بان الدراسة عندهم صعبة ولكن جداً مفيده. بخصوص باقي اسئلتك: -) بعد العيد بيوافق نهائة الخريف و دخول الشتي ، بيكون الجو بارد و ممكن ينزل ثلج و لكن الجو مقبول بالمقارنة بباقي اجزء كندا. -) انا عن نفسي ما شفت من الشعب الكندي الا كل احترام و محبة. شعب ودود و بشوش ، من ناحية اللحية ما اعتقد ان فية مشكله خصوصاً ان المسلمين بعداد كبيره و اللحية تعود الكنديين شوفتها على المسلمبن و الهنود السيخ. -) اما انك ما تحب التمشيات ، انا اقول لك انك اول ما تشوف فانكوفير و جمالها تبي تموت في التمشيات. -) طريقة الدراسة تعتمد على نوع المعهد او الجامعة بالاضافة الي نوع الدورة اللي انت بتاخذها ، بالاضافه الي مستواك الحالي في اللغة. -) التكلفة تختلف على حسب المكان اللي بتدرس فية ، ولكن و بصفة عامه الدراسة مع السكن و المعيشة بتكلفك حدود 5000 ريال شهري. لك اجمل تحية. [line] اقتباس:
الجواب على الاستفسار السابق: انا اقترح عليك جامعة فانكوفير الشعبية (VCC ). هي الجامعة صعبة و لكن انا عن معرفة ادري انها هي الافضل و بتستفيد من الدراسة فيها. عطني شوي وقت ونا انشاءالله اعطيك التفاصبل. [line] اقتباس:
الجواب على الاستفسار السابق: طيب عشان نقدر نحدد مستوا اخوك خليه يدخل اختبار التوفل في المدينة اللي انتم موجودين فيها ، عشان اقدر احدد مستواه في اللغة ، و هل هو قادر انه يكمل دراستة الجامعيه في الوقت الحالي او لا. اذا تبغين زيادة معلومات عن طريقة الاختبار و مكانه اكتبي مشاركه. و فيه طريقه ثانيه ، وهي انه يمر على مكتبة جرير او اي مكتبة كبيره و يشتري له كتاب التحضير لاختبار التوفل ، بيكون مع الكتاب سي دي فيه اختبار تجريبي ، ممكن ياخذ الاختبار هذا و يعرف مستواه الحالي. لكي اجمل تحية. [line] اقتباس:
الجواب على الاستفسار السابق: بما انك طالب لغات ، تبي تعرف المعلومات المذكوره على الرابط التالي : جميع المعاهد و الجامعات التي تدرس اللغة الانجليزية في مقاطعة برتش كلومبيا الكندية. طبعاً فانكوفير تقع غي مقاطعة برتش كلومبيا. [line] و انا في انتضار اي استفسار من اعضاء منتدى الفطاحلة عن الدراسه و السياحه في كندا.
آخر تعديل ابو ياسر يوم 21-12-2005 في 01:00 PM.
|
|||||||||||||||||
![]() |
![]() |
رقم المشاركة : 2 | |||
|
|
|||
![]() |
![]() |
رقم المشاركة : 3 | |||
|
|
|||
![]() |
![]() |
رقم المشاركة : 4 | |||
|
وصلني الاستفسار التالي في احد المنتديات التي اشارك فيها: اقتباس:
الرد على الاستفسار:
اخي : الحقيقه انت ما استفسرت عن شي محدد ، يعني استفساراتك كانت عامه. اللي اقدر افيدك فيه هو ما يلي: 2) هذي بعض المعلومات عن مطاعم و اسواق فانكوفير و بعض المعلومات العامه: الاسواق في فانكوفير و المدن التبعه لها: سوق الميترو تاون (Metrotown) عنوان السوق ( 4700 Kingsway) في مدينة برنبي. ويقع في مدينة برنبي واللي هي تعتبر جزء من مدينة فانكوفير ، والسوق هذا يعتبر اكبر مجمع تجاري في فانكوفير و في مقاطعة برتش كلومبيا و يتكون من حوالي 460 محل ، يوم زرتة عام 1994 كان اسمه (سوق ميترو تاون و ايتون) كان سوق ايتون اللي كان جزء من ميترو تاون شاغل مساحه كبيره من السوق ولكن قبل كم سنه قفل و انتقل لم سوق ثاني في الداون تاون ، طبعاُ سوق الميترو تاون توسع و اضيف له مجمع ثاني اسمه (الميتروبليكس) ، الميتروبليكس هذا عباره عن حوالي 15 صالة سينما كبيره و مجمع العاب الكترونيه ( اركيد ) الاركيد يتكون من دورين و يوجد في داخله مطعم و كل لعبه الكترونيه تخطر على البال. بالاضافه للاركيد و صالات السينماء فيه مجموعه من المحلات من ضمنها واحد من اكبر محلات الادوات و الملابس الرياضيه. يقع على طرف السوق فندق الهولدي ان وهو فندق 3 نجوم و فندق الهيلتون قطع الشارع عن السوق وهو 4 نجوم. الي يحب يكون قريب من السوق يفضل انه يسكن في احد الفندقين هذي و بيحصل كل ما يحتاج له. يوجد في السوق كل ما يحتاج له الشخص ، فيه البنوك و المطاعم و السوبرماركت و كل انواع المحلات ، صدقوني لمن اقول ان الشخص يحتاج الي اكثر من ثلاثه ايام عشان يدور كل ارجاء السوق ، بس الله يعينكم على الضياع فيه لانه من كبره يضيع. سوق الباسفيك سينتر (Pacific Centre ): عنوان السوق : تقاطع شارع هو و جورجا في الداون تاون (Howe and West Gerogia). و يعتبر ثاني اكبر سوق في فانكوفير ، يتكون السوق من حوالي 200 محل موزعة على 3 ادوار ، افضل مافيه سوق ايتون الموجود على طرفه الشمالي ، سوق ايتون هذا عندهم ماركات ملابس خياليه ما تلقاها في اي سوق ثاني في فانكوفير.. مشكلة السوق هذا و اللي ضيق صدري هو عملية انك لازم تدفع فلوس مقابل استخدام مواقف السيارات. لكون السوق في الداون تاون جمبه مجموعه من الفنادق و الاسواق الاخري ، طبعاً اشهر فندق جمبه هو فندق الفور سيسونز. سوق اوكريج سنتر (Oakridge Centre ) عنوان السوق : 650 West 41st Ave فانكوفير. السوق يتكون من دورين و فيه حدود 150 محل ، السوق صغير مقارنه بالمترو تاون و الباسفيك سينتر ، لكن فيه شي ماهو في السوقين هذي ، فيه محلات مجهورات و تحف من البلور تاخذ العقل ، انا ما عمري شفت على كثر ما ادور اسواق المجوهرات شي زي اللي شفته في السوق هذا. يا ناس عندهم مجوهرات خيال ولا في الاحلام ، ولا تحف البلور و الزجاج يافيها تفنن ماهو في الدنيا هذي. و تعذروني لاني الحقيقه ما لقيت صور للسوق. طبعاً فانكوفير و المدن التابعه لها مليانه اسواق بس انا بصراحة ما جاز للي الا الاسواق الثلاثه هذي. بعض المطاعم في فانكوفير: -) مطعم جو فورتيز (Joe Fortes) وهو موجود في وسط المدينة (Downtown) ويقدم تشكيلة من الاكل البحري والايطالي وانواع المشويات. اكلهم رايييق. العنوان : عنوان المطعم: 777 Thurlow Street, Downtown Vancouver الموقع الالكتروني : مطعم جو فورتيز -) مطاعم ايرل (Earls Restaurant ) ويقدم تشكيلة واسعة من الماكولات الغربية. المطعم له عدة فروع في مدينة فانكوفير. الموقع الالكتروني : مطاعم ايرلز -) مطاعم ريد رابن (Red Roban) ، ويقدم تشكيلة واسعة من الماكولات الغربية وعنهم بطاطس مقلي واجنحة دجاج عجيبة. المطعم هذا له فرع عند سوق الميترو تاون. المطعم له عدة فروع في مدينة فانكوفير. -) مطاعم بوستون بيزا (Boston Pizza) ويقدم بيزا رايعة ومجموعة كبيرة من الماكولات الغربية. المطعم له عدة فروع في مدينة فانكوفير. وله فرع عند سوق الميترو تاون. -) مطاعم بوت هاوس (Boat House Restaurant ) ويقدم ماكولات بحرية متنوعة ورائعة. المطعم له عدة فروع في مدينة