جيلٍ ظهر ماهوب داري مساره

[الطائر المهاجر]

جيلٍ ظهر ماهوب داري مساره= ضيع دروبه مادرى وين مرساه
خذا قشور الغرب ظنه حضاره = وفي غبة التيار يتبع لمشهاه
فلا طور لعقلٍ فرض انتصاره = مثل الغرب بابداع في كل مسعاه
ولا هو تمسك في جذور انحداره= بعلم الرجوله والمبادي وتقواه
جيلٍ سريع بثنيته وانصهاره = كبر الجسوم وعقل عايش بمنفاه
نادر تلاقي من يسرك وقاره = فالغالبيه صفر فاشل بدنياه
اقلهم في اللعب يشغل نهاره = ب "النت" يلعب دايم الدوم يهواه
وإلا مع الشله ضياع ودشاره = كاس وحشيشٍ والرجوله تعداه
يطرد بنات الناس في كل حاره = وفي كل سوقٍ مالقى من توطاه
ولو هو موظف ما يعرف ادخاره= راتبه يقضى والشهر في بداياه
اكل المطاعم عادته في بطاره = وسيارته اقساط لاهل المراباه
وثوبه على الغسال ينفض غباره = حتى الكوي ما يعرفه لو تحداه
كشخه على الفاضي بعزم وجساره=والجيب فاضي ماعرف يوم يملاه
او عاطلٍ رغم الفقر به ثواره = ما يحتمل للشغل لو به مراعاه
عاله على اهله مادرى بالحراره = ولا هوب حاسس بالغثى والمعاناه
ولا من ضهده الوقت يسرق لجاره= ولاّ من الممنوع بيعه ومشراه
جيلٍ بلا اعداد ضاع بدياره = ولا فيه من فكر بخطه تذراه
مفروض تجنيدٍ بلا اختياره = عامين مافيها دلع او مداراه
يدرب على اعمالٍ تزيده مهاره= مما يبيه السوق ما شي يعصاه
يطلع بها رجال عقل وجداره = من وين ما يرمى على الجد تلقاه
يفيد نفسه بعد يحمي لداره= من كل وافد ينقل الداء برداه