وهذي غنـوج لااقبلـت جـت تمايـل

[ابو أنس]

هذه قصيدة كتبتها تجاوباً مع تأوهات محب فقد محبوبته
واسودت الدنيا في وجهه ـ كما يقول ـ فقلت مواسياً مع سابق علمي ان المحب
لايرى في غير محبوبه الحق في ان ينظر إليه فضلا عن ان ينصرف إليه
ولكنها مشاركة وجدانيه

يالطيب اصـبـر ياعساهاتـفـرّج= تلقى لهـا بعـد المضيقـات مخـرج
بالـك تكثـر فـي شروطـك تحجـج= الزيـن فـي كـل البنـي الغنـاديـر
هـذي بهـا عقـل وثقـل ومـيـزي =تعـز كـل اللـي بقلبـك عـزيـزي
مـا مدتـه يمنـاك يكفـي ويـيـزي= مـا تلحقـك فـي دنيتـك للمعاسيـر
وهـذي بهـا ديـنٍ تحكـم بممشـاه =تـذكـرك بالله تخـافـه وتخـشـاه
تحفظـك بالغيبـه وتفـرح بلقـيـاه= وتربي أولادك علـى الحـق والخيـر
وهذي بشوش ميزتـه ضحـك سنـه=تحـس بالغربـه اذا ابعـدت عـنّـه
لا جيتهـا هلّـت ولا فـيـه مـنّـه=ما تنقـص الواجـب ولافيـه تقصيـر
وهذي غنـوج لااقبلـت جـت تمايـل = تلعـب بشعـر جمّلـتـه الجـدايـل
وفي عينهـا غمـزه ونظـرة تحايـل = وفي صوتهـا بحـه تحـل المساميـر
وهذيك هـي بنـت الرجـال الأصيلـه=ما ضعت يـوم انـك تبعـت الدليلـه
ودروبهـا يـم الخـنـا مستحيـلـه = هـي نخوةآهلهـا القـروم المناعيـر
وهذي مثل شمس الأصيل بضحى صيف= مـن شافهـا يجـي بقلبـه تراجيـف
يعـاف لذاتـه ويغفـل عـن الكيـف= يقضـي نهاره في هواجـس وتفكـيـر
وهـذي مميليحـه بهـا خفـة الـدم = لو طاولـت فـي هرجهـا مـا تنـدم
تسلب قلـوب النـاس وهـيه تبسـم=حلوة حديثٍ لو بهـا شـوي تكسيـر
وهذي وهذي كـل وحـده بهـا شـي= شـيٍ تميـز بـه وللعقـل تسـبـي
امـا عيـون وخـد والا جسـد حـي = والا خلـق واخـلاق او ميـزةٍ غيـر

[يزيد النمي]

الله الله الله عليك يابو انس وصح لسانك

وهذي وهذي كـل وحـده بهـا شـي=شـيٍ تميـز بـه وللعـقـل تسـبـي
امـا عيـون وخـد والا جسـد حـي=والا خلـق واخـلاق او ميـزةٍ غيـر

صحيح صحيح

طيب والا قال لك

الموت لا حازت جميل الوصايف = جميع ما قلته معاها ولايف
بعده يحملني العنا والكلايف = فرقه كبير عن جميع الغنادير

مامني فكة بتلقاني في كل قصيدة لك مسنتر

[ابو زياد]

الله عليك يابوانس
مبدع في كل مجال وفي كل الاحول
الفصيح لعبتك والعامي ايضآ ملك القلمك وفكرك
انت بحر في المفردات وتمكن في التركيب والحبك
اجد في وصف النساء وليس بغريب عليك فانت من يجمع المتضادات
وبقالبه يصبها للمتلقي ليرتشف منها الذوق والبهاء
اخي صح لسانك ودمت بخير على الخير

[نسناس الهوى]

وهذي غنـوج لااقبلـت جـت تمايـل
تلعـب بشـعـر جمّلـتـه الجـدايـل
وفي عينهـا غمـزه ونظـرة تحايـل
وفي صوتهـا بحـه تحـل المساميـر

الله الله عليييك .. "في صوتها بحّه تحل المسامير" ،، إن أخذت الوصف فقد اوفيته ، وإن اخذت الجزاله
وفن اختيار المفردات ، فقد ابدعت .. وإن مدحت منطوقك ، فلن اوفي جزالته وابداعه

استاذي ابو انس ،، سجل اعجابي لهذه الرائعه

نسناس الهوى

[ابو أنس]