فانكوفير. الموقع الالكتروني: مطعم البوت هاوس -) مطعم نرفانا (Nirvana Restaurant ) ويقدم ماكولات هندية رائعة ولازم تجرب. عنوان المطعم:2313 Main Street at 7th Avenue الموقع الالكتروني : مطعم نرفانا -) مطعم الشلي كلب (Chilli Club) ويقدم ماكولات تالندية ممتازة وعنده كل يوم احد غدا بوفية مفتوح. المطعم موجود في وسط المدينة على شارع هورنبي وجمب البحر. -) مطعم مصنع المكرونة (The Old Spaghetti Factory ) مطعم اكلة ايضاً رائع من الاكل الايطالي والغربي. عنوان المطعم : في حي مدينة الغاز (Gastown) -) مطعم انتونز (Antonz) مطعم اكل ايطالي ، لا يفوتكم بقوة بس تاكدو انكم ما تاكلون اي شي في اليوم الي انتم ناوين تروحن لة فية لان اكلهم كثير وصعب انكم تخلصونه. عنوان المطعم: هو على شارع هيستنق الشرقي (Est. Hasting) في مدينة برنبي ، ما اذكر عنوانه بالضبط لاكن ممكن تاخذ العنوان من دليل التلفون. طبعاً فانكوفير كلها مطاعم من كل شكل ولون. وفية خدمة اسمها تيكاوت تاكسي (Takeout takes) وهم عبارة عن شركة توصل لك الاكل من اغلب مطاعم فانكوفير الي مكان سكنكم . وتراهم ممتازين وعرفهم زين لاني اشتغلت عندهم. انا من محبي الاكل الصيني والياباني واذا تحبون عطيتكم اسامي وعناوين مجموعة منها. بعض المعلومات العامه عن فانكوفير: -) اذا الواحد حب يستاجر سيارة لازم ياخذ معها تامين شامل على السيارة وليس فقط تامين ضد الغير لانه لو لا قدر الله وحصل حادث التامين ضد الغير بيغطي فقط اضرار السيارة الثانية ونت بتدفع اضرار السياره الي معك. -) السياره ما تقدر تستاجرها الا ببطاقة ائتمان (فيزا ، ماستر كارد و ما شابة ذلك). -)اذا استاجرت السياره بستخدام بطاقة ائتمان ذهبية ممكن يعفيك المحل الي تستاجر من السياره من دفع قيمة التامين اليومي على السياره ، وهذا طبعاً يعتمد على مصدر البطاقة. -) خريطة مدينة فانكوفير الي على شكل كتاب صغير ممتازه ولا يمكن تضيع اذا كنت تعرف تقراها بشكل صحيح. -)اغلب شوارع فانكوفير لازم تدفع فلوس مقابل الوقوف فيها. وسعر الوقوف يختلف من شارع الي اخر. -) ما بين الساعة 6 الي 9 الصباح و ما بين الساعة 3 الي 6 بعد الظهر يكون وقوف السيارات ممنوع في اغلب الشوارع و بالذات في وسط المدينة حتي لو كنت دافع فلوس مقابل الوقوف ، واذا نسيت توخر سيارتك من الطريق الي فية الوقوف ممنوع في الاوقات هذي الله يعينك على المخالفة والله يعينك تروح لم الشركة الي سحبت سيارتك و تدفع لهم قيمة السحب. في مواقف السيارات الجانبية الي ما تكون على الطرق الرئسية يمنع الوقوف فيها بعد الساعة 12 باليل الي الساعة 6 الصباح. -) قبل ما توقف سيارتك في اي مكان اقراء اللوحات وتاكد انه ممكن توقف سيارتك و الاوقات الي ممكن توقف فيها. -) في وسط المدينة من الصعب جداً انك تحصل موقف للسياره و اذا حصلت موقف فهو في العاده غالي. -) ممكن الواحد يستخدم وسايل المواصلات العامة مثل الباص و و القطارات الكهربائية الي تمشي فوق جسور خاصة على ارتفاع حوالي 8 متر من الارض. -) اذا استخدمت الباص قيمة المشوار تعتمد على المسافه الي انت ناوي تقطعها ، اقل مشوار قيمتة دولار ونصف ، و اول ما تركب الباص فية صندوق جمب السواق تحط الفلوس فيها ، و لا تتوقع السواق يصرف لك