قصيدة في بنتي بعد الحادث ( الحمد لله )

[عبدالمحسن الرحمه]

البارحة عيني جزت لذة النوم=مغير أفكر واذرف الدمع منظوم
كله أفكر في غلا العمر فطوم=سهران ليلي مالي ألا الشكاتي
ياويل قلبي ثم ياويل روحي=من يوم شفة الدم أببكي وانوحي
ضميتها والدم منها نضوحي=وقبلتها والدم كاسي شفاتي
الدم كاسي طوقها مع شعرها=وخدودها مع عنقها مع نحرها
عزي لحالي يوم أناظر نظرها=لميت راسي مدري ويش السواتي
هليت دمعي مثل وبل الخيالي=ماغير أصفق باليمين الشمالي
كن الحشى هدّه قوي الرجالي=كله سبايب بنتي أغلا أمنياتي
من بعد بنتي حالتي ما تسلي=الدمع في عيني وفكري مولي
عجزت أبصبر ياهلي ماحصلي=مالي سوا ربي مجيب الدعاتي
الليل كله ما أهتنيت بفراشي=ما غير أجر الصوت وأقول ماشي
أوزع أدموعي على الخد كاشي=يا الله تلهمني بحس الثباتي
لاحدن يكلمني ترى الفكر مشغول=مع بنتي اللي خلت القلب متلول
من كثر هوجاسي غدا الجسم مشلول=نسيت مع بنتي حلات الصلاتي
يا الله يا منشي من الغرب همّال=يا منزل ٍ طه وعّم والأنفال
تلطف بقلب ٍذاق هم ٍوغربال=تسوقه الدنيا لدرب الشقاتي
يا وجد حالي وجد غايب عن أمه=وده يناديها ووده تضمه
بسباب بعده زود البعد همه=يشكي على الخلاق جزل الهباتي
يا الله يا رحمن يا خير معبود=ياللي جميع الخلق لك ركع سجود
تلطف ببنتي دمعها حرّق خدود=من شدّ ما فيها تعاف المباتي