بديت باللي شيد الكون تشيد

[بدر بن عيد]

بديت باللـي شيـد الكـون تشييـد=ابـدع بخلقـه ثـم سـن العقـيـدة
من بعد هذا ياخلـف عيـدك اسعيـد=يالله لعـل ايـام عمـرك اسعـيـدة
انتـه ومـن كثّـر علـي التناشيـد =ارسل لـك المعـذار وأقـره وعيـدة
والله ما انقص في الحقيقة ولا ازيـد=وقع المعاني واضحـات(ن) وأكيـدة
ودي بشوفتكـم وليّـه بهـا مـيـد=لكـن جرحـي ماتوقـف صـديـدة
كل(ن) شرى لبسه يبا فرحـة العيـد=مـع الاقـارب بالثيـاب الجـديـدة
هـل الهـلال وأقنفـت بالزغـاريـد=اللـي لشـوف اديارهـا مستعيـدة
واستركبوهـا صامليـن الأوالـيـد=كـل(ن) يقـول الله علينـا يعـيـدة
العيد يجمـع كـل ذخـر الاجاويـد=هـذا ولـد عمـه والآخـر حفيـدة
وانا ليا جـا العيـد جتنـي لواهيـد=في وسط قلبـي صاليـات الوقيـدة
ماهـي بكـر مـرّت عليـه تراديـد=عنها نيـام أهـل القلـوب البليـدة
ما ودي اشكي خايف أمـن المناقيـد=الرجـل بنـك(ن) مايغلـق رصيـدة
ولا ودي اتـرك فرصـةٍ للحساسيـد=اللي ليـا سمعـت كـلام(ن) تزيـدة
واحترت بين اصدورهـا والمواريـد=من كل جانب صوب نفس(ن)عنيـدة
وسجع الحمـام ملحنـه بالتغاريـد=حـرك هجوس(ن)ساكنـه بتغريـدة
عجل يبا المـرواح بينـه مواعيـد=تحـت جنـاح الليـل والكـل هيـدة
وخايف من اللي يدركـون البواريـد=وألا مـن الشيهـان بـأول هديـدة
كنّه يقول اليا زعلت اضـرب البيـد=ورزقك علـى رب(ن) تكفـل عبيـدة
ان كان ماحولـك عيال(ن)صناديـد=اكضم على غيضـك وكـب اتعديـدة
واصبر على الشـدّات خلـك بليهيـد=تكسـب مناعـه لليـال الشـديـدة
دنيـا تقلـب خاينـه ملعنـة سيـد=لـو انهـا قفّـت تجيلـك امعـيـدة
يانيم شـف قـدام عينـك شواهيـد=بصر بعينـك وافعـل اللـي تريـدة
اللي لهم بالطيـب منهـج وتمجيـد=ماتوا ولا أحد(ن) قـال والله فقيـدة
راح النظـر والوجـه يـم الهرابيـد=صاروا خيار القوم وأهمـه فسيـدة
ما بغاك يادار(ن) بها الظلم والكيـد=يقولهـا اللـي ذاق ظلمـه وكيـدة
ظلـم الطغـاه الحاقديـن النماريـد=سـود النوايـا والنفـوس المريـدة
تكاتفـوا بالظلـم والهـم مقاصيـد=ولا الناس من ظلم البري مستفيـدة
قول(ن) لجدي قبـل لايـرزق اوليـد=نشهد انـه صـار بيـت القصيـدة
مايذبح الرجال ضـد(ن) مـن ابعيـد=لموت وأن جت ضدته مـن سنيـدة
أزمي على وضح النقـا بالجراهيـد=ماني ضعيـف قاصـر الضـد قيـدة
من لا بغاني مـا بغيتـه ولا أريـد=شوفه ومـن عـادان مانـي وديـدة
ما والله ارضا في جلوس على حيـد=يرضى به اللي مـا علومـه سديـدة
هرجه كثير ولا هو مضوي(ن) فيـد=وليـا لقـا شانيـك يأخـذ بـديـدة
إهانـة يفـرح بهـا كـل رعـديـد = ضحكة عـدوه لـو تبكـي عضيـده
عمد يحفونـه قـروم(ن) سواعيـد = لان أتصقـر كـن جابـان صـيـده
والهرج في المجلس مسار على السيد = به أيتعاقب من مشـاء غـار سيـده
للخبل مزح ولأشقر الريـش تهديـد = هـروج مجلـس والنوايـا بعـيـدة
والحـر عنـده للحسابـات تسديـد =هرجه وقـار وكـل جملـه مفيـده
ياالله يا مخرج حليب(ن) مـن الديـد = يا راهنن موت الفتـى فـي وريـده
عندك حقايق قصة(ن) لـي سواميـد = لي الشـرف فيهـا وهـي الفريـدة
شاهد علـي ولـي ومسجلـه قيـد =أطلب جزاهـا منـك ميتـه شهيـده

[منيع]

ابيات ولااروع للشاعر/ معوض سودان
شكرا على النقل المميز
تحياتي لكم