وقد أجازها الشريف الشرقي بأبيات قال فيها

قم يا ولد في صافيات البواكير= واركب على اللي حسها يرعب الطير
ود الرسالة للذي حيل غالي= من راس قومٍ يحتمون التوالي
يرسي كما ترسي راوسي الجبالي =قصدي (لبو أنّوس) زين التباشير
سلم عليه وحب خشمه وراسه =وخلك على ما قيل راعي سياسية
واشرب من علومه الريق كاسه =من دلةٍ فيها بهار ومسامير
وقله قرينا لك بيوتٍ جميلة =في وصف باهي الخد ضافي الجديلة
بو عيونٍ-نعنبوها-كحيلة(*)=اثرك خبيرٍ بالبنات الغنادير
لكن -فديتك- الشباب ابلشونا=تشبهوا بالغرب ثم اكرشونا
في لبسهم في هرجهم فشلونا=ياالله طلبتك للشباب التياسير
هذا يقضي اليوم في داخل السوق=لا شاف ترفات البني طاح من فوق
راحت حياته بين طارد وملحوق=يتعب على طرد البنات المغاتير
وهذاك يرقص في البحر والبراري = كنه من اللي يلبسون السواري
ودك يطيح بوسط حفرة مجاري=ولا تكسر فوق راسه قوارير
وهذا يكد الراس كنه بنية=لامن دهن راسه يطالع خويه
لا ياسعد وش هالحياة الشقية=لابو حياةٍ مايحَصل بها خير
وهذاك دايم يا سعد ما يقري = ما تلحقه لو كنت بالوصف مري
يبحث عن ديار الخنا و التعري=يرتاح لامن صار في وسط اغادير
هذي نماذج للشباب المطافيق =حبيت اعلقها على السطر تعليق

(*) تصحيف جميل يستخدم بديلاً عن اللعن .
ولها متابعات أخرى ......إذا رغبتم بها نقلتها كامله للمحاوره

[ابو زياد]

ولا ترى فينا شباب مطاليق-هم عزنا هم ذخرنا للمعاسيـر

قل للشريف الشرقي
شيخ المطاليق
الف صح لسانك وبيض الله وجهك

[يزيد النمي]

ياسلام
صح لسان الشريف الشرقي وتسلم يمينك

اي بالله نرغب

تابع تابع

[ثار التميميه]

وهذيك هـي بنـت الرجـال الأصيلـه
........... ما ضعت يـوم انـك تبعـت الدليلـه
ودروبهـا يـم الخـنـا مستحيـلـه
....... هـي نخوةآهلهـا القـروم المناعيـر


الله الله الله

صح الله لسانك

مبدع لاعدمناك

[ابو أنس]

المشاركة الأصلية كتبت بواسطة يزيد النمي

الله الله الله عليك يابو انس وصح لسانك

وهذي وهذي كـل وحـده بهـا شـي=شـيٍ تميـز بـه وللعـقـل تسـبـي
امـا عيـون وخـد والا جسـد حـي=والا خلـق واخـلاق او ميـزةٍ غيـر

صحيح صحيح

طيب والا قال لك

الموت لا حازت جميل الوصايف = جميع ما قلته معاها ولايف
بعده يحملني العنا والكلايف = فرقه كبير عن جميع الغنادير

مامني فكة بتلقاني في كل قصيدة لك مسنتر

أخي يزيد ....
الله يحييك.. ع
مرك شفت أحد وده يفتك من شيين يحبه
وانا احب واطرب لمداخلاتك وقصايدك
وخذ هذي على عجل

لاصار خلك كامل(ن) بالتواصيف=نفسك توافق له على العدل والحيف
هذاك كيف النفس لكنْ ياكيف=لابد يصبح بعد هذا مغيرير
ثمّ(ن) يسحب بك على كيف ماراد=هو يامرك وانتا تجاوبه ياستاد
تطرد سرابه والظما فيك يزداد=وان خزك بعينين صيحت ياامير
يامير في كل البنّي المزايين=انا تحت أمرك رهن رمشة العين
آمر تدلل لو تخطّى القوانين=كل الذي تبغي اتممه ويسير
ثمّ(ن) عقب هذا تِسمّع له اخبار=صار مخطوب(ن)واعتزم تركة الدار
تصفق وقلبك شب في داخله نار=راح الهوى والعشق دور تبارير

[ماجد السعد]

الله الله

المبدع أخي ابو أنس

روعه روعه روعه

صح كلك