قصـائـد الشـاعـر : عثمان سالم المجراد .

[دايود صالح الخلف]

بسم الله الرحمن الرحيـم ..


حياكم الله اخـوآنـي واخـوآتـي هنـا

في هذه الصفحـه والتـي ..

آحـآول فيـهـا وضــع بعض من قصآئـد

الاستآذ الشاعـر : عثمان سالم المجـراد ( ابو عبدالرحمن )


وهو من ابرز الشعـراء في مدينه حآئـل

وتغنـى عدد من الفنآنيـن بقصآئـد الشـاعـر عثمـان

وعلى راسـهم الفنآن القديـر / فهد عبدالمحسـن

وهنـاك ايـضـا قصيـده اشتهـرت للشـاعـر

وهي قصيدهـ ( عـروبـة قـرن ) ..

والتي دخلت ضمن المنافسـه على المراتب الآوآئـل فـي

الأم بي سي اف ام وكآنت مع قصآئـد من المع واشهـر الشعـراء

قـ الاستاذ عثمان المجـراد

يستحـق الكثيـر واللـه وهذا ما بستطاعتي ان اقـدمه ...


واطلب من الله عز وجل ان يطيل في عمرهـ

ويعـود إلـينـا نحـن متآبعيـه بما هو جديد ..


بسم الله :


اقـول الزمـن /

اقول الزمن00والمح ثلاثين خيال=تطاردوا بعروق جسمي عرايا
ظلي يصيح00وخاطري صابه هبال=هذا انا00والا سراب المرايا
صم الجوارح صارت اشباح تختال=صعب انكساري في عيون البرايا
شال الالم صوتي00تسمعت موال=عني 00ولكن مالقيتن معايا
تعبت انا اسقي لكن الزرع ماطال=ذبلت ورودي00والعطش فالشفايا
مليت صبري00ملني الصبر بالحال=يادمعة امي00اغفري لي خطايا
صارت حياتي كلها مضرب امثال=اشوف حزني في جميع الزوايا
راحت سنيني مابها شمس وامال=اضمها واخنق طموح البقايا
قلت الزمن00والهم00وعيون الاطفال=تسابقوا بفراش حزني عرايا

ريحـه الليـل /

ريحة الليل هيل 00وزعفران 00وبخور=ورقصة الحلم نشوى للعمى والبصير
انطفت شمعتين 00وباقي ظل نور=قبل ريح المواجه00سوها يالفقير
خل بينك وبين الموت صورة قبور=لاتردد 00ترى اللي مارسمته يصير
اقطف الزهرة اللي مالمسها الغرور=وافتح الصدر 00عصفورك تمنى يطير
اهـ00يالوحة تبكي مسحها الغيور=والتقطها الصغير من شفاه الكبير
انت وينك00عيوني سافرت للحضور=ماوصلها بهاك اللي خبرته مثير
انتظرتك تجي0000 مثل ماكنت نور=ترتوي هالبيادر من يدينك واسير
اجعل الليل خيل له صهيل 00ونفور=رفرفت بالبيارق00والرعد له خشير

ظلام اجـي لـك /

ظلام اجي لك 00وان نبت بالسماء نور=اخاف واركض للجفاء والكابه
مماجرى 00ناب القلم صار مكسور=والحبر جف من التعب والكتابه
رحلة ضياع البيت خالي ومهجور=في وسط صحراء ماتعرف السحابه
لاجيت اباانسى جيتني همس وشعور=ولاجيت اضمك 00ضم قلبي عذابه
اشق ثوبي وارسل الصوت مقهور=لاواعذاب اللي تردى شبابه
مابين ليل وخوف والثالث السور=تعثرت رجلي طريقك تهابه
وش لون احبك وانت بي جرح محفور؟=هذا البلاء يامن طرحني غيابه!

