شعاع الشمس

[سمّار]

شعاع الشمس رِفقاً بي وبالطيبه=انا عاري صدر جيتك, وش التالي
الا كم لعتْ صدري ما انتْ داري به=ولا غيرك درا عني , وانا غالي
ولا يطري عليّ اشكي لواهيبه=( ولا يمكن تذاع اسرار لامثالي)
عمود الخيمه يا حوله طوانيبه= ولو يهتَّز تتقطع به حبالي
وانا رجّال مثلي عَزّ ترهيبه= يداوي نتق جرحْ بجمر مشعالي
يوّن القلب من كثرة عواذيبه=جروحه تنزف بجوفي وتنهالي
ولا ابديها وياهي والله تعيبه =خِباها صدر كل ضلوعه نحالي

تشوف النمر لمّا يكتم نحيبه= ترى من عزَته يكتم وش يصالي
وذاك الصقر حين يونّ من صيبه= يطير ابعيد والا يسجّ في العالي
شعاع الشمس وإنك آيه عجيبه=انا غنيت بك طرقي وموالي
فمن لطفك نشأ طيفك بتركيبه=عبرت القطر واتكسّرت يا اللالي
تشكّل قوس شقّ الافْق له هيبه=بسبعة الوان هذا ابداع وخيالي
وهامت بك عيونٌ كلها رِيبه=ومن روعتك صاير مضرب امثالي
اذا كلْ لون له عشاق حبيّبه=عشاشيقك كثار وفيهم احوالي
شعاع الشمس لو بتغيبها غيبه=عليهم لحظة ابغيبتك بـ/ ليالي
ولا عزوى بليل الهم سوى ذيبه=عواه يونّس العشاق ويسالي
شعاع الشمس رغم الرفق والطيبه=اباغطي عرا صدري وش التالي