الانفراكة

[ناصر عبيد الهواوي]

يتبع لما قبله وفيه انفراكة=رغم انف ميزان الشعر جاك مفروك
لفه غشبم حاص مع هالدكاكة=ومن المطر حظه نقا الرمل مدكوك
يقول هالايام وش هالشياكة=واقول متقاعد وقال الف مبروك
يضحك ويفرك لثته في سواكه=صاحب وفي ما يلحقه ذم واشكوك
ان صار في تال القصيدة ركاكة=وش شفت في هالوقت ما هوب مركوك
يا صاح من حاكاك بالهون حاكه=اركد ورايك لا يجي حيل مربوك
اجهدت حتى ينظبط في انسباكه=لين استوى عجزه على الصدر محبوك
بلفظ قويم وسهل مابه لكاكة=يوم ان بعض الحكي بالحلق ملكوك
كلام ما يسوى ولا عود راكة=وكلام يسوى له ذهب ملي هالبوك
هاك الكلام اللي بلا حشو هاكه=ان كان ترغب بالدرر شوفها دوك