خلك قوي

[حمود السكراني]

يامنزوي تبني أماني = بالمكان المنزوي
نيل المقاصد مايجي =لك في مكانك منزوي
هيهات لوهو بالتمني =كم فقير أمسى اغنوي
بس الأماني من طردها =مات وهو ممسى اغنوي
خلك قوي ترى الحياة =ما يعيش فيها إلاقوي