على رمـل النفـود /

على رمل النفود انزف00وجلدي لعبة للشمس=اضمد جرحي بجرحي 00واخاف من اللهب والبرد
اصيح من الالم واشكي00ودمعي بالالم ماحس=صدى الصرخه يعذبني 00ودمعي صامت مارد
جلست اضحك على حالي00على جرح بدا من امس=على دمع تبرا من حياتي صاير لي ند
اهوجس:وش بقى وش راح وش اللي مابعد يندس=لقيت اني مع احلامي بدرب به سراب وسد
خنقت الخوف في كفي00لقيت الموت بين الخمس=وغاصت رجلي بالرمضاء وانا بين الرخاء والشد
مشاوير العمر قفت وانا كلي عذاب وهمس=طفل مولود في غابه00نماء بين الهزل والجد
تلفت00شف زمان الغوج ولا 00صار عمس بعمس=مجاديف النجاة اضحت على الغرقان سيف ارتد
جنون العاصفه حطم ثمار الباسقه والغرس=وهاج الموج ماحسب لميزان الجزر والمد
وانا فيني حنان وعاطفه00لكن تراني شرس=ابا انسف كل مابيني وبينك لانسيت الحد

عـروبــة قــرن /

اجل :عفت الغزل..واللي يحب بهالزمن دجال=قضت كل المعاني..ماحصل تقضي ماسينا!
انا مثلك ..ومثل اللي سمعنا :من ظهور ابطال=على خد السوالف.. لانوت تسهر ليالينا
رمينا الزيت وسط النار ..وزاد لجيلنا اجيال=توارثنا الجروح سنين..ولا جاء من يداوينا
غزينا..!!..يضحك البارود مسترخي على الحمّال=يبي يشبع من اسراب الطيور اللي تسلينا
حسافه: مادريت ان العرب ماساتهم :موّال=صدح به صاحب المغنى.. وصدقنا اغانينا
حسافه:ماكتبت الشعر باللي جسمها ميّال=ترقّصنا ..تخدرنا..وعلى التنقيط تغرينا
حسافه:ماقريت الوصف باللي سجّل الاقوال=وصلنا للهدف مرات..لكن: سجّلوا فينا!
خسرنا القدس والجولان..واحوال العرب اهوال=ولاندري وش اللي جاي ياستار تحمينا
تمددنا على ظهور الارايك والبطون ثقال=تريّحنا..وشعوب الارض تصنع لاجل تغرينا
منازلنا ..ملابسنا..اوانينا غدت اشكال=حتى الاسم مانتعب..معاهم بعض اسامينا
عروبة قرن عشناها بلى عزه ولاافعال=وضاعت في دروب التيه والغربه خطاوينا
تفرقنا ..تلاعنا..تعودنا نعيش اطفال=الا>تفّ<علينا ..من اولنا..لتـــــــــــــــــالينا!

ديرة الخــلان /

نسيت اول طموح هزني يشفق على الهجران=مسحت اول طريق دلني بعض الوله لمه
بديت اخذ من اطراف الوفاء واستحلف النسيان=اذا ماسيرت عنده هجوسي يسترد همه
انا كلي وله00مهما تسيل العاطفه عطشان=ابي تروى عيونن طالعت باعزاز للقمه
انا ماني مجرد رقم00انا ياسيدي انسان=رفضت اسبق مسافاتي لان السالفه ذمه
رضعت الصدق في لبده رفيعين الغلا والشان=نبت جلدي من مغيضه الا ياحيي هاللمه
وناداني البزيعي والعليا والتفت عفنان=نهض عيرف يطالع للزباره وده يضمه
شموخ العاطفه يكبر الامنه طرى برزان=خفوقي للنعام اشعل قناديل الفرح دمه
وبديت اسمع جبل شمر يردد عرضة الحجلان=يهلي بالعروس اللي دعيناها سوى:يمه
تمدد من جبل سلمى واجا واللي ورى رمان=مراقيب الشرف واللي تبي ياسيدي سمه
افاخر واحتفي كلي فرح ياروعة الاوطان=سعودي الولا والخير حنا:ساعده00فمه
بلاد خصها الرحمن موطن لاخر الاديان=نزل فيها الوحي واختار منها هادي الامه
ذكرت اخر طموح هزني :ياديرة الخلان=مشيت اول طريق دلني:بعض الوله لمه

