محمد البدراني وصوت الاحساس ورفيعة الشان

[ام العمده]

محمد البدراني

ليه وش بك ناويه لي بالقطيعه = من مردك ماكشفنا للبضايع

رفيعة الشان

لاتواخذني بكلماتي المنيعة = قدركم عالي ولا يه من قطايع

محمدالبدراني

ودي اخذ منك علم ومانذيعه = وسدنا محفوظ ولا له شخص ذايع

رفيعة الشان

كانك اتصونه فانا اعطيتك وديعه=وما تعدينا سدود ولا ذرايع

محمدالبدراني

اشتري عرفك ولا والله ابيعه = مير قولي لي من ايات البدايع

رفيعة الشان

البدايع ما تجي الا من بديعه=ومثلكم شبعان ماظني بجايع

محمد البدراني

من العيون الناعسه والا الوسيعه = ماشبعنا مير قولي لي طبايع

رفيعة الشان

وسع ولا نعس ما به من نفيعه=الخلوق بيرفعك فوق الرفايع

محمد البدراني

لانويت الوصل تطرين القطيعه = ليه ودك بي تسوين الشنايع

رفيعة الشان

والله انا ما نوينا بالشنيعة = ولا نمس اكبركبيرٍ بالفضايع

محمد البدراني

اطلب القربك ترى بأمر الشريعه = طالبين القرب بسلوم وشرايع

رفيعة الشان

والله ان العلم يوصل للرفيعة = للعجوز ام العيال ام اللفايع

محمد البدراني

ماعلينا من العجايز والفجيعه = مارضيناها ولانقبل فجايع

رفيعة الشان

والله ان تامر عليك واإن تطيعه= وساقيتك المر وانتوا له بجرايع

محمد البدراني

الطلب مرفوض قولي يامطيعه = لاتجيبين العلوم بكل خايع

رفيعة الشان

ابن عبدالله انا اللي له رديعه = وده اني اتوقف عن طبايع

محمد البدراني

مانحدك مير ردي لي سريعه = وش جرى مابين شراين وبايع

رفيعة الشان

من شرانا والله انا ما نبيعه = مير لك ذا اليوم ما به من سنايع

محمد البدراني

الوفاء والصبر مني واستطيعه = ياعسى بالامر خير وبه سنايع

رفيعة الشان

اجل لك تصبر على الارض الوسيعة = لين سنك طاح واردتك البضايع

محمد البدراني

قلت لك يابنت مانتي بي سنيعه = واخفوقي منك به تسعين لايع

رفيعة الشان

قصتك ذا اليوم جفواء ومريعه = غير قل يالله ترحم كل لايع

محمد البدراني

يارفيعه لو سمحتي يارفيعه = لاتردين الطلب والعلم شايع

[داعي الشوق]

صح لسانك يا رفيعة الشان

وصح لسانك يالبدراني

رائع رائع رائع

و ماقصرتي يا ( أم العمدة ) على النقل الجميل

يعطيك العافية

،،،،،،،

[حوريه]

صحت السنتكم

روووووووووعه

دمتم بخير

[رفيعة الشان]

تشرفت بملاقات الأخ البدراااني


صح الله لسااانه


ما قصر

والله لا يهينك يام العمده


بس ليتك كملتي جميلك وجبتيها كاملة

عشان المعنى يكتمل


تحيااااتي وتقديري

[محمد عبدالله البدراني]

ماشاءالله ياأم العمده جهد جبار تشكرين عليه


وحقيقه مافات من هالمحاوره الا بيتين بيت لي وهو البدايه ثم بيت لرفيعة الشان

والباقي كله موجود الله لايهينك ياأم العمده والله ان المنتدى يفتخر بوجود امثالك اللذين يعملون بصمت ويتركون الكلام للاخرين ..

لله درك وعافاك وعاجزين عن شكرك ولا نملك الا الدعاء لك بالتوفيق والسداد


وصح السانك يارفيه صح السانك = صح كلك يالعزيزه يارفيعه .!


تحياتي
مع اسمى ايات الشكر فائق التقدير واطيب المنى رعاكم الله

[سناعيس]

الله الله
محاورة رائعه من شاعرين نفتخر في وجوهما في الفطاحلة
محمد البدراني ورفيعة الشان
شكرا لكما من القلب على هذا الامتاع

والشكر موصول للاخت الفاضله ام العمده
على تفضلها باخراج هذه المحاورة وإدراجها

تحياتي

[الطامي]

هههههههههههههههههههههههههههههه
البدراني صح السانك
خلها وياك غير تعلم العجوز ام الفايع وتجعل حياتك لقايع
ههههههههههههههههههههههههه
رفيعة الشان
صح السانك يابنتي
وخلك وياه هذا عود مهوووووووووس لاتواخذونه
ههههههههههههههههههه
شدي عليه وابشري بولد
شكرا لكما ولاهنتو

[رفيعة الشان]

الله لا يهينكم جميـع ما قصرتوا

الاخ داعي الشوق

الغالية حوريهـ

الاخ سناعيس

العزيز والقدير الطامي المري


وصح الله السنتكم

ومرة ثانية الله لا يهينك يام العمدة

حقيقة محاورة ممتعة جدا جدا وفيها من المعاني

ما جعلها مميزة ... وفق الله الشاعر والشاعرة

وشكرا للنقل المميز

[رفيعة الشان]

المشاركة الأصلية كتبت بواسطة البحر الوافر

حقيقة محاورة ممتعة جدا جدا وفيها من المعاني

ما جعلها مميزة ... وفق الله الشاعر والشاعرة

وشكرا للنقل المميز

الأخ الشاعر الغانمي

حياك الله

ووفقك لما يحبه ويرضاه