يا حمود هاك العلم

[ماجد الزيد]

بمناسبة زيارتي تلبية ٍ لدعوة بني العم خوالد حائل
واقول
http://up.fatahilah.com/up/uploads/3c349834c3.mp3


سلام منّي فايح ٍ بازرق العود=ومبهر ٍ من دم قلبي بدلّه
صبيت لي فنجال يغني عن شدود=حماسة الهبسي طبيعة من الله
يا حمود هاك العلم يا حمود يا حمود=الطيب والناموس انتم هلن له
يا معرّب الجدّين يا راعي الجود=يالسّيف ابو حدّين خطو الاهلّه
سلّم على الضاري ابو سبعة فهود =القرم ابو ضاري ومن ثم قل له
ما بغيركم نقْصٍ ولكن بكم زود=يا اخوان شمّا يالنّجوم المدلّه
زانت آجا وسلمى بكم شيخة الخود=حايل بكم يا قرومها مستهلّه
كبار البيوت اهل السّطر مِنَّع الذّود=اهل البطر ريح المطر حين هلّه
ما ينبنى بيت العرب دون عامود=وانتم عمود البيت كل ٍ يدلّه
منسل امير الحرب من خالد العود=الله على ارقاب النماريد سلّه
جدّي وجدّك ليث قايد له أسود=وحنّا عياله وارثينن محلّه
ربعي بني خالد كما قلت يا حمود=ونا فتى هَبس ٍ فلا احيد لله
جيش ٍ عرمرم لا على الجوّ بارود=والي ربط حبل الوفا ما يفله
ما اقول من عند الحديثة للاخدود=تحت السّماء بايّات أرض ٍ تقله
لولا الله وثم الخوالد فلا آسود= والخالدي دمّي فدن له فدن له
حنّا هل الطولات والضّد مقرود=وحنّا هل الحيزا هل الطّيب جلّه
شدنا الدّول حدها مثل شامخ الطود=يعني اكتفاء ذاتي على خير ملّه
في كل ريع شهود .قصر ٍ ومشهود=والا الفخر من دون الاشهاد قِلّه
وفخر ٍ بلا وصل ٍ للارحام منقود=ووصل ٍ بلا دوم العلاقات . عِلّه
الله فتح باب ٍ له اعوام موصود=وصار الشّمل شمل ٍ وهو كان ثُلّه
هبّت هبايب هَبْس هبّت تقل نود=هبايب ٍ شالت عن القلب غلِّه
يا حمود انا للطيب قيفاني جنود=وإلا على كبد الردي تقول مله
وجهه بياض ومخفي ٍ قلبه السّود=وانتم بياض وجيه وقلوب كلّه
ضلعان حايل تطلع اصغر من الدود=لو جيت اقارنها بكم .مستقله
صغيركم قلبه من حجار بالود=وكبيركم فيه المراجل جبلّه
عمّ السلام وخصّ لي زيد1 يا حمود=فرز الوغى كاني اعرْف الشّبله
ال هبس به له حاجة ٍ يوم موعود=يركي على كبود المعادين ذلِه
به طنخة ٍ تطبخ وبه زايد الفود=لو ينطح الكايد وكاد إن يشلّه
درب العلا ماهو رياحين و ورود=عسّرن على اللي همّته ما تشلّه
ارقى بها يا زيد . وطلوعك سنود=وتحيزم بصبر الجمال المكلّه
ون بان لك من صاحبك شيٍّ يكود=سامح وخلّه , والليالي تدلّه
وعليك بالثّنتين والعالم رقود=اتل الكتاب وصل والدّمع هِلّه
احد ٍ يموت اسمه مع النّاس موجود!=واحد فنى وطاريه شمس ٍ مطله
خلّد نباك وخلّ ربعك بك ترود=و من دونهم يا زيد عمرك وتلّه
راس ٍ بلا ربع ٍ . من الوقت مضهود=والقوم ون زادوا بلا راس . قله
خذها من اللي بين ضلعيه صاهود=جبري وحوش الجنّ له مستذله
دزّيتها يا زيد مع ازرق العود=والقاف بعد سنين ودّي تحلّه
وصلاة ربّي عدّ ماذعذع النود=وطيبٍ بْكم يا زيد انتم هلن له