شفت لي عودن (رباعيه )

[نجم الإبداع]

السلام عليكم
هذه المحاوره جرت مساء السبت
في ضيافة الطائر
على شرف بن عمار والطامي وانا
امل لكم المتعه

(الطائر)شفت لي عودٍ لبس له درابيل= طاح قدامي ونا امشي وراه
قلت له وش بك توقع لاتميل=قال شوفي راح مدري وش بلاه
(فلاح)الوكاد انه هو العود القبيل = ينتظر واحد وجالس في حراه
مالقى السياره ولا جاه ايميل= او يكون بياع للساري عشاه
(الطائر)ذاك ابن عمار ضيع للدليل= مرتين ينشر ابيات حداه
خرف الماخوذ مخه صار هيل=انطحن ماعاد ينفع لو بغاه
(فلاح)ولعي يانار في راس الفتيل=وشبْ بعض الناس ورانا قفاه
واجه الطامي بساعات الرحيل=يوم هو ساري من الدره عطاه
(الطائر)فيك شيطانٍ على حمل الثقيل=يوجهك للشر في كل اتجاه
قاتلٍ يمشي بجنازات القتيل=والزمن دوار من بدء الحياه
ارجع لربك وصحح كل ميل= تضمن العيشه لفجرك والغداه
(فلاح)ماحسبنا للقصيّر والطويل=وابصر الطامي معه بيده عصاه
الله الستار هذا مستحيل =صاح من رميه صغيره بالحصاه
(الطائر)ثالثة رجليه والرابع فتيل= انتهى دوره وتايه في الفلاه
(فلاح)وش حصل ياعود كنك بردويل = لاتسوق الويل من شان الوشاه
(الطائر)مزح في مزح على الدرب الطويل= احسبه مثل اولا ما به عناه
(فلاح)اعرف الطامي ومثله لي عميل=وافي المكيال يعجب من لقاه
(الطائر)نتركه ونبحر بخليج الدردنيل=وان بغينا الصين نمشي في رجاه
دام طلع كرت اصفر يالهبيل=لاتحرك ساكن ضد او معاه
(فلاح)انت يالطائر شبيه الجنزبيل = او بعير بالخلاء نسمع رغاه
او كانك شيخ جيرانك عجيل = يوم يفتي يقرب الشيشه وياه
(محمد)حسبكم ربي هو النعم الوكيل = مابقي لي غير ثوبي والعباة
(فلاح)جاك بن عمار كنه شرشبيل= شايلن سيفه ويطربني غناه
(الطائر)ذاك ابن عمار جاله عز رائيل=لو تشهد باصبعه وإلا الشفاه
(فلاح)بدل الكيبور يالعود العليل= بنت بقعاء جات تسعى بالرحاه
(الطائر)بنت بقعاء خالتي وانا الحليل=وانت محد جاك ياقرد السراه
(فلاح) كل ماقدمت لك بنن وهيل = جبت لي جيفه وصقعه بالقفاه
(الطائر) راح اخضك مثلما خض الصميل= كان بك زبده ابعطيها القطاه
غاوي تصقع على ظهر وذيل= عادة لك ويش اسوى بك تهقاه
(فلاح) انت ماترحم ولا عندك خليل=كل من جا لك نسى عندك لهاه
تضحك بسنك ومن كفك كويل = يحرق الماشي ويرهب من صداه
(محمد) وانت يهالعود اهجد لا تعيل = لاتحملني ذنوبك والطغاة
مشعل ٍ النار قي راس الفتيل = وكل من مرك تقفاه بحصاة
(فلاح) يشرد الناظر يحسْب انك غويل =شوف من عمار جالك من عماه
(محمد) تعطي الاصحاب من كف ٍ بخيل = وتنطوى كالداب الا احد ٍ رآه
(الطائر) ربك الرحمن ما يرحم بخيل=يمهله حتى بيوم يلقى جزاه
والكرم طبعي بدربي والسبيل=مر ضحك ومزح ما تعرف مداه
(فلاح) ماحسبنا لاكثير ولا قليل= كل عصريه على هذي النحاه
(محمد) والنعم بك عود من هاك السليل = كل منا عارفن وش مبتغاه
(فلاح) يوم نمدحنا ويومين ارخبيل=ماذبحنا حد ولا شلنا حباه
(محمد) مرحبا منصور يالظل الظليل = لربعك اللي ينتخونك في الحياة
(فلاح) شفت بن عمار شايل منك شيل = يذكر الفاني ويكثر من دعاه
(الطائر)مابغيت انصاك يالعود الضليل=احسبك في الفي تحلب للشياه
