لا من نويت لللكرم و الشجاعه

[الطائر المهاجر]

لا من نويت لللكرم و الشجاعه = فانص التميمي لو تطول المسافات
ومنّه تعلّم كود تاخذ اطباعه = وتفهم معاني المرجله كيف له جات
وحتى ولو مرّيت في أيّ ساعه= تلقاه واقف لك على كل حزّات
ما يهتني ياكل ولو هو بمجاعه= الا ومعه ضيفٍ ولو سهر مابات
ولا من مشى راقبه تلقى البراعه = وتشوف عزمه ما تبي أي اثبات
حليم عاقل لين يصبح طماعه = يقلب غضنفر لو يقابله ميّات
شجاعته من يوم سن الرضاعه = تزيد لا منّه كبر عشر مرّات
له هيبته لو هو بآخر نزاعه = ولوهو توفي قالوا الناس مامات
هيبه من الله من يناظره راعه = يكفيه نظره مايبي منه وميات
عزيز نفسٍٍ ما عرف للدناعه = ولا ذل نفسه شان ياكل ويقتات
عفيف جيبٍ ما حدته الجشاعه = يسرق ويسترشي ويبحث عن فتات
واضح وضوح الشمس مابه لكاعه = ما يغدرك لوّه رأى منك زلاّت
ينصحك لله دون خوف وجزاعه = ولا من تكرر منك شفت المعاناة
ولا هوب نقّال الهرج كالإذاعه= ولا هوب من يقبل بغيبه وكذبات
ولا هو منافق لاجل بعض انتفاعه= حتى ولو يخسر رجال المهمات
راضي برزق الله بفهم وقناعه = يدري مصيره راحلٍ مثل من فات
هذي طباع الحر ما هي مشاعه = دستور في قلب التميمي وآيات