شــمـــوخ شـــمــــر

[النايفه]

ياعديم الراي يالورع المعنا = لاتجي من خلف وتذبحلك شجاع
كلمتك مردودة (ن) مابه مثنا = لاتجيب الشاة في وادي السباع
ماشين من كيف ولا تمتحنا = والله أنك مخطي (ن) والعقل ضاع
شمر(ن) هي شمراً وشقيل عنا = وأردين الموت يوم العلم شاع
ماجهلنا غير معتوهن تجنا = دافنن حظه على عمره بقاع
مايشوف الرمح والسيف المحنا = من خضاب الدم مايبرد بساع
لعنبو حظ العدو يابنت حنا = عازمين الذيب يوم الذيب جاع
لعنبوحظ العدو يابنت حنا = حاكمين بنجد في كل البقاع
لعنبو حظ العدو يابنت حنا = كم أبو شيخ (ن) لنا رخى وطاع
من نوانا في منامه ما تهنا = تصور الاحلام شمر له وفاع
من جهلنا تايهن عرف (ن ) وضنا = ما قراء التاريخ من أول وراع
الجنازه كيف للاموات غنا = بايع (ن) عمره وطعونه وساع
وأبو خوذه كل بنتاً له تمنا = مايقوس الكيس في كيلو وصاع
شمر(ن) هي شمرأً اخوات بنا = القصير اللي غدو لاخته ذراع
الطنايا شيوخهم يابنت حنا = والله أن الشمس يكفيها الشعاع
ألاصاله والكرم والعز منا = والمروه والشرف مثل الشراع
والقبايل حقها ماعنه أكنا = انعم اكرم كل رجلاً فيه داع
وكل أصيلاً دون اصله ماتونا = وأن تونا بايقن للاصل باع

[الطائر المهاجر]

عط الحر فرصه

[الطامي]

النايفه
صح السانكي
والله يخارجنا من اولها بعد الغيبه هجوم ههههههههههه
رائعة جدا
شكرا لكي ولطلتك مرة اخرى

[عبدالعزيز العمار]

الاخت الفاضلة النايفه /

صح لسانك وفكرك الرائع والجزل

والنعم بك وبالطنايا والقصيدة لاشك انها من شاعره قديرة ومتمكنه في اختيار المفردة الجزلة مع براعة التصوير في المعنى

وأرجوا منك اختي الكريمة زيارة هذه الروابط فيما يخص التعليمات ولشرح مايقصدة الدكتور في كلمة ( عط الحر فرصه )

http://www.fatahilah.com/showthread.php?t=5

http://www.fatahilah.com/showthread.php?t=36824

مع الشكر والتقدير لتجاوبك الكريم

[النايفه]

ابشر ياعبد العزيز راح اتقيد باتعليمات

اسمحولي والله انا يغرن بعض طرق المنتدى كونه جديد علي

اشوف الدكتور يكتبلي عط الحره فرصه

بس قلت يمكن هذي مثل قوله صح لسانك بس بطريقه اخرى

وهذي كلها من عين الطامي قام يحذر هجوم هجوم

لاين كشفونا حرس الحدود

[حرف وشعر]

هههههههه والله يالنايفه انت دااااهيه


تبارك الله منشان لاتقولين اني عينتك

الحقيقه قصيده ولا اروع

فخر واعتزاز ويحق لك يالنايفه


شكري وتقديري

[النايفه]

حياك محمد بن عمران

صح بدنك

ايه ذكر الله حلو

عاد انت عينك مستكه

لو ما ذكرت الله كان حذفت القصيده من اصلها

لاتزعلون يا الشعار مجرد مداعبه

[عمر ال شيبي]

للاصل باع

سلمت يدك والنعم بشمر وباقي القبايل

وصح لسانك يا بنت الاجواد

قصيده وعز
وهلابك

[سناعيس]

الله الله
صح لسانك يالنايفه
ولله درك
كفو يابنت شمر
قصيدة جزله ورائعه واعتداد بالنفس مستحق كما ان ذكرك لرموز من شمر هو من باب الانصاف لهؤلاء النوادر
وتري الاخوان من حرصهم على تواجدك ولجزالتك يتمنون منك الرد على القصائد الاخرى
لكي يستمتع الجميع بما تكتبين ويفتخرون به
لاهنتي اختي الغاليه

تحياتي

[داعي الشوق]

صح لساااااااااانك مليووووووون يالشاعرة النايفة

شاعرة مبدعه دائما

و حضورك لها رونق خاص على المكان ،

والقصيدة ما يحتاج

جزلة و طيبه و وافيه

تقديري لك مع التحية

**********