سوالف

[سمّار]

صعّد معانيها وسفّح بالخيال=غمّس يدين الاثم في الفكر الطهور

شرّع لسوء الظن في قصر الهبال=ابواب ما توصد مع لحظة عبور

خلّ السوالف ذيك ينقلها العيال=بين المخافت والمسارر والجهور

إن القوارير اللي ابشدّ الرحال=ملونات وبيض ويشعّين نور

البعض ياعمي تساعد ع الكمال=والبعض حديّن المعلم ع القصور

مثل الخيول اللي تزهّب للنزال=فيهن من يثبت وفيهن العثور

ما الخيل من خيالها في كل حال= الجامحه تفرق عن الخيل الفتور

شوف الذي منهن تظمّر للقتال=الصافنه تقدم على فلج النحور

والكيف لو هو زِلّ في صفر الدلال=لو ما يبهر ما شربت الا نزور

مسمار ويّا زعفران وحب هال=والزنجبيل اشوي لانعاش الصدور

يمدّ بالفنجان من يمنى الدلال= لو قال بسّ يقول خذ ع الشِّكه دور

سمّ من يد اللي ما يمدّ الا زلال=تقهو والزم في رسن سيد المهور

من وين ودّاك الفِكِر حوّل تعال=ياصاحبي بعض السوالف للقبور

صعّدت بالمعنى وسفّحت الخيال=والاثم غّمسته في الفكر الطهور