ولاعير سمعي للنقيلي ولا الوشّاي

[شجاع عمر الأكلبي]

أنا والله إني الشين لاشفت لي شنّاي=وأحسّب حساب المقدية والمواجيبي

على العز والناموس والطايلة مبداي=أشرف لها في عاليات المراقيبي

أصيب الهدف وأنقد على الطيّب الرماي=ليا شفت رميه مخطيٍ ماهو مصيبي

ومن زلة الغالين ماكبرك يابلواي=أغط الحدث خوف الشماميت تدريبي

ليا جا رفيقٍ داني وغالي وخطّاي=أبحشم جنابي عنه وأسحب مشاهيبي

وعن مجلسه بابعدك بالحيل يامركاي=وعن ما ورا حضرته بأقصر مطاليبي

أبا حد نفسي للسعة حيث فيها دواي=وأبشرب مع الأجواد عذب المشاريبي

ولا عير سمعي للنقيلي ولا الوشّاي=خباث النوايا مفرقين الأصاحيبي

وأببدي على من يعلم الخافية شكواي=سميع ٍ مجيب ٍ مايبيله مناديبي

وأبصم على صم الحصا جايرين عداي=وعلى الغش مازررك ببناق ياجيبي

وعلى ماكتب ربي بامشيك يادنياي=وشيٍ كتب في اللوح لاشك بيصيبي

عسى الله يجعل مع نبي الهدى ملفاي=عسى يستجيب لطلبتي عالم الغيبي