عبدالله الثويني (السمح) + عبدالله الحديب

[عبدالله الحديب]

السلام عليكم ورحمة الله وبركاته





السمح

لك التحيـّه قبل بدع القـوافـي =سـلام ياراع الحروف الجزيـله
مادام جوّك ياهوى البال صافي=اوقد لهيب القاف ، شبّ الفتيله

..

عبدالله الحديب

حييت يافخر الشعر يالسنافي=تعداد ماهبت هبوبً عليله
ريح الشمال اللي تجيب العوافي=وأنشهد انك بالقوافي دليله

..

السمح

لك البقا يالله عساك متعافي=عساك تسلم من زمانك وميله
لكن انا خابرك بالحب هافي=وشحال يالمفتون راع الجديله

..

عبدالله الحديب

ياصاحبي والحزن لاصار خافي=انظر عيوني شوف وشهي تسيله
البارحه بالليل والحزن ضافي=يبكي وخله روح خله عليله

..

السمح

خابرك يالمجمول بالحب وافـي=قادر على شيل الحمول الثقيله
إن شفت حزنك لاوسط القلب لافي=دور لوصل اللي جفاكم وسيله

..

عبدالله الحديب

هو ماجفا بالعكس للجرح شافي=يشفي جروح القلب في كل ليله
بس الفراق يهد فيني (وأخافي=أمن الزمان ) وشوفته مستحيله

..

السمح

مافاد راع الود ، لو قال كـافي=ماله على رد المقادير حيـله
يامن لقى فـ البرد له حضن دافي=يشقى معه ولا يدور بديله

..

عبدالله الحديب

نار المحبه مانفع به مطافي=ومانبدله لو كان منهو بديله
هذا وليف الروح والقلب عافي=من عقبها كل البنات الجميله

..

السمح

يامن نظر حالك بعينه ،، وشافي=راع الهوى سهران صبحه وليله
اهل الهوى فيهم عقولن خفافي=يكثر شقاهم والسعاده قليـله

..

عبدالله الحديب

مانام جفن العين والفرح غافي=العين تبصر ومابالهيد حيله
الحزن في عين المعذب يشافي=أقرب وشف عيني وتلقى دليله

..

السمح

درب الهوى ياخوك . بردّ . وسوافي=من يسلكـه . يزداد همـّه وويـله
راسـه من اللوعات والضيق طافـي=مثل الذي يمشـي ويجهل سبيله

..

عبدالله الحديب

قفل على الموضوع يالسمح كافي=داخل على اللي مايرد الدخيله
اللي بقلبي ماتشيله قوافي=لاصار عبدالله عجز لا يشيله

..

السمح

الحبر والدمعه وصمت المرافـي=نوح الحمام اللي تعلـّى هديله
تظهر لنا ماكان يالذيب خافـي=الذكريات اللي صعيبه نزيــله

[ناصر عبيد الهواوي]

لله دركما تبادل احاسيس
جميل جدا لقد ابدعتما
ابيات مليانه وقافية ممتازة
تحياتي وتقديري لكما
والسلام

[رفيعة الشان]

ما قرأته هنا
شيء جميل جداً جداً
صح الله السنتكم
وطول الله عماركم على طاعته

[حي الضمير]

ابدعتم وصح السنتكم ياشعار

[نفحات حساسة]

صح السانكم .. ولاهنتو
شعراء كبار ليس بغريب
تسلمون

[عالي مستواها]

محاروه رائعه امتعتونا
لاهنتوا يامبدعين
يعطيكم العافيه

[الطامي]

صح السانتكم جميع
رائعة جدا
لاهنتم

[سمحان]

وصح السنتكم ياشعار

[عمر ال شيبي]

صحت قلوبكم لا هنتم ابد

[داعي الشوق]

ابدعتم وصح السنتكم ياشعار