أرجو دخول الجميع للتصويت على أجمل قصيدة

[خالد العمري]

بسم الله الرحمن الرحيم

الإخوة والأخوات الأفاضل إدارة وأعضاء منتدى الفطاحله الشامخ بحضوركم جميعاً
سبق وأن طرحت موضوع بعنوان ( قصة تحتاج شاعر ) في الرابط التالي :

http://www.fatahilah.com/showthread.php?t=19636

ولله الحمد مع أن المدة كانت قصيرة ونحن في بداية تعرفنا على المشاركين وإبداعاتهم فقد وصلني ما رسم البهجة على قلبي وهذا إن دل فإنما يدل على روعة كل من شارك وأيضاً كل من راسلني وأعتذر حالياً عن المشاركة وأبدأ ظروفه المقبولة ...

وقد كانت القصة على النحو التالي :
قصة خالد


كان هنالك ولداً أسمه خالد وكان جميل المظهر وهادي الطباع وكان يعمل في إحدى الشركات وشاء القدر أن يُفصل تعسفياً من تلك الشركة فغضب والده منه وصار بينهم الكثير من المشاكل فقام والده بطرده حتى يجد له عملاً . ..... فخرج خالد من بيته وهو في ألم من طرد والده له وهو غير مُذنب ... ثم شاءت الأقدار أن يجد عملاً في منطقة بعيدة وتزوج هناك من فتاه وكان من فترة لأخرى يهيم قلبه ألماً وحنان إلى لقاء والدته ويريد أن يشكي لها ألم الغربة والوحدة فهو هنا لايجد من يهتم لأمره مثل أمه وأخوته ...

فنظم قصيدة يريد أن يرسلها إلى والدته و والده يعبر عما في قلبه مما عانه من قهر وظلم بالدنيا وعدم تفهم والده له وعدم وقوف أخوانه وأخواته جنب لجنب معه حتى يقف على رجله مرة أخرى وكذلك مما تعانيه معه زوجتة من قلة الحال .

أبطال القصة : أبو خالد - أم خالد - خالد - زوجته
الرسالة الموجهة : تكون لوالدته يشكي فيها قل الحال وألم الفراق والغربة ويشكر الله على مؤزاة زوجته له .

والآن أضع بين أياديكم القصائد مرقمة وأترك التقييّم للجميع من إدارة وعمداء أقسام ومراقبين ومشرفين وأعضاء وتكون طريقة التقييّم كالتالي :

القصيدة رقم ( .... ) تستحق نسبة ( ...% )
ويجب على الكل تقييّم كل القصائد المشاركة وسوف يتم استنتاج القصيدة الحاصلة على المركز الأول نسبةً لوصول الفكرة من القصيدة .

أتمنى من الجميع المشاركة بدون استثناء والشكر مقدماً لكل من مر من هنا وشارك أو قراء


القصائد المشاركة
ــــــــــــــــــــــــــــــ ــــــــــــــــــــــــــــــ ـــ

القصيدة رقم ( 1 )


يمه لجا لك ( خويلد ) يـشـتكي همه = من بعد ماضاق بـه في غربـته حاله
يا اماه ياغـبن كل من غاب عن أمه = وان كان مطـرود ياهي حالـته حاله
لا اخـوه لـ اخــتـه ولاخـاله ولاعـمه = الكل عن ماجـرى لـه لاهـي وُ داله
كل الـمـشـاكل عـلـيـه الـيـوم ملـتـمه = يشفق عليه العدو والخصم يرثى له
لـوان زوجـتـه بـه ما هيب مهـتـمه = الله يعــلـم بحـالـه ويــش يـجــرا له
حسبي على اللي فْصولني مالهم ذمه = واصبحت أشكّل بنظرة والـدي عاله
قـــولي لـبـوي انــني ودي اجي لـمه = نفسي أسـلم عـليه واعـرف احـواله
ودي اكفكف دموعي في طرف كمه = يـازيـنـها لـمـة الـوالــد مع عــيـاله
يا اماه قــولي لـه اني جــزء من دمه = هو تاج رأسي وفي الخفّاق مـنـزاله
يـمه عـسى الله يكشـف عـنـي الغمه = وأبوي يرضى واشـوفـه رايـقٍ باله
من بعد ربي لجـيـت إلـ فـزعـتك يمه = وحـبيـت يالغالـيه أرسل لك رساله

ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 2 )


يقول من دمعـه علـى الخـد همٌـال=من جور وقتـه والسنيـن العصيبـه
إن هو شكـى مـاراح همٌـه ولا زال=وان هو كتم تصبح جروحـه عطيبـه
تضرب به الدنيا مـن الجـال للجـال=أبدا بهمـي وانتصـف وانتهـي بـه
دمع القهر في مشيتـه صـار يختـال=علـى جبيـن اللـي حياتـه كئيبـه
خطيـت حبـري للمواليـف مرسـال=لعلي اطفـي شـوق قلبـي ولهيبـه
وينك يبو خالد ترى الوقـت محتـال=حسبي على من هو لفى با المصيبـه
يابوي ماجيت أشتكي لك عن الحـال=الرزق عنـد الله وهـو مـن يجيبـه
جهدي بذلتـه يشهـد الواحـد العـال=سعيـت مالاقيـت يـاكـود خيـبـه
يابوي لو صديـت قـدرك فـلا مـال=مقدر علـى بعـدك حياتـي صعيبـه
لك في خفوقي ياغـلا القلـب منـزال=ياويـن منهـو بعـدكـم ننتخيـبـه
من بعدكم مالي على الصبـر مثقـال=مشتاق لك وايضـاء لذيـك الحبيبـه
ياميمتي مشتاق والشـوق بـي طـال=جرحي نـزف وانتـي دواه وطبيبـه
مشتاق أجي وارمي همومي على الجال=والفي بحضنك يا الغلا واشتكـي بـه
ياميمتي دمـع العنـا والقهـر سـال=ليتك بجنبـي يـا الرحومـه قريبـه
خالد لفاه (الياء) وانزاحـت (الـدال)=(خالِي ) فرح ولا العنا وسـط جيبـه


أقصد بـ (خالِي ) أي لا يحوي ولا يملك
ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 3)


الله مـن هـمٍ دخـل داخـل الجـوف=وسط الفواد وبيـن حـدب الظلوعـي
ومصحابـه حسـرات والامٍ وحسـوف=ومن حر مابـي غـارقٍ فـي دموعـي
ومشيـت وانـا ضايـق صدرملهـوف=على الـذي صوتـه يـراود سموعـي
يا امي ترى والله لا اسمـع ولا اشـوف=ضاقت بـي الدنيـا وجفـت زروعـي
وحر الفراق وعسـر الايـام وظـروف=ومشيت تحـت احكـام الايـام طوعـي
بين العرى والجـوع والهـم والخـوف=لا من قريـب ولا فـزع لـي فزوعـي
كني مـن اقرابـي معـزل ومحـذوف=وشح الزمان وصـار ابويـه قطوعـي
اقرب قريب يحط في وجهـي صـدوف=من كل وصـف وكـل شكـلٍ ونوعـي
وشعاد باقـي يازمانـي مـن الحـوف=ذوقتنـي حـر الاسـاء والفجـوعـي
مر الفراق يلوف فـي خافقـي لـوف=وقلبي الـى ذكـرت احدهـم يزوعـي
وياللي تبي تكسـب جميلـه ومعـروف=ضاري بفعـل الخيـر قلبـك جزوعـي
افعل جميـل وخـذ رسالـه بمظـروف=لأمي وابـوي وعزوتـي والربوعـي
من خالد اللي به من الهـم عاصـوف=وبين الرجاء واليـاس حالـه يروعـي
وعسى تعبـك مواجـرٍ بـه ومخلـوف=وانـا يهيـي لـي طريـق الرجوعـي


ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 4)



في غربتي جفت دموعي وناديت=باسم الغلا والحب ناديـت يمـه
يمه تراني من عنا الوقت مليـت=محتاج من يمسح دموعي بكمه
محتاج لاخواني وربعي وعانيـت=طول السفر والعمر يقصر مجمه
قمت اتوجد واشكي البيت للبيـت=وابني على ماضي حياتي متمـه
اذكر زمانٍ راح واقـول ياليـت=مافرّق الله شملنـا يـوم لمّـه
ياليت ابويه ماظلمنـي وزليـت=لكنّ طاح الفاس وابليـس خمـه
قولي لابو خالد تراك انته اخطيت=واليوم خالد زمّه الشـوق زمّـه
عايش غريب وحالته تشبه الميت=بين الامل والياس يطويه همـه
قولي يسامحني لو اني تماديـت=واخطيت في حقه على غير يمه
قولي لابويه قولي انـي تمنيـت=ارجع لحضنك وارتمي فيه يمـه


ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 5)



الكون ضاق وضاقبي وسع الانظـار=في وجه ابوي وجه اخويـه وعمـي
ومشيت وانا ضايق الصـدر محتـار=متحسر قلبـي علـى ابـوي وامـي
والدمع من عيني على الخد مـدرار=من زود حسراتي ومن هـول همـي
همٍ لجاء بأقصى الحشاء واشعل النار=نـارٍ سنـاهـا للـفـواد متحـمـي
يمه فراقك يابعـد كـل مـن سـار=اسـاس غربالـي وهمـي وسمـي
يمـه صواديـف الليالـي والاقـدار=عاداتهـا فرقـاء الشمـل ماتلمـي
يمه وابويـه ماقبـل منـي اعـذار=اقابلـه بالعـذر مـاهـوب يـمـي
وان صكت البيبان من كـل الاقطـار=ومن حر مابي ناشفٍ عـرق دمـي
حدتني الدنيـا علـى درب الاخطـار=ودنيا الشقا فـي ظلمهـا ماتسمـي
وسقت القدم وامسيت من دار في دار=وانقـاد حضـي بالسعـد واستتمـي
في دار قومٍ تكـرم الضيـف والجـار=بالعون مايلحق هـل الجـود ذمـي
اهل الوفاء المجد والطيـب والكـار=شجرة وفاء بالطيـب سلـم وتنمـي
واخذت بنت الحر من نسل الاحـرار=وانزاح عنـي كـل همـي وغمـي
الاّ ان فـي قلبـي يـدقٍ الاوتــار=ما شفت لا أخواني ولا عيـال عمـي
ولا شفت أبويه يوم عيد الفرح سـار=ايضا ولا شفتك مـع النـاس يامـي


ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 6)



يمـّه علي الهم والجوع جوّار=والحال تشكي ضعفها من قهرها
ماعدت يايمّه على البعد صبّار=وأيام عمري كالسنه في شهرها
إشتقت لك شوق الكفيفه للابصار=شوق الظوامي للمزون ومطرها
إليا ذكرتك.....دمعي الدم مدرار=هـذا جداي ونوم عيني هجرها
أذكر تعبك لراحتي وقت الإعسار=واذكر حنانك كيف روحي غمرها
ماغاب زولك عن عيوني والافكار=وان غاب عَـل العين تفقد بصرها
ياليت مابيني وبينك سوى أشبار=لاجل أبري جروحي ويذهب أثرها
يمـّه..أنا مطعون من سهم الاقدار=مطعون غدر وعلـّتي في نحرها
ياما ضربت الكف بالكف محتار=يوم أتذكـّر من يميني كسرهـا
أفيق مرّه وأذكر الجور وأنهار=أذكر أبوي وكيف نفسي دمرها
جيته وأنا أمضغ بين الاسنان صَـبّار=ماكنّــي إلا في خفوقي شجرها
باسباب منهو بالفصل أصدر إقرار=وعروق فـَرحي بالظلايم بترها
جيته وقلت الوقت ياوالدي جار=والظالم اجحف والفضايل نكرها
عن واجبي ماكنت يابوي بوّار=لا....والذي بالطيب دارك عمرها
كنت الجميل الشهم في سر واجهار=يوم اختلف بطن العلوم وظهرها
يابوي...خالد فالحشا مشتعل نار=إعــدل عسى دنياك يضحك ثـَغَرهـا
قال : إبتعد مالك على الدار مسيار=أبعد وعيني لايشوفك نظرها
وقمت أترجّى واذكر الحق تكرار=وأفصـّل الحجـّه واعيد اختصرها
واطلب من اخواني معونه وتذكار=يبقى لهم بالطيب والنفس شَـرها
مير وقفوا ضدّي بعد كل ماصار=واقفوا وانا اقبل صوب روحي كدرها
سافرت عقب إنكارهم صِدق الاخبار=بعد إسْمـَعوا منهي تحرّف خبرها
وألفيت ربع(ن) تكرم الضيف والجار=ربع(ن) من الرديان تخلـَى دِيَرْها
منهم خذيت الطاهره بنت الاحرار=سبحان منهو للجمايل فطرها
معها يلو صـَفـَّـن جميـلات الامهار=يكسف سناهن يوم يظهر قمرها
من دونها تقصر طويلات الاعمار=فدوة هواها لوفناها قدرها
ماشفت منها غير حشمه ومقدار=واقبالها لحظة جفاني دهرها
لكن نقصني يابعد كل سـيّـــار=فوق الثرا واغلى من اغلى دررها
ثنـتيـن...يايمـّه تجرّعت الامرار=ثنـتيـن وضلوعي تزايد شررهـا
الأوله : شوفك وتكحيـل الانظار=ياعــل روحي فدوتك في سفرها
والثانيه: حنيّـت حنيّـت لـلــدار=هدّتنـي الغربه وكثرة خطرهـا
قولي لابوي وعزوتي نسل الاخيار=إنـّي مسامح وارجي الله أجـِرْها
هذي وصاتي بالقوافي والاشعار=بالدم والدمعه شعوري شطرها
إن مِـتْ ماشفتك وحالن الاقدار=فالروح من بعدك قهرها قبرها

ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 7)




يايمه مرت الاعوام وجرح الوقت بـي يختـال=وحيد وعايش بعالم غريـب ولالقيـت اعـوان
يايمه حالتي صعبه اشيل همـوم كبـر جبـال=سهر ودموع يايمه معـاد النـوم لـي عنـوان
جروحن تنزف بصدري عجزت القى لها مدخال=ابوي اللي قسى ضدي وسار بنهجـه الاخـوان
واناادري انك بها تدرين لكن ليه صمتك طـال=يايمه جاوبي صوتـي وردي ياطيـب الخـلان
مايرضيه يرضينا وانـا عضـده وراس المـال=وانا قلبي على قلبـه وقلبـه كالحجـر مـالان
يايمه هي بقايا ذنوب نتـوب وترجـع الامـال=ولا اقـول يادنيـا بواصـل رحلـة الاحـزان
ومدام القلب به نبـض وعمـري باقيـن لازال=يادنيا وش بقى هاتيه من هم وحـزن واشجـان


ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 8)


يايمه يالي الجنه تحت اقدامك =جعل الصبايا كلهن يفدنّك
يايمه روحي لك فدى واولادي=ياخير من فوق الثرى مآحنّك
انا مقصر رغم كل اضروفي= ومشاعري ياليتهن يوفنّك
تسعة شهور بداخلك متربع=وسنين مافارقت ضحكت سنّك
يايمه روحي فدوةٍ لارجولك =لو تطلبيها ماتخالف ضنّك
هذا المقدر حظي الي اقردني=سافرت خلف الرزق مبعد عنّك
لافادني طردي ولا سلاني =عن طيب قلبك وارتشافة بُنّك
يايمه لو لا العيب لابدي اشجاني=واصيح بين الناس وابكي كنك
واغدي طريح مخضبٍ لافراقك =مابغي عيوني دام ماشافنك
يايمه قولي للذي جافاني = يومه طردني بالحزاء ماحنّك
قولي له اني ولده الي طاعه=واني لكم شاكر وولد امحنك
زواجي الله كاتبه من صغري =بنت الرجال علومها يرضنك
بنت الاصول وطيبها يغمرني =بنتٍ لها عاداتن ايشوقنك
وفت معي في وقت حتى اخواني=باعوا وفيهم مقتدر ومبنك
يايمّه ارضي واسمحي وادعي لي =دوكي عيوني دايماً يبكنك
كرهت بيتن ماملته انفاسك=والشمس ماتشرق وحال امضنك
يارب حقق منيتي برضاها =الي رضاها من رضاك ومنك

ــــــــــــــــــــــــــــــ ــــــــــــــــــــــــــــــ ـــ

القصيدة رقم ( 9)



