مشيت يم السوق مجنون ليلى في الفيصليه

[الطائر المهاجر]

بصوتي

مشيت يم السوق يازين فرقاه = مع طفل لزّم اشتري له هديّه
يومه نتق لي ظبي والموت بخطاه = وحسّيت في قلبي تقل لذع كيّه
من طرفه الأيمن تنهدت ويلاه = ومن طرفه الأيسر لمحت المنيّه
زلزل جذور القلب من ادناه لاقصاه = ومن قوّة الزلزال اسمع دويّه
راحت دفاعاتي الا كيف ابقواه = واستنجد التاريخ واهل الحميّه
حضّرت عنتر فوق الابجر للقياه = انحاش ما يقوى العيون الجريّه
ونخيت أبو زيد الهلالي من الآه = قال العذر فالعشق نار وبليّه
ياقدرة الله من بقى يمكن انخاه = كل هرب وين الرجال الوفيّه
واشوف خبلٍ مقبلٍ وقته اضناه= عطشان جايع لازهاب ومطيّه
ومن دون ما انطق صاح انا عندي دواه = خبره طويله كان تبغى الوصيّه
مجنون ليلي ياهلا به وشرواه = ويش اللذي ودّاك للفيصليه
قام يتبسّم واخرج اللي بمخباه = مسجلٍ مصنوع في الجاهليّه
وحط الشريط اللي من الشعر عبّاه = جره على المسحوب في العامريه
قال افتهم فالحب كالقفل تقواه = باللين تفتح كل درب عصيّه
واكتب قصيدٍ يسحر القلب مغناه = يرسل على الجوال اثمن هديّه
لينك تمكّن داخل القلب وحشاه = وتدري بصيدك قبل تاقع ضحيّه
كانه غزالٍ تعرف أصله وملفاه = حطّه على يمناك ما فيه زيّه
وغيره فلا تقرب ولو كنت تهواه = يمكن مع الأيام تلقاه حيّه
قلت العفو هرجك كبير بمعناه = وانت الذي مجنون بين البريّه
تركض ورى حبك تبي شوف عيناه = بين الحجاز وبين نجد العذيّه
وفي الآخره بالغار تفطس بمثناه = محدٍ درى بك لاجواز وهويّه
ومن قبل ما ينطق بسرّه وما اخفاه = جتنا تبادح مهرةٍ يعربيّه
ويطمر لها الرجّال والبنت تنصاه = والدمع حاير في العيونٍ الشقيّه
كلٍ من الفرحه ويوم الله أعماه = قام يتحضّن منوته والبغيّه
والاّ هل الحسبه على الجمس تقفاه = شالوه مع ليلى فهذي خطيّه
ان كان هذا العشق ما والله ابغاه = مادام فيه الجمس ليه الأذيّه

[صعبة المنال]

جزلة

سلمت وصح لسانك

صعووب

[نفحات حساسة]

يسلمووووووووو
قصيده بقمه الروعه..صح الله لسانك
ولا هنت

[الطائر المهاجر]

شكرا صعبه
على كريم المتابعه
لاهنتي
تحياتي

[منيع]

ههههههههههههه
مبدع ياقيس الفطاحلة
شكرا لك
تحياتي

[بنت النور]

صح لسانك عددبلامدد
لاهنت

[داعي الشوق]

هههههه صح لسانك ابوعبدالله
جزلة في فكرتها وتسلسل معانيها

صح لسانك مدد

[الطامي]

الله عليك يادكتور
اجل حرك المشاعر
صح السانك ملايين
ولاهنت

[الطائر المهاجر]

شكرا نفحات
على كريم المتابعه
لاهنتي
تحياتي

[الطائر المهاجر]

شكرا منيع
على كريم المتابعه
لاهنت
تحياتي