الرجل لا منّه فعل كل الاسباب

[الطائر المهاجر]

الرجل لا منّه فعل كل الاسباب= محدٍ يلومه لو خسر في نتاجه
امرٍ مقدّر قدره رب الارباب= يسري على المخلوق في كل حاجه
فليا تلوم النفس في عذل وعتاب= وليا يصيبك خوف مثل الدجاجه
انسف وراك اللي مضى مابه حساب= وانظر امامك واثقٍ بابتهاجه
خلك جبل راسي ولا همه عباب= تتكسر الأمواج لاجت بلاجه
وسرك اذا منه طلع منك للباب = يصير ملك اللي يدور رواجه
فلا تشتكي للناس لو كانوا اقراب= فشكوى لغير الله تراها سماجه
ولاضاق صدرك فاتجه صوب محراب= وارفع يديك لْمن قضى كل حاجه
واصبر على ماجاك لو كنت منصاب= فالمؤمن اللي للمصيبه يواجه
مكتوب والمكتوب ماعنه مجناب= واجب قبوله دون ادنى لجاجه
والصبر في الضيقات من خير الاطباب= مهما يزيد الغم صبرك علاجه
فالليل مهما طال بهموم واتعاب= يتبعه فجرٍ ينتهي بانبلاجه