فـرق الـشـعــر ( شطحت فـكـر )

[مشعل الشايقي]

( قد نميز الكريستال من الالماس ولكن ) قصيدة حبيسة ادراج الصدر احتياجي للتنفس أظهرها
هل هي شطحت فكر ام هذه أوامر الشعر / ظهورها الأول لكم فأنتم الأوكسجين النقي

لو كل مخلوق تفكيره كبر راسه = كان استحى فيل من تسحيب خرطومه
وماشفت لك ذيب يقوى لحظة نعاسه = الشاه تسرح وهو غرقان في نومه
والحر للخرب يصبح دوم مفراسه = وصار الهدد لرخم ياخوك و البومه
بعض الرجاجيل يقبل مالي الباسه = وعند الشدايد مايسوى قيمة هدومه
جبل ولا هب علمٍ راح قرطاسه = مخيال ثوب النسيم يصفق كمومه
لو المراجل تجي تعلوم ودراسه = كان العرب مابهم من ضيع سلومه
بعض الكرستال يلمع مثل الالماسه = والمدرك اللي يقيّم أول السومه
لكنا في وقتنا ذا ضاعت الطاسه = المال يجعل حطيط اخلاق مخدومه
يالذرب يالقرم كف الجود نبراسه = ياسهيل غيرك نقول نجوم مزعومه
هو به فقير البشر تشتاق مجلاسه = او قيل فيه النعم لو طابت علومه
لاصار فقر الرجل عيبه ومقياسه = اكيد كل الخصايل فيه معدومه
وخطاه يصبح خطيئة حتى من ناسه = والتاجر استغفر الله روح معصومه
وش حال خاطر حطب والمجتمع فاسه = وما ينفخ الضو حظ أشفاه مشرومه
من وين فنجال فزعه يذهب عماسه = والفزعه دلالها قدام مخصومه
هو فيه عينٍ عشان الحب عساسه = او قلب يخفق عشان قلوب مكلومه
يطيح شامخ قدر من قدر مياسه = بنت الصدر نبتت الأضلاع مرحومه
رهف القوارير يكسر من قسا باسه = غرشة عطر بالخطر بإحساس ملغومه
شطحت مدري قصيدي مات حباسه = لاقلت قفلت قافي ضاف معلومه
فرق الشعر شاعرٍ يشتب هوجاسه = للغير وهموم غيره مصدر همومه
وشاعر دموع الطفل ماتوقض إحساسه = اغلا قصايد قصيدة تقضي الزومه
والنقد كدر زلاله حقد بلاسه = افواه تنقط عسل بكواب مسمومه
خالف وتعرف ياتعس اللي بنت ساسه = طموحه القاب لكن لـقب العومه
ومن نظرته عند خشمه سيّده ياسه = ومن ينظر بعيد حقق سيّد حلومه

[داعي الشوق]

صح لسانك يالشاعر مشعل

و ذكرتني بالابيات اللي تقول ،،

من لا يروم المرجلة حاله صعيب = حتيش لو زانت حياته تعاسه
يشب فيها بإسم مجهول و يشيب = و عند النشاما ما يساوي لباسه

*********

صح لسانك مليووووووون

مع التحية لك

*******

[احمد الجريفاني]

جزلة جزلة جزلة اتعب واقول جزلة من راس جزل اسعد الله ايامك

[الطائر المهاجر]

والنقـد كـدر زلالـه حقـد بلاسـه=افواه تنقط عسـل بكـواب مسمومـه
خالف وتعرف ياتعس اللي بنت ساسه=طموحه القـاب لكـن لقـب العومـه

اكيد جايك شي من هالباب وهو اللي فجر القريحه حتى عطيت المنتقد
اكبر من حجمه بهذه الأبيات ، وهو ما اراد الوصول إليه
صح الله لسانك وفكرك
ولا هان راسك
تحياتي

[عبدالرحمن بن زهير]

عزالله انك صادق يامشعل صح الله لسانك يالجزل هذا نص ملئ بالنضج والحكمه ولاهي غريبه عليك...تحياتي

[منيع]

ابيات اكثر من رائعه
سلمت ولاندمت
تحياتي

[حلا نجد]

صح لسانك وعلا شانك
تسلم الايادي التي
خطت لنا اروع الكلمات
دمت ودام قلمك بنبض بكل احساس
ونحن بنتظار روائعك بكل شوق

[الخنساء]

صح لسانك مليون ولايكفون
قصيدة جزلة منشاعر جزل
سلمت ودام حرفك

[حي الضمير]

صح لسانك
واعتلا شانك
قصيده رائعه بروعة حضورك
لا خلا ولا عدم

[حوريه]

صح لسانك يا مشعل

رائعه بروعة حضور شاعرها

دمت كما تحب

ودام حرفك

..