اعقبي يا نطيحة وانكتم يا نعام

[ماجد الزيد]

ياقصيدي بلاش الدّفن ذبّ الغطاوي=ماحلا الحقّ لا قبل شايلن له حسام
يا حسامي حشمتك عن لحوم ٍ رخاوي=خابرك لا صفقت تقصّ قاس العظام
اعذروني براسي ممسي الذيب عاوي =واعذروني بسل السّيف واعدي امام
ناوي اسكت وآطنّش بسّ ماني بقاوي=كدّروا خاطر ٍ لا ضاق يارد حيام
يوم شفت النطيحة تشتم اهل الفتاوي=زوّعت كبد قافي وزاع طيري وحام
ثم تمنطقت صارم فوق بشت ٍ حساوي=والرّصاص متعبّي والمخازن تمام
يا زمان ٍ تشوف العنز بفياض شاوي =ازعجت في ثغاها روس قوم ٍ حشام
نهجنا دون وجهه الف الف ٍ /ٍ نداوي=اعقبي يا نطيحة وانكتم يا نعام
يرحم الله زمانك يا زمان الخلاوي=يوم ميثا سّتيرة ما تعدّى الخيام
مانبي الشرّ لكن نوب هوّ المداوي=يكعم الساقطين يدوس روس اللئام
زمرة ٍ واستخبّت في قصايد مضاوي=بيّنوا روسكم والضرب فوق الحزام
ياخذون الشّرايع من لحون الغناوي=وشرعنا نستمده من رسول الأنام
هيه يامن تغدّت سمّ باهل الدّعاوي=اشربي سيل ٍ نار ٍ جاك بعد الجهام
تطلبين التّساوي مير مامن تساوي=وين علم العروض إن جاء بلوغ المرام
لا أبا لك ولا له وينكم والعزاوي =شلّةٍ تبتغون الدّين فينا هلام
تجرحين الكبود وهو يصيب الكلاوي=كلبوكم بحرب الدّين ماخذ وسام
لاويك الف لاوي ولاويه الف لاوي=العصايب وتزحف من جنوب ٍ وشام
بالقّوي الرّجاء ومن ثم فيها الرّجاوي=تلطم الظلم غفله والحوادث نيام
ثمّ تجيك البلاوي ماوراها بلاوي=يفرح الرّكن منْها ثمّ يعزّ المقام
ما تبعنا سجاح ولا استمعنا لغاوي=والدّعي بحنيفه عنْد مثلك إمام
سلّموا لي على الشيخين ويّا الجلاوي=قولوا الخالدي يرسل عليكم سلام
يابعد من ذوانا بعدهم كل ذاوي=ويش عذر الجماعة يوم صرنا مُدام
حالنا يعلم الله مثل حال العماوي=القوامة بعدهم في يدين المدام
الفتن لاطمتنا وكاثرات اللعاوي=وطاحنتنا المعارك مير مهنا زحام !
قصفهم بالدّشوش وقصفهم بالحكاوي=اخطر مْن التلاقي بالحروب الجسام
لعنبوا النيل سات وناشر الشّر حاوي=كافر ٍ بالحلال ومستحل الحرام
ليتها بالسّيوف وليتها بالقناوي=يشظفون العقول وغسلها بالكلام
بين عقل ٍ فديغ وبين قلب ٍ هواوي=ما تلام السقيطة يوم ترمي السّهام
مار انا لاح لي نجم ٍ له اعوام ضاوي=كلّ ما شفت نوره قلت نور الكرام
تستنير الصوارم من حديث ٍ سماوي=بارق الخير فيها شقّ عتم الظلام
فيهم الله يشهد يكبرنّ الهقاوي =وفيهم الدّين يروى من ديود الغمام
داسوا الرّوم وأنتم تابعين النزاوي=وينكم يوم صار الطّود منهم حطام
نهجنا دون وجهه الف الف ٍ /ٍ نداوي=و اعقبي يا نطيحة وانكتم يا نعام
يرحم الله زمانك يا زمان الخلاوي=يوم ميثا سّتيرة ما تعدّى الخيام

[الطائر المهاجر]

هلا بك خالي
ياليت توضح المناسبة فما كل واحد يتابع القنوات
ولا يدري وش قال اوقالوا اللي قصدتهم في النايل سات
لاهنت
تحياتي

[عبدالعزيز ابراهيم المنصور]

الله الله الله
أبدعت ياماجد الزيد ولافض فوك
والمقصود بالنص معروف
لله درك ولاهنت
دمت بخير

[شجون القصيد]

لله الله

صح لسانك ملايين

رائعه عانقت القمم

لافض فوك شاعر الابداااع درر ماقرأنا هنا

ارتوينا حد الثماله

تحياتي لسمو حرفك

[صعبة المنال]

ناوي اسكت وآطنّش بسّ ماني بقاوي
كدّروا خاطر ٍ لا ضـاق يـارد حيـام

دوم مبدع

صح لسانك

صعوووب

[داعي الشوق]

صح لسانك يا بو حمد

قصيدة طيبة

و رد قوي

و قاف رائع

صح لسانك ملايين

مع تقديري لك

ولاهنت

*************

[عمر ال شيبي]

الفكر والمظمون ابداع لا هنت ابد

وشكرا لموقفك

الين انك بردت قلوبنا

صح لسانك لا هنت ابد

[ابو أنس]

الفاضل ماجد الزيد..............
اشهد انك كفيت ووفيت
وان كنا في هذا الزمان صار التطاول على العلماء والفتاوى باب شهره وجوقة غناء أصمت آذان ورهقت أفئدة النبلاء مثلك
وهم كثر والحمد لله\ ولكن المنابر ليست لهم
(شاعر المليوووون!!!!!!!!!!!!)
صار معول هدم وليس منبر تثقيف كما هو المؤمل منه

شكرا من الأعماق على التفاعل الجميل والنص القوي وهو المؤمل منك وانت المبدع
طربت كثيرا لقراءة النص والتفاعل معه
تحيتي وودي

[نفحات حساسة]

ااااااااااااالله

من طول الغيبات بو حمد

صح السانك وصوتك..وسلمت يالجزل

أبيات تقشعر لها الأبدااان

يعطيك العافيه.. وسلمت يمينك

تحيتي لشخصك..

[أم ريما]

صح لسانك

قصيده جميله

يعطيك العافيه

ولاهنت