طول الهجر وطنشيا

[ناصر عبيد الهواوي]

يامن لقلب ٍ الى قلنا سلا رد وبلشيا=والى دله بالنهار تعاود همومه مع الليل
الى تذكر بعض ما فات صاب الفكر غشيا=عنيد لا شال شيله ما تفيد ابه التعاليل
من قو رجفه ضلوعي صابني عليه خشيا=واضيع انا معه بآهات وتناهيت وغرابيل
ان برين المرمسات من الجروح يبين نشيا=واظنه ادمن على كثر المشاكل والبهاذيل
وابا اكتم السر مثل اول لكن السر فشيا=ومسامعي جرحوها الناس في كثر الأقاويل
حشت شرايين قلبي هالهموم القشر حشيا=ما عاد اجمع وذاكرتي غشاها ضعف بالحيل
اسج مرات واترك موتري واروح مشيا=وبين الركوع وسجودي بالصلاة ابدع تماثيل
وابين اشيا من الضيقات فيني واخفي اشيا=واعض الابهام بسنوني ولا نقد الرياجيل
رباطة الجاش والصملة ومرجلتي تلشيا=ومن اول اظن في نفسي ظنون امست تهاويل
والسبة اللي من الخلقة على الوجنات وشيا=تضفي عليه النواعس من هدب عكشن مظاليل
لو في قماش الحرير الناعم الخده محشيا=تشوف من دمه الزاكي مواري بالمناديل
ياعين حر ٍيتلتل برقعه توه وحشيا=والقد غصن الغضا الممطور في روس الغراميل
بياض خده ضوا برق ٍتلامع وارتهشيا=في مزنة ٍجاء لماطرها مع الصفرة هماليل
والجيد جيد الغزيل شاف ذيرة وارتعشيا=والراس ذيل ادهم ٍشعشع مغير امع اول الخيل
ان كان زاد الصدود وطوٌل الهجر وطنشيا=ادعو لخوكم تعمه رحمة الله يالمشاكيل