وآن شـاء اللـه هنـاك بقيــّــه

تحيـتـي

يسلمك ربي اخوووووي داوود
بصراحة انا اغلي هالشاعر واحس انه مظلوووووووووووووم
احب ان انقل لكم بعض ماكتب عنه بالمنتديات في حائل من بعض محبينه وهم كثر وبستاهل وعتبنا عليه ابتعاده
عن الشعر من سنوات:




عثمان بن سالم المجراد، مثقف وشاعر (يكتب بالعامية) من مدينة حائل، ولد في الستينيات الميلادية. وينتمي لأسرة من أكبر وأعرق أسر مدينة حائل.



يعتبر المجراد، واحداً من أهم الشعراء الشعبيين في حائل، والجزيرة العربية على وجه الخصوص. ويكمن سرّ نجاحه، إلى جانب موهبته المتقدمة، في تعاونه المبكر مع أشهر الفنانين والمطربين، من حائل وخارجها. كذلك قدم خلال مشواره الشعري، الذي ما زال مستمراً، مئات القصائد والأوبريتات الوطنية، التي تتحدث عن حائل.



وأختيرت واحدة من أشهر قصائده الوطنية الحائلية، وهي بعنوان "أغترب وأشقى"، واحدة ضمن 5 قصائد في استفتاء تشرف عليه إذاعة Mbc - Fm. وكان أصحاب القصائد الأخرى هم محمد العبدالله الفيصل وخالد الفيصل وعبدالرحمن بن مساعد.



شارك المجراد في عشرات الأمسيات الشعرية داخل البلد وخارجه، وفي جميع المناسبات الحائلية. كما شارك مرات عديدة في المهرجانات والفعاليات التي يعدّها نادي حائل الأدبي.



من أشهر الفنانين الذين تعاون معهم الشاعر عثمان المجراد،: سلامة العبدالله، والذي يجمعهما رابط الإنتماء لمدينة واحدة، فشدى سلامة العبدالله بعددٍ من أجمل أشعار المجراد، في أغنيات شهيرة، وتكاد تكون محفوظة في ذاكرة الأغلبية من جيل السبعينيات والثمانينيات وعبدالله السالم وفهد عبدالمحسن وخالد السلامة والصريخ وغيرهم وتعاون مع حمد الطيار في اول فلم كرتون للاطفال بطولة راشد الشمراني وحبيب الحبيب عنوانه جمّول .(عثمان المجراد
من ويكيبيديا، الموسوعة الحرة)
اما موسوعتي الحره ايضا ..تقول أن عثمان المجراد شاعر شعراء حائل وهذا بشاهدة حائل التي لو سألتها عن عثمان الشاعر وعثمان الأنسان؟ لقالت انه حبي وحياتي وروحي ومائي ودمي وانفاسي .
وأن قلت لماذا كل هذا الحب لعثمان ياحائل؟
قالت انتم لاتعرفون حب عثمان لي وحبي له ؟
عثمان تغزل بي كفتاه وعثمان حن لي مالم يحنه ابن لامه وابيه لم يستطع ان يفارقني وفارق اسرته عاد لي وهو عندي ..عثمان قال عني مالم يقله شاعر أخر من رحمي ..عثمان لايهمه شهره ولامال طالما هوا بحظني ..

