حكمة مهيبيل والا سجع مهبوله

[نجم الإبداع]

ياقاف ماعد يهز القلب مواله=من عقب روح الشقاوي الصب مشغوله
تحطمت فوق جسر الواقع اماله=صارت قوافيه بين الناس معلوله
لاتنشد القاف يامحتار عن حاله=ماطاب لاهل الهوى بنه ومعموله
كلن على القاف ساطي لو تهيا له=والجزل كفه من اللي صار مشلوله
خلف القريشات كلن حمّل احماله=والقاف مابان لي ظبطه ومرسوله
تسابق الناس ذا عمه وذا خاله =كلن غدى يدّعي قربه ومن حوله
مابه تميّز وكلن يبذل امواله=يدور الشهره لو بيديه وارجوله
والجزل له طوق به مخنوق واغلاله=ماعاد يغريك من قاله ومنقوله
الفكر محدود والتصوير يرثى له=حتى القوافي من الغثرات مبلوله
دعاني القاف يشكي عثرة اجياله=من خلف الاستار عانى هجمة خبوله
شفته مسجى بشاش وفوق نقاله =واهل الهوى كل خبل يدن بحموله
احمال من صفصفه تهتّز رقاله=وهّمَة مهيبيل والا سجع مهبوله
من غير معنى ومبنى فيه زلزاله=قصة مجينين عند شهار بندوله
يقول انا الشاعر اللي فاقت امثاله=بين الشواعير كل العالم اومو له
ليت السواط او خلف يلقي لهم باله=والا رشيد الزلامي يلحق فلوله
لكن مالي جدا غير ابعث رساله=على التويتر وفيس اوراق مجهوله
ياقاف هذا زمان انفك جهّاله = وكل جاهل يجيب افكار مفلوله