تقدير الانفس

[فهدالمطلق]

بعد التحيه

هذه الابيات امل

ان تنال القبول



من منطلق حب البشـر واحترامـه=وتقدير الانفس حقّ من والي الشّان
ومن مبدأ الطّيبـه ونبـذ اللئامـه=ومن قاعدة لابـدّ للقـول ميـزان
يحسب على الرجّال نبرة كلامه=ياكيف فعله لابدا فيه نقصان
حفظ اللسان وزينته باحتشامه=وزين الفعل محمود في كلّ ميدان
هرج الوشى لو هو قليل ارتسامه=كنّه كثيره راجع الفقه به عان
مااسكر كثيره تر قليله حرامه=خلّه يوللي قبل ماتصير بلشان
في ساعةٍ عسره بدابـه عسامـه= يضيق فيك الكون وتصير حيـران
الحق بيّـن والخطـا بـه ندامـه=لو ماندمت اليوم لك يـوم تنهـان
اقضب طريق النّور جنّب ظلامه=واحسب حسابك كان غافل ونسيان
ماينفـع الرجّـال منصب وقامـه=ولاينفعه وان كان تاجر ومليـان
الرّابـح اللـي ماشـيٍ باستقامـه=مرتاح بال وهرجتـه دوم نيشـان
يدّي صلاته ولااقبل الشّهر صامـه=ويقابل السيّـه لياجـات باحسـان
ماهو خفى وان كنت تبي الفهامـه=جوّد طريق المصطفى خير انسـان
الله خلق ذا النّفس معهـا كرامـه=واجب علينا حشمته حقّهـا بـان
والوقت الاقشر صايـرٍ بـه كتامـه=جلّ المشاكل تركت الدّين يافـلان
اخوٍ موجّه صوب اخـوه بحسامـه=وبنتٍ تصيح بعالي الصّوت وتهان
شيٍ يشيب الطّفل حزّة فطامه=امرٍ عظيم يهزّ والله الابدان
ياللعجب ياناس وش ذا الغمامه=اليا متى والشّرّ في كلّ الاوطان
نسمع نرا ونقول مامن شهامه=اليدّ قصرة مالها قدر اوشان
ومابي اطوّل بالغثا واحتدامه=منظر رايت ومنّه القلب مرضان
مادام ما فاليد حيل وصرامه=الهرج مابه عزّ في مرّ الازمان
يالله تخارجنـا بلطـف وسـلامـه=في رحمتـك يالله يـاربّ الاكـوان



ودمتم بخير