ودام تبغى الشر اسقيك المهيل=مير جنب عن دروبٍ للعصاه
(منصور) ياهلا بك والمعاني بالذبيل = زينها زينٍ يزيد بنا حياه
(الطائر) لايغرك من يحرك فيك ميل=يضحك بعلباك ماتدري النواه
لابس الثوب الحمر حيله قليل= ما تجمل نوشة السوط برداه
(محمد) عودن اقشر مثل شكلك مستحيل = كنك الجني على راس الوطاة
(فلاح) احمد الله عايشن بارض الجبيل = لوّني في نجد كنت احدى الطغاه
مانبيها اخلاص هاتو لي الهليل= هلها ياعود لاجاك الفراه
(منصور) عود الطايريولع بالفتيل = مادرى اني جاهز واسحن ادواه
(محمد) مادرينا عنك يالعود الذليل = تحتمي باللي ينقلّلك الوصاة
(الطائر) ماتحمل رمي لو تلبس ثقيل=ماخبرتك غير عير في الفلاه
(منصور) لاسنون ولاعيون ولا حصيل = ولاش صحه تورده جم المياه
(الطائر) جز يابن عمار شوري لاتعيل=خابرك تدري الأصول ومبتغاه
(فلاح) شل حمولك واحتزم لي ياشهيل = مايشيل الحمل غير اهل الضراه
(الطائر) خلني ويا الحمر محتاج كيل= وبعده المنشار انشر في قفاه
(محمد) ماخبرينا في مزارعكم مسيل = غير عرصة ما تغطيها المياه
(منصور) شايب مهبول من هاك الرعيل = اقفت اسنينه وهو وصل مراه
(الطائر) ع الأقل ما ضعت مثلك في السبيل= يوم تسرق معتمر تاخذ حذاه
(فلاح) لاتسب العود يالطامي سهيل = خلها ياصاحبي بين الرماه
(منصور) قام يفحط وسط شاته كالهبيل = باغي المسمار لاحتمت اللضاه
انت ابن منشار ماتشوف النزيل = نمنعه ثم ننذره يزحف وراه
(فلاح) وان بغيت العود رح للدردنيل = لاتجي درب القوافل والغناه
(منصور) مير ماوده ايخليها قليل = لين نرثع به ويظهر للرداه
كنه اللي يحك حلقه للقبيل = باقي السكين تلغط باورداه
(فلاح) غطرف الطامي وصوته به صهيل = كنه الجانبو يحلّق في سماه
(الطائر) خايف ربي وانا الشيخ الجليل= مضيع وقتي بصوم او صلاه
وانت دجال طابور وعميل=من تبع شوره بنيرانه شواه
(منصور) وهذا بن عمار مايحتاج نيل = دون روحه فارس ماحد معاه
(فلاح) لاقريت الفاتحه وقيام ليل = لاتجي درب المغازل والجفاه
(الطائر) ساحر مسحور مشقوق الصميل=ليت ابن منشار يسعفك بدواه
(محمد) كلما عدلت هالشايب يميل = ضارين مشين قديمن قد مشاه
(منصور) ودامها بين الجماعه جت هليل = خلها تهتل وتبرق في سلاه
(فلاح) لاتلوم الي تولع بالجديل = كل شي خله ولا تكشف غطاه

السبت 12/2/1430 هـــ

[رفيعة الشان]

كل شي خله ولا تكشف غطاااااه

رااائعه يا شعرااائنا الافاضل
وصح الله السنتكم جميـــعاً


ولاااهنتوا

[زهرة اللوتس]

صح الله السنتكم
ولاهنتم
محاورة ممتعة
سلمتم ودمتم
ولكم مني اطيب تحية

[الطامي]

صح السنتكم
ولاهنتو جميلة جدا
شكرا فلاح على النقل المميز
لاهنت

[داعي الشوق]

صح لسانك يا فلاح

وصح لسان الطامي

وصح لسانك الطائر

محاورة جميلة وممتعة

لله دركم

تحيتي لكم مع التقدير
،،،،،،،،،،،،،،،،

[همس الورد]

صحت السنتكم

رووووووووووعه

[الهميم]

كتبت فأمتعت
شكراً لك
تحياتي

[المورد]

مشكور
على المعلومه الجيده
تحياتي

[المؤذن]

مشكور
على ما افدتنا به
تحياتي

[الهامس]

جزاك الله خيراً
على ما افدتنا به
ودي واحترامي