مثل الذهب 00مهما علا فوقه غبار
0000000000يبقى طوال الوقت سلعه ثمينه
ومثل المطر00مهما المطر سال مدرار
0000000000لاغاب عام 00صاحوا الناس :وينه!
ومثل البحر غلطان من قال غدار
0000000000موجه تساوى لكل طير وسفينه
ومثل اشتياق الام اشتاق للدار
0000000000شوق العمى للشوف بصبي عينه
دار سكن فيها السناعيس تنزار
0000000000غصب على اللي جاحد في حنينه
دار الشرف والجود 00دار للاخيار
0000000000مشاعري وان جيت اعبر دفينه !
للضيف فيها قدر00وحقوق للجار
0000000000ماحد ينام ونفس جاره حزينه
طبايع لاهل الجبل كبار وصغار
0000000000نفطم عليها وكلنا خابرينه
اقولها00ومهما الومن جار اودار
0000000000حايل مع الايام يزداد زينه

ثالثهم الشيطان ..الشيطان..الشيطاااااااان




اضاءة:تحت خاصرة كل منا -عقل-وفوق هاماتنا تنتحر العقوووول!!



****



تصدّق:يمكن الكرسي هذا..



او هذاك..



يمكن الورده هذي..



او هاللي معاك..



والا تدري:



يمكن الشعر الاسود..



يمكن ان الشعر الاسود..



اللي من حظه كساك!



+++++++++++



هذا حنا:



جنس اول..



جنس ثاني..



جنس:ماله اي ملامح!



ان رفعت الراس:سبّك!



ان رفضت الياس:سبّك!



ان مدحك الناس:سبّك!!



حتى لو تصدق بحبك..



مستحيل انه يحبّك!




لو تضم امك..يذمّك!



لو منحته كل دمّك..



صار بغيابك يردد:



لايهمك..لايهمك!



+++++++++++



اهـ ياروعة جنونك..



اهـ مشتاق لعيونك



شف بها حالة سهرنا..



كم صبرنا؟



شف صورنا..



شف شوارعنا الكئيبه..



شف زحام غبارنا..



شف وجوه كبارنا..



شف شفاه صغارنا..



وارسم اللوحه الحزينه:



طفل بائس..وسط اسوار المدينه..



فوق راسه مطرقه جدا قديمه..



وعند عينه:لا - تختصر كل المعاني..



شيء ثاني:



اسفل اللوحه عباره:



جن.. انس..




وان قدرت انته على النسياااااان:



انس!



1995م



عثمان المجراد

الثانية:خربشـــــــــــــــــه ..!!!



الى روح صديقه القاص الاستاذ:عبدالعزيز الشغدلي رحمه الله



الذي كثيرا ماترنم بمقاطع منها كلما تجلىّ....




**مهموم:وسط حشد من رعيل الزمن الهارب..اظافر خشنه مملؤه -قملا-تنهش جسدي -الدامي-



بحثا عن موقع الالم!!..



..يمرون من هنا..



يدوسون ظلي..



اشياؤهم الثمينة تتداعى..



منذ متى؟!



من اين؟!



ياايتها الشمس احترسي..



هاهي جحافل.....



اشعليني..امضغي تعبي..



انت وحدك الحارقة-العاشقه..



احتضن الخبز الحافي..



اغسل همي..



وعندما يمارسون -النوم-..



احمل تعبهم.....وانزوي!!



***



ياقبلة العشاق..ويني انا..وانتي وين؟



جيت بوله مشتاق..ابي الهنا..ابي الحنين..



فيني بقايا ليل..يرجي طلوع الشمس



يمسك خفوقي حيل..يبي الدفاء والهمس



تكفين:يابنت العرب



تكفين:لاصار الغضب



تبي اللهب عينك..



وابقى لها نار ..وحطب!



اقطّع يديني ..وابتسم..



احرق رموشي..وابتسم..



بس لحظه:اتركي عيني تشوف..



منظر الفرحه وهي بوجهك تطوف..



ومن بعدها :اهـ..قطّعي جسمي..صيحي..العبي



رددي:مــــــــــــات لعيوني:هالغبي!



