يانجيب القلايع او تجي ارسانها

[الطامي]

احمد الله على الدنيا قوي العزوم = الله اللي يعين وخاب شيطانها
ارتكي للثقيله والردي مايقوم = والمعين الله الباري بميدانها
اتعب الحال واشهر فوق عالي النجوم = خوف مدة يديني عند رديانها
شامخه هامتي جعله شموخ يدوم = مانثنت كون لخالقها وديانها
انفق المال واعطي من حلالي واشوم = من مطالب ضعوف كثر ديانها
اتنومس اذا جاني كثير الهموم = يطلب الجاه مني عند سلطانها
اتقدم بجاهي حيث طبع السلوم = يانجيب القلايع او تجي ارسانها
وان تقدم رفيقي للمنافس بيوم = افتح الدرب له واعطيه علمانها
رفعته طالة لي كود حقق حلوم = وما قصر منه وفيته من سمانها
لاهرج بي هبيل القوم والا الرخوم = اترفع من السفهان واعوانها
موقفي عند ربعي مثل ضلع زحوم = عود من جيز حزمه تثبت اركانها
الصغير احسبه مني وانا به رحوم = والكبير احسبه والد لشبّانها
وكل تقديري الكامل لربعي عموم = والردي ماحسبته سم عنوانها
وان حصل لمة للخير فيها علوم = مانسوني هل العادت في شانها
طول وجهي يقدمني اذا جاء اللزوم = وفعل يمناي مايقصرمن ايمانها
من يريد الحياه مقدرٍ ومحشوم = اخذ علم المراجل وانت ربانها
عض تحت الشفايا واحتزم بالهدوم= وخل ذكرك جميل عند عربانها

[سناعيس]

الله الله
ياسلام عليك يابو محمد
صح لسانك والف نعم فيك
قول وفعل
لاهنت

تحياتي

[بيدي رسنها]

ونعم يالطامي .. وصح لسانك مليون ومايسدون .. وسلم عمرك وحرفك .. شاعر مبدع ورائع .. اهنيك على هالنص الجزل .. تحياتي لك شاعرنا ..

[منيع]

ابيات رائعة ومعبرة
وكفو ياالطامي
رعاك الله بلطفة
تحياتي

[عرق الماس]

شاعرنا المبدع..
مشاركة رائعة كروعة حضورك..
تسلم يدك..

[عبدالله الدخيل]

الطامي
منصور المري

صح لسانك وبارك الله فيك
قصيده جزله من جزل

واقبل

ودي واحترامي

[ماجد الراشد الهيري]

كفو اخوي منصور
وصح لسانك واعتلى دايم شانك ماشاء الله عليك
شاعر محترف ومتمكن تكتبها بكل الاوقات
مبنى ومعنى وتصوير
لاهنت

[الطائر المهاجر]

جزله من راس جزل
صح لسانك واعتلى شأنك
ولاهنت
تحيتي واحترامي

[كظيم]

كفو يالطامي
وصح لسانك وفكرك
ابيات شعريـه محبوكـه وجزلــه

ابدعت لله درك
تقبل مروري المتواضع لاهنت
ودي وتقديري

[حي الضمير]

صح لساااااااااااانك مدد
قصيده رائعه وابدعت
سلمت يمناك