المعـــارج

ماجد الزيد · 17-08-2011, 03:25 AM

يقول الفتى الجبري بصافي مثايله =تقل عيس روس اسنامها قذال مايله
من الحمر لا داسن على البيد تشتكي=اطيط الوطى من وطيهن صرّ عايله
فخمسين حمرا شوق من لو تزيدهن=الى الالف والالفين والسبع نايله
لعينا هك العنقا المغازي تشوقني=ومثلي يروم سهيل ويفزّ طايله
لعينا اللتي بعيونها المسّ والسحِر =معارج سماوات ومن الله هايله
تقول انها من طهرها شافت النّبي=وصابت لها دعوة فلا هيب زايله
تحوش المحاسن كل ابوها وترتقي=لبدر الثنا والعزّ عن شرّ ظايله
تقول انها من جنّة الخلد حوّلت=وهايب من المعطي وهذي جزايله
ابي خير من يمسح على الطّود كفها=ويزهر خزامى بعد سبعين حايله
يليّن لها باس الحديد إن تمايلت =يسبّح بحمد الي خلقها ويلايله
فلا مثلها بالروم والفرس والتتر =ولا مثلها بقحطان ولاّ بوايله
أميرة على كل الحساني بحسنها =فهي شمْس بدر ٍ كاثراتٍ حلايله
ايلا من حكت كن اللئالئ بفمّها =وتنثر جواهر كل ما قيل قايله
فيا ثغرها البسّام عطني علومها =عساها من الرحمان في خير قايله
واذا جنّ ليل ارجاك يا نود هاتها=عطور السنا للهم والغمّ هايله
فيانود هذا الليل ماهو بموسمه =تعجّل ؟ أو انّه شعْرها قمت اخايله
تقل ظلّة ٍ غطّى على الجو وبلها=ودنّا عليّ برد وسلام ٍ همايله
رعاها الولي عن كلّ ماقد يضرّها=من الحسْد وعيون ٍ لها الموت شايله
شماليّة الاعراف هبسيّة الهوا =فلنسيّة الاشواق بالقلب جايله
ايلا احنت الصبحة وثم طاح شعرها=تقل سال شلال ٍ يدوفع شلايله
ويا وجهها الفتّان قرّب وهاتها =وخصر ٍ ايلا جت بالهوينا تمايله
وقرّب بها سبعين أنثى اقلّهن=تصير النسا في حدها هروش صايله !
وقرّب بها بنتٍ من النور كنّها=تلاوات صوفي بالدّموع امتصايله
وقرّب بها الجوزاء من الشّرق باديه=تدلّ الذي بظلمى تردّت دلايله
وقرّب بها طهر وخلط عين رابعه =ومحرابها من دمعها في مسايله
فيا مهرة العاشق ويا درّة الحيا =ويا قرّة الملهوف خوذي رسايله
على راس مشرافٍ وبعيونه الرعن =وغدرى بها سهيل اليماني عمايله
توجّد وبعيونه من الشوق ما بها=وجمر الغضى تلسن بجوفه شعايله
وبضلوعه السرحان والذيب شاهده=فلا نامت عيونه يواسي قتايله
يجيه الخلاوي بالخلاوي ينادمه=وعن حال ميثا مع منيع ٍ وسايله
فلا راشد بْمرشد من الشوق جندله=ولا هو يدلّ اللي سما في خصايله
فتى هبس مضويها على سهيل والجدي=وتعلم كبار البيت نافل فعايله
ايلا ضاقت بفرّيس ربعه فجوجهم=يفج الصّفوف ولا يخلّي قبايله
ويلا جنّ ليله والصلاوات سلوته=تغنّى بذكر الله وعدد فضايله
واذا شاف نجم الصبح والنود بخّره=تنهّت وفدّى بالحبيبة حمايله
جرى حبّها بعروق جسمه وخالطه=مع الدّم وفي قلبه حمتها نصايله
ضلوعه لها حصن و خفوقه مقرّها=بهيفيّة ٍ غنّت لها الروح عايله
تدورج لها الكدري شبيه ٍ بدرجته =لطيف ٍ قدمها ما تنثّل نثايله
لها الحور غنّن كالوصيفات حدّها=يشيلن لها قاف ٍ بها قمت قايله
يغننّ وكنّ خدودها أول الغسق =خجل طفلة ٍ داخت من الشّوق سايله
يمرّ الهبوب بشوق يمسك كفوفها=ويحلب سحاب (ا) مّموشطات ٍ جدايله
تخالط بقذلتها من المسك والوبل=وفاح العبير بوجنتيها هلايله
ونوّر زميّمها كما بارق الوسم=على قنوف وجنتها تبدّت مخايله
تنفّس نوار الفمّ واتفتّق الزهر=تقل ديدحان ٍ بشْفتيها دخايله
هبوب الهوا يهواه هاوي عيونها=فتى هَبس من روس النوايف نزايله
يبشّ الخفوق لشوفها كل ما اقبلت=محال الفنا والروح للروح آيله
عليها من الرحمان تسليم والثنا =وذكر ٍ لها في مجلس الله طايله
لها من الإله الحب والودّ والرضى =وابليس خاب مْقطّعات ٍ حبايله
فداها الذي ماقد فدى غيرها بها =ولا يذكر المشتاق ماضي جمايله
عليك الله ان الحب والشوق جابني =اسابق خفوقي مرتين وأحايله
لهوفن على ضمة ضلوعك يشمها= ونا لهفتي شوف العيون وهوايله
تمنّى الفتا الجبري بجزلاته المنى=لقا ، من لها سمنت وراجت هزايله
سلامي على عيطا كنيني مقرّها= لها القلب ركن وحب وأبّ ٍ وعايله
تمنيتها قربي وعيني بعينها= تنفّس واكنّ المسك بازكى نفايله
تبسّم عيون ٍ دونها صافي الهوا= وسودٍ مظاليلٍ على الخدّ مايله