لافي حمود يرثي العسيلي

[ضعيان البدرانى]

قصيدة للشاعر:لافي حمود الغيداني الحربي:::يرثي فيها الشاعر:محمد العسيلي الحربي

ايه امسح النمـره .. وكـل التفاصيـل=اسم .. ورقم .. شيخ المزايـا العظيمـه
لياصار ماصوته يجـاوب علـى التيـل=ماعـاد للجـوال .. والـرقـم قيـمـه
راح .. وعليـه قلـوب ربعـه معاليـل=وصـدور رحبـات المجالـس محيمـه
على أحر مـن الجمـر .. مثـل ماقيـل=كنـت انتظـر لحظـة لقـاه الكريـمـه
ميـر القـدر مابـه لياحـل .. تأجيـل=$ويرضايـه المؤمـن بصبـر وعزيمـه
دنيـاً لهـا عـلـى الاوادم مصـاويـل=وصكاتهـا فـي روسـنـا مستديـمـه
أمراض .. وموت .. وشح زاد ومحاصيل=وكـوارث.. ووارث .. ودنيـاً ذميـمـه
مافـي مجـي المـوت شكـه وتأويـل=مثـل الغريـم اللـي يـدور غريـمـه
مرحوم يامـن لـه معـزه .. وتبجيـل=عندي .. وعند اهـل العقـول الفهيمـه
اقفـن علـيـه مـذوقـات الغرابـيـل=وبانـت علينـا مـن الخرايـم خريمـه
فيـه إهزمنـا .. وتركـنـا مغالـيـل=راس ٍ علينـا مـن فـراقـه هزيـمـه
راس ٍ كفـو لدمـوع روس الرياجـيـل=للـي يقفـون الهضيمـه .. هضيمـه
من القصيم .. الى الريـاض المراسيـل=وصلت .. وحزن رياض نجد .. وقصيمه
إكـد رحيـل مدلـل الضيـف تدلـيـل=وكل ٍ وصل مـن ضيقـة البـال تيمـه
هكـا المسـاء وش يمسحـن المناديـل=كن السحاب الروس .. والدمـع ديمـه
عليـه مخـزون المحـاجـر همالـيـل=من شدة الصدمـه .. وطـول الحريمـه
احد ٍ لـو انـه مـات موتـه تساهيـل=حسرة خبـر موتـه علـى ام اليتيمـه
واحد ٍ خبر موتـه خسـاره .. وتنكيـل=وفـي غيبتـه علـى القبيلـه ثليـمـه
كـان الغنيمـه فقـد بعـض الازاويـل=هـذا السلامـه منـه ماهـي غنيـمـه
مفني عمار .. البن .. والهيل .. والحيل=وعـدو هـراج القفـاء .. والنميـمـه
رمز الكـرم .. حلـو النبـا والتعاليـل=ياطـاب مجـلاس النديـم .. ونديمـه
ماظـن فـي مثلـه تعـوض المقابيـل=وجهة نظر .. حسب اعتقـادي سليمـه
عشقـة بعيديـن النظـر والمواصـيـل=ان مانجبت مثـل العسيلـي .. عقيمـه
ولا قول خَلْيَت مـن وجـود الحلاحيـل=لكـن قليـل اللـي صفاتـه عديـمـه
علـى بعضهـم فـي بعضهـم تنافيـل=شـي ٍ مايجهـل فيـه غيـر البهيمـه
مرحـوم يامنصـا الرجـال المشاكيـل=ونطـاح قـالات الـرجـال الجسيـمـه
جاه .. ووجاه .. وحبك جـزل التماثيـل=مستوطنـات ٍ راس محـرج خصيـمـه
ولاهو علـى وجهـه ولا جاهـه بخيـل=لـي بـه المعـروف ماهـو ظليـمـه
يقـوم بالقـالات .. ويحـط .. ويشيـل=ومرجع لمن يبغـون الاريـاء الحكيمـه
علـى المشاكـل مايـجـر المـواويـل=حسـب لعاقبـة الامــور الوخيـمـه
مايستجـره صـوت دبكـه .. وتطبيـل=وعنده لمـن خالـف وصالـف قسيمـه
لاحتاجـت القـالات شـرب الفناجـيـل=طـق البهـام لكـل راعـي هميـمـه
بأسلوبـه يعـد هـل العـوج تعـديـل=وعلاقتـه مـع كـل طيـب حميـمـه
ماطيشنـه مثـل بـعـض المهابـيـل=لـدر قوافيـه الـجـدد .. والقديـمـه
تواضع وضحكة حجاج وهـلا ..هيـل=وبشاشـة ٍ بالوجـه تسـوى وليـمـه
أمدح .. ومدحي فيـه ماهـوب تضليـل=شهـود ربـي بـارض ربـي مقيمـه
والمدح باأهـل المـدح مابـه مداخيـل=والا بغيـر اهـلـه قـولـه جريـمـه
يالله عسى قبر ابيـض الوجـه لسيـل=ويخضـر جنابـه كـل ماتهـل غيمـه
ويـبـد الله ظلـمـتـه بالقـنـاديـل=آميـن يامححـي العـظـام الرميـمـه
يامفضل محمد علـى الرسـل تفضيـل=كـرم سمـيـه بالجـنـان النعيـمـه

[محمد عبدالله البدراني]

العزيز الغالي ضعيان البدراني سلمه الله


اولا كل عام وانت بخير ومن العايدين الفايزين

وبعده وينك من زمان فاقدينك


ثم مليون شكر لطرحك القيم واختيارك الرائع

وحقيقه من اجمل ماسمعت في الرثاء

ولافي حمود شاعر كبير والله يرحم العسيلي ويسكنه فسيح جناته


تحياتي
مع اسمى ايات الشكر فائق التقدير واطيب المنى رعاك الاله

[ياسر عبدالرحمن الخالدي]

قصيدة رثاء من الطراز الاول تُذكر بالمرحوم ولاتدع مجالاً لنسيانه


رحم الله العسيلي وصح لسان لافي حمود

والشكر موصول لك

[ضعيان البدرانى]

الاخ:محمد عبدالله البدراني؛؛؛

كل الشكر والتقدير للمرورك الكريم

اما بالنسبة للغيب ابشرك مافية الاالخير لكن تعرف ايام رمضان والعيد الوقت ماهو منظم؛؛؛

@ سلمت ودمت @

[حي الضمير]

رثاء رائع ومؤثر
رحم الله العسيلي
وشكرا على النقل اخي ضعيان

[صعبة المنال]

اختيار موفق


صعووب

[الطامي]

ضعيان
شكرا للنقل المميز
وصح السان الشاعر
وهكذا الدنيا
شكرا لك

يعطيك الف عافيه

اختياار موفق للغايه

سلمت

[نفحات حساسة]

يعطيك العافيه على النقل
وصح الله السان قايلها..ورحم الله موتاكم
تحياتى..

[حوريه]

الله يرحمه ويغفر له

قصـيده مـؤثـره

وجزله من شاعر جزل

دمت بألف خير

.