طبع الناس

[محمد بن لقفص]

الناس من طبعها ما تنصر إلا القوي=واللي تردى عليه الحال ما ترحمه
اللي ضعيف وحيد ما لقى له خوي=ناس لجمع الذهب والمال مستسلمة
والقلب يا خوي من جور البشر منكوي=وإذا شكا من ظروفه ما حدن يفهمه
والنار في داخل المجروح تشوي شوي=يبني وتأتي رياح العاصفة تهدمه
عيت تقاليب هذا الوقت لا تستوي=يا حيلة الله فيمن هاجسه يحكمه
ضامي ومهما شرب ما ظنتي يرتوي=تكثر تعاسة حياته والعرب تشتمه
تطويه ساعات حزنه والزمن ينطوي=والهم يمسي ويصبح في مجاري دمه
تدري به الناس من حضرانها وابدوي=والحال في كل يوم ينتقص معلمه
طاحت عزومه وضرت حيله المعنوي=واستنزفت قوته ساعاته المظلمة
والذئب لو شاهده فالحال يعوي عوي=بالله يا كل صاحب خير لا تحرمه