ماسلى قلب المعنٌـى فـي حياتـه واستـراح=ماسلى ياكيـف يسلـي والمصايـب تغمـره
وآعذاب اللي بوقته مالقى غيـر الجـراح=فاقد الضحكه همومه . .في حياته تقهـره
زاد همٌي با الخوافي قلبـي المخنـوق بـاح=للصبر يا نـور دربـي ، مالقلبـي مقـدره
خط حبري دمع عيني من على القرطاس ساح=ساهر الليـل الظليم ..والمدامع محبـره
يابو خالد زاد وجدي قلبـي المشتـاق نـاح=حيلتي با القـاف شوقـي للحبايـب أنثـره
الغنى والرزق غايه نورهـا مثـل الصبـاح=ومن بذل جهده وخاب ،، وآجب إنـا نعـذره
مارفضت الرزق والله كيف أرفض للفـلاح !=لكـن الله مايحمٌـل نفـس فـوق المقـدره
ربنا المعطي ويرزق ضيق ، وايضا إنشـراح=والخلق تعجز تحـرك دون فضلـه إشعـره
مانويت أذكر همومي مامضـى أقفـى وراح=احمد المولى على كل حـال وآجـب نشكـره
مابغيت اللوم لكـن شـوق قلبـي استبـاح=جيتكم والقلب حامل شـوق ،، يامـا أكثـره
صحت يمٌه هم قلبي فـي سمـا الاكـدار لاح=أخفي الاحزان فيني وسـط قلبـي واستـره
ياغلا قلبي بأسمـك قلبـي المشتـاق صـاح=لاطريتـي فـز قلبـي زال همٌـه وكــدره
ماقصدت البعد عنـك لكـن العزلـه سـلاح=تنقذ اللي اقـرب الأحبـاب أصبـح يحقـره
عز ناسـي حكيهـم مثـل طعنـات الرمـاح=قالو إن الوقت غالـي ، ، إبتعـد لا تهـدره
إيه أخوانـي ولكـن إنكشـف ذاك الوشـاح=ومن نكر دمه فلا به شك ، يـا مـا أقـذره
جودهم با القول هذا خالـد لمسكيـن طـاح=مالقيـت إلا النميمـه فـي كـلام وثرثـره
مالقيت العذب منهم صرت راضي با المـلاح=ببتعد مـادام كلـن صـار يعطينـي ظهـره
ورغم هذا الجور كله رغم نزفـي والجـراح=قلبي المشتاق ينسـى كـل جـرح ويستـره
مارقى طير وتعلى كود وسـط القـاع طـاح=وهذي الدنيا متـاع ,, تنتهـي بـا المقبـره
نرتجي رب البريه خالـق الكـون السمـاح=عل يعفو وعل يستـر كـل ذنـب ويغفـره

ــــــــــــــــــــــــــــــ ــــــــــــــــــــــــــــــ ـــ


القصيدة رقم ( 10)


يامن على خط السفر شل الخطـاب=للوالده ذي حبهـا وسـط القلـوب
ما مثل قلب الام تلقى قلـب طـاب=كله حنان وعطف والرحمه صبوب
يا امي يا اجمل ملاك بين القـراب=ياذا الزمن فرقتنـا بيـن الـدروب
كلامك اشهى شهد خلطاته رطـاب=ودفاء حضنك من قليبي ما يـذوب
والوالـد الله يحفظـه زاد العتـاب=زادت ضغوطه والعتاب شبه شبوب
من قل مالي قال سافـر كالشبـاب=فارق دياري غيب عنا بالغـروب
طعته وفارقت الديار والقلـب ذاب=من فرقة اهلي ذاب قلبي بالشعـوب
وربي كتب لي خيروللام استجـاب=وبالوضيفه جالب اموالـي جلـوب
في غربتي عرست بالبنت الربـاب=بنت الاصايل عنكم تسئل طـروب
تقول نسافر صوبها يا ابو شهـاب=رديت اكيد بالصبح ياريحي هبوب
من دون امي كل كوني في خـراب=قررت اعود لامي معي كل القلوب


ــــــــــــــــــــــــــــــ ــــــــــــــــــــــــــــــ ــــــــــــــــــــ


عشرةقصائد أتركها بين أياديكم البيضاء بكل فخر

وأرجو من الجميع بكل ثقة وأمانه أن يكتب ما يراه مناسباً ويستحق لكل قصيدة كلاً على حده ... و جميعاً نحن هنا نتعلم من بعضنا البعض .

والآن أترككم في رعاية الله وحفظه للتصويت


ملاحظة مهمة جداً
يجب التصويت على كل القصائد المشاركة جميعها بالنسبة المئوية
وسوف يستمر التقييّم لمدة خمسة أيام إبتداءً من اليوم