يغار محسن او يغار ابن لعبون

[احمد الجريفاني]

يا عزوتي لا يقفل الخط تكفين=خطن وصلني فيك خليه مشحون
حطيه (صامت) لا نويتي تنامين=ما ودي العذال لا دق ياعون
واذا صحيتي طالعي فيه تلقين=الف اتصال من الذي فيك مفتون
ومن الرسايل تتعبي لو تعدين=الذاكره ما خزنت غير مليون
اعرف منهوا يا غناتي تحبين=اللي تحبينه تره فيك مجنون
وادري بانك يا غلى الروح تدرين=عن ما بقلبي من تباريح وشجون
واني اسير الوجد والسهد والبين=وان الفواد لمنوة القلب مرهون
سوي بي اللي تشتهينه تمونين=هو فيه غيرك يا بعد روحي يمون
يامن لها مسكان با القلب والعين=ما فيه غيرك شخص اسميه مضنون
ما دمت احبك يا الغلى لا تخافين=خلي جميع الناس با الحب يدرون
انا اتحدى بك جميع المزايين= يغار محسن او يغار ابن لعبون
دام الغلى ما بيننا زين في زين=وحنا مثال لكل منهم يحبون
تدلعي بمشي على ما تودين=محلى الدلع لاصار راعيه مزيون
وابيك لا منك وقفتي تصلين=تدعين يجمع شملنا خالق الكون