الموت حق وواطيٍ كل الانام

[الطائر المهاجر]

الموت حق وواطيٍ كل الانام = ومن لا اعتبر بالغير فاقد رشاده
والانسان لامن وصل تسعين عام = يرجع مثل ما كان عند الولاده
عاله على غيره اذا من صحى وقام= وفي ملبسه او مأكله او عتاده
والذاكره تمسح مثل مسح الافلام= ولا عاد يذكر غير وقت القراده
يومه يطامر كنه الليث ضرغام= وقت المراهق والشباب ببلاده
ومع كثرة امراضه حقيقه واوهام= ماعاد يتحمل ولا له جلاده
يالله طلبتك من بالاحوال علام= ما آصل لوضعٍ كل ما به نكاده
ارحل وانا في قوتي دون آلام= وعقلي معي مانيب فاقد قياده
ولا اصير عاله عند اهلٍ وخدام= ولا نيب في مشفى قليلٍ فواده
وتغفر لي اللي صار من ذنب وآثام = وارحل وانا مانيب ناسي الشهاده

[داعي الشوق]

صح لسانك يا بو عبدالله

والله يعطيك الصحه والعافية

والله يعين على الدنيا بخير

ولاهنت

وصح لسانك مدد

[عبدالله الشويمان]

صح السانك يا ابو عبدالله..والله يحسن لنا ولك الخاتمه..

ويالله الغفران..

دمت بخير ولا هنت

[هترل]

الله يعطيك طوله العمر يادكتور في طاعته
ويرزقنا وياك والحاضرين حسن الخاتمه
وصح لسانك واعتلا شانك نص جميل بجمال الروح فيك

تحياتي وتقديري

[الـزلـزال]

الطائر المهاجر

نص مميز وجزل وحكيم
من شاعر متميز ورائع في كل مايقدمه لنا
أبدعت وأمتعت طائرنا
حلق بحروف شعرك فهي تسرنا ونستمتع بها
صح لسانك ملايين ملايين
ولك فائق تحياتي وتقديري

[الغفيلي]

قصيده من الطراز الاول
صح لسانك
ولاهنت
ودي واحترامي

[عبدالمحسن الرحمه]

الله يحسن لنا الختام
صح السانك أبو عبدالله

[ساهر الليل]

صح لسانك ياعود

والله يحسن خواتيمنا

ويعطيك طول العمر على طاعته

ولاهنت يالجزل على هالفارهه

تقبل تقديري وودي

[منيع]

متعك الله بالصحة والعافية واحسن لنا ولكم الخاتمة
ابيات رائعة ومعبرة
تحياتي

[الطامي]

الطائر
صح السانك
والله المستعان على الدنيا اللي أولها صغر ثم فتوه ثم عقل ورشد ثم كبر وأمراض ثم شيب وخرف لمن طال عمره
إبداع يادكتور ووصف رائع
لاهنت