ممنــوع دخــول البنـات

[سعود القت]

سرنا مثل من سار فالدنيا على غير انتظام = نوبٍ ناكلها في لحانا نوب نجبرها جبر
ليا نجح مشروع قلنا يا سلام ويا سلام = وليا رسب مشروعنا قلنا قهر والله قهر
بالليل عند العايله والصبح نسرح للدوام = والمنضبط منا ما يرجع لين يذن للعصر
ما بين ثابت واستعد وعود خلف وسير أمام = وديور على نفسك وصك بقلتك فاقرب جدر
يروح عمرك وان طرا فالبال تخطب لك مدام = روح استدن ددسن وعيش العمر في عيشة فقر
وفي ليل عرسك قلت ابطنطخ مع اضبي العدام = ومع دخلتك وليا هموم الدين قدمك تنتظر
وبديت بالتفكير وسنونك تعض ابها البهام = قالت علامك قلت ابد خجلان وارخيت النظر
واخذت لك خمس اسنوات تهيم والعالم نيام = هذا يطوّف قصد والثاني ما يقبل لك عذر
وغديت مع مكينة الصراف دايم في خصام = لين كتبت لا عاد اشوف وجاهك حسابك صفر
لخلصت بدوامك يوشحك المدير اكبر وسام = ولو كان يفهم كان يصفط لك ولو قيمة جفر
إتقسم الراتب ما بين اجار بيتك والطعام = وان ما لقيت اجار يصلح روح دوّر فالهجر
وهذاك يوم انه مغير انته ومردوع الوشام = وشلون حالك فالمعيشة لو خلفتو بزر
ثلثين شعب المملكة يعيش في هذا الكلام = والثلث الاخر عاش في خيرات ثلثين الفقر
نارد على عد المراجل مثل ما ترد الحيام = ولا يذبح الرجال غير بقصر حبله لا قصر
رحنا نطقطق مير كثر الطق ما فك اللحام = واللي نبي منه السنع عوّد يفلي فالنقر
لا شافنا يقول يا عمري يا قلبي يا حرام = وهو لا عمره ولا قلبه لعله للكسر
وكلن يرى نفسه على الثاني وقل الاحترام = ولا تعرف اللي شايفٍ نفسه من اللي محتقر
اللي معه ناقه يرى نفسه على راع الحمام = وراع الحمامه شايفٍ نفسه على راع البقر
وراع البقر زاري على راع البويضا والمسام = والطيّب اللي لا ملا بطنه من النعمه شكر
ما نفكر الا فالدراهم والحريم وفالمنام = قل التواصل بيننا وانشهد انا في خطر
لا جا الرويتب نسفهل وطار منا في شمام = ولا ودك نسولف معك خصوص في تال الشهر
ليا دعينا في عزومه نصنا فالاستلام = من خوف لا نصدف لنا طرقي وحنا في عسر