اذا ما معك فكة مناسبة. -) ذا استخدمت القطار الكهربائي لازم تشتري لك تذكرة من مكاين موجودة عند كل موقف للقطار ، وعرف انه ما فيه على القطار شخص ثابت يفتش على التذاكر ، يعني ممكن تكمل مشوارك واكثر من مشوار مندون ما يسالك احد عن تذكرة ، وممكن في اول مشوار يجيك واحد لابس ملابس شركة القطار ويسالك عن التذكرة واذا ما معك تذكرة او التذكرة الي معك ما تغطي المشوار الي انت قاطعة الله يعينك بتاخذ مخالفة و ممكن يودونك للشرطة. -) اذا اكلت في مطعم او ما شابة ذلك يكون من الافضل انك تعطي بخشيش في حدود 5% من قيمة الفاتورة. -) عندما يكون معك سيارة لازم تعرف ان الدوران للخلف بالسيارة ممنوع منع بات واذا ديورت ممكن تاخذ مخالفة ، اذا احتجت تديور ادخل احد الحارات وديور ورجع للخط الي انت تبية. -) اذا معك سيارة و وصلت الي تقاطع رائسي او فرعي ولا فية اشارة فعرف ان اول واحد يوصل للتقاطع هو اول واحد يعدي التقاطع. -) اذا معك سيارة وتمشي في خط مكون من اكثر من مسار وفجاة واحد من المسارات كان مسدود وحبيت تغير مسارك بعد ما توقف فعرف ان السيارات تبي توقف لك عشان تعدي ونت لازم تسوي زيهم. -) اذا كانت اسنانك ماهي مضبوطة وتبي علاج عالجها في ديرتك لان عيادات الاسنان عندهم غالية جداً. -) اذا تتعاطي علاج معين خذ معك الي يكفيك من بلدك لان العلاج عندهم لازم بوصفت طبيب. -) اذا انت تدخن خذ معك الي يكفيك من الدخان لان الدخان الي عندهم ما هو نفسة الي في بلدك وتبي تشوف دخان غريب اول مرة تشوفة و نسبة النكوتين فية منخفضة جداً. -) اذا جيت تشتري دخان اعرف انهم بيطلبون منك اثباتك الي يوضح فية عمرك. -) اذا اخذت معك دخان كثير من بلدك اعرف انهم بياخذون منك ضريبة على الدخان هذا. -) اذا جاك واحد في الشارع وطلب منك زقاره لا تعطية الا اذا انت متاكد انه فوق 18 سنة ولا ممكن تحاكم اذا مسكوك. -) اعرف ان اغلب الهامبرغر عندهم ما يكون لحم بقر صافي و يكون مخلوط مع لحم خنزير. -) اعرف ان البيتزا عندهم يكون فيها لحم خنزير اذا كان فيها ببيروني او سجق بالاضافة طبعاً للهام او البيكون. -) اعرف ان البطاطس الشبس عندهم اغلبها فيها مشتقات من الخنزير. -) اعرف ان اقصي سرعة عندهم في شوارعهم هي 50 كم في الساعة ، و اذا تعديت السرعة هذي بتاخذ مخالفة وقيمة المخالفة تعتمد على سرعتك عندما يصيدونك. -) اعرف ان اقصي سرعة للسيارة في المناطق الي تكون حول المدارس هي 30 كم في الساعة اوقات الدراسة الرسمية. 3) المعهد اللي انت تتكلم عنه موجود في منطقة وسط المدينه (الداون تاون) على شارع بورارد ، المنطقه زحمة شوي و لكن هذا طبع كل وسط مدينه ، و الحقيقه ما عندي معلومات عنه. الرابط التالي هو لصوره حيه و على الهواء مباشره لجسر بورارد في اتجاه وسط المدينة (الداون تاون) ، في نهائية الشارع بتلقاء المعهد حقك. الصوره هذي يتم تحديثها كل 15 دقيقه الين تضلم الدنيا ، فرق التوقيت بين السعودية و فانكوفير هو 11- ، يعني الساعة هندهم الان 8:45 في الصباح. صوره مباشره من فانكوفير. 4) الجو في فانكوفير و الي السته ايام القادمه جميل و درجة الحراره في حدود 12 درجة مئوية و امطار كثيفة ، بس لا تخوفك الامطار ، فانكوفير دايم فيها مطر. و هذا رابط يوضح لك درجة الحراره في فانكوفير لمدة 6 ايام قادمه و يتم تحديثه كا ساعة: الطقس في فانكوفير لا تشيل هم السفر الي فانكوفير ، انا متاكد انك بترتاح فيها و بتنهبل على جمالها، يمكن تتضايق في البدايه الين تتعرف لك على بعض الاصدقاء ، بس انشاءالله بعد كذا بتسلك معك الامور. اتمناء لك التوفيق في دراستك ، و اذا عندك اي استفسارات الان او لين وصلت فانكوفير اكتبها للي في الموضوع هذا و انا ارد عليك و افيدك بلي اقدر عليه. لك اجمل تحية. |
