كل الفصوووول !

[ماجد الزيد]

تعال ياوجه الصباح امسيت عنّك حول حول =تعبت من قو الظلام ووحدتي وانت الغياب*
والله من تقبل علي امر في كل الفصول =خريف صبر وطلتك نوفمبر وضمك سحاب*
حضنك دفا ضو السمر والجو يرسل بالسيول=وعينك بروق وخافقك رعّاد وحسّك انسكاب*
لا جيتني والليل موج يداعب الطرف الخجول=شفت الثلاث البيض ماببيني وعينك من حجاب*
ونا من الي لا سبر يبصر بعيدات الخيول =ون جيت صاحب في يميني حاتم وراسي عقاب*
ماحدني ضلع وعلى روس العوالي قمت اجول =احيان اوردها جمر واحيان اوردها ضباب
والشجْرة الي ظلها فيّا على كل الحقول =ملعون ابو جده ترك جذره تحت قفر التراب*
اما عطت باثمارها واغصانها والا تزول =الي زرعها شالها والي بغضها ما يهاب*
ياهيه ياباني قصر ، ياهيه حاسب لا يطول =ترى الزلازل ممكنة ! والقصر اساساته خراب*
ماغنت الورقا طرب يوم اطربت روس الطبول= غنت كذا حتى ينام الليل خادر بالثياب*
اكثر صفير البوم حول فياضنا يعجب سلول=واكثر نيام اهل القفار اللي مثل نعق الغراب*


ماجد حمد الزيد*