******



هم الدهر بي جرّح القلب تجريح



.....................لاواعذابي منه ترجف ضلوعي



تضحك وانا والله يعذربي اااصيح



...................... لاشك عز النفس يمنع دموعي!!



حــــــــــــــــــــائـــــــ ــــل 1401هـ-1981م



عثمان المجراد

تفيض الغربة,
لا بد لأغنية أن تنبت في القلب!
في الطريق المؤدية إلى حائل ألزمني الستيني ذو العين الشاردة
بأن أتوقف عند أول نقطة بيع, و قال بأن الطريق الطويل.. يمر باحتمالين :
أن لا تصل .. أو أن تحشو اذنيك بأغنية تخبرك بأنكَ لم تصل بعد !
نقاط البيع على الخطوط السريعة ليست مضمونة,
كل ما لديها شعبي !
طريقة التعامل و المواد المعروضة و الوجوه كلها شعبية هناك !
لذلك كان لا بد للأغاني أن تبقى شعبية كذلك!
لم أستمع لأغنية شعبية,
و أتقزز حين أسمع قرقعة العود بيد فنان يرتدي غترته على طريقة أهل الثمانينات
الذين شعرت بأن بيني و بينهم سوء تفاهم و سوء مصالح و سوء أغنيات !
يقول الستيني: اطلب من البائع اليمني شيء قديم !
- ما أفق قديم هذه ؟
كبار السن يلقون بالكلمات و يتذمرون إن لم نحقق لهم ما أرادوا!
البائع منذ أن سمع قديم أخرج دفتراً مطوياً بالبلاستيك ,
و لو فردته ورقة ورقة لضاهى الطريق الطويل ذاك في طوله !
حسناً بدافع التحيز بدافع التعصب بدافع المكان بدافع الطرق الطويلة
......... بدافع الرغيف الأسمر أعطني هذا الأسمر أيها البائع !
و صوت الأسمر سلامة العبدالله كان يحرك احتكاكات الروح لدى الستيني !
بالنسبة لي لم تلفت البال و المزاج أغنية !
حتى فاضت الغربة,
و كان لا بد للأغنية التي كتبها عثمان المجراد أن تنبت في القلب !







اغترب واشقى
وتكثر حيرتي !
واعترف مالقى
مثيل لديرتي !
ياقريبه في خيال اللي بعيد
ياحبيبه والوله يمك يزيد !
لو كتمنا الشوق..
يغلبنا الحنان !
لو رفعنا لفوق..
جاوبنا الزمان !
يحكي التاريخ عن سيرة أمم
عن حكايا جدودنا ويا الكرم !
آه يابرزان يالبده وسماح
مشتاق ياعفنان للوقت اللي راح !
للزباره للقرايا والجبل
وكل حاره فيها ربعي والأهل !
ياعروسه..والحلى اللي فيك هايل..
ياابتسامه اسكني في وجه حايل !
وش تبين أقول / ياملح الشمال؟
هو أنا معقول أوصف هالجمال ؟
يازمان اشهد
وخط بسيرتي !
افتخر واسعد
بحايل ديرتي !

[حي الضمير]

منقول رائع من ذوق اروع
الف شكر

[حوريه]

منقول جميل

شكرا لك

[دايود صالح الخلف]

حياكم الله يالغوالي

واشكرك الاخ سنعوسي على نقله البقيـّـه

[الطائر المهاجر]

شاعر غني عن التعريف
زاملته في بعض منتديات منطقة حائل وبعد انقطاعي عنها بعد تأسيس الفطاحله
قبل 3 سنوات انقطعت اخباره عني ، فياليت لو تسلم لي عليه وتوجه الدعوة له يا اخي داوود
لينضم للفطاحلة فمثله مكسب
شكرا لك
تحياتي

[دايود صالح الخلف]

ابشر بعـزك يالغالــي بعطيــه خبــــرر


وسلامـك اعتبـــرره وصـــل يالغالـــي


تحيـــتي واحتــرامــي