|||
![]() |
![]() |
رقم المشاركة : 5 | |||
|
|
|||
![]() |
![]() |
رقم المشاركة : 6 | |||
|
|
|||
![]() |
![]() |
رقم المشاركة : 7 | |||
|
|
|||
![]() |
![]() |
رقم المشاركة : 8 | ||||||||
|
اخي : فاقد قلبة
اقتباس:
الدراسة في الخارج و انا افضل انك تروح عن طريق المكاتب المعتمدة لانهم خبراء في الشي هذا و ممكن يسهلون لك الامور ، المكتب المذكور فوق ( الرحلات الذهبية) على سبيل المثال يضبطون لك الحجوزات مع المعهد و يضبطون لك السكن و حتي انهم يقدمون لك على تاشيرة الدراسة. اقتباس:
اما اذا كنت فوق 24 فالمفروض انك عاقل ولا انت غاثهم ( طبعاً هم ما يعرفون السعوديين ولا كان رفعو العمر الي 50). و بالمناسبة ماهو كل المساكن يفرقون في السعر حسب العمر ، الشي هذا يختلف من معهد الي معهد و من سكن الي سكن. اقتباس:
طبعاً سكنك مع العائلة يخضعو لشروط عديدة و تختلف من عائلة الي عائلة ، بس انت خلك حبيب معهم و صادق العجوز و امورك كلها تيسر. اقتباس:
التاشيرة السياحية الي كندا تكون في العادة لمدة 6 اشهر و ممكن تدرس في كندا بالتاشيرة هذي بشرط انك ما تتجاوز دراستك المدة هذي. اما اذا اخذت تاشيرة دراسة و محطت بهم اذا وصلت ، ما عندك مشكلة لانهم ما يدرون عنك ، حتي انك اذا رجعت لم ديرتك بعد ما تنتهي تاشيرتك ماهم دارين عنك لان مافية مرور على الجوازات عند مغادرة كندا. طبعاً بالاختلاط ممكن انك تتعلم انجليزي ، بس الافضل دايم يكون عن طريق المعاهد لانك ممكن اذا تعلمت انجليزي من الشارع تكون مصاحب هنود او صينيين و تتعلم منهم اللغة بطريقة خاطية. اقتباس:
في فانكوفير معهد ممتاز اسمة معهد برتش كلومبيا للتكنلوجيا و يعطي دبلومات ممتازة بس تراه صعب ، حتي انت الضاهر ممكن تدرس عندهم انجليزي. اقتباس:
بالنسبة لي (6900) دولار لمدة 12 اسبوع هذي مندون تكاليف المعهد. و السعر من احد المعاهد. 4 اسابيع بمبلغ 5000 الي 6000 دولار ، هذي مع السكن و المبلغ تقريبي فقط. 8 اسابع سكن فقط بدون دراسة ، و هذا سعر احد المعاهد. 4 اسابيع سكن فقط ، و هذا سعر احد المعاهد. حط في بالك ان سعر السكن يختلف من معهد الي اخر حسب موقع المعهد و السكن التابع له ، و حط في بالك ان السكن انواع ، ممكن تكون بالحالك في الغرفة و ممكن يكون معك احد ، ممكن تكون لك دورة مياة خاصة و ممكن تكون مشتركة ، و ممكن يكون لك تلفزيون خاص او ممكن يكون مشترك مع العائلة. ارجو انك تكون استفدت من اجاباتي. و اذا عندك زود استفسارات انا جاهز. لك اجمل تحية. |
||||||||
![]() |
![]() |
رقم المشاركة : 9 | ||||||||||
|
|
||||||||||
![]() |
![]() |
رقم المشاركة : 10 | |||
|
|
|||
![]() |
![]() |
مواقع النشر (المفضلة) |
الذين يشاهدون محتوى الموضوع الآن : 16 ( الأعضاء 0 والزوار 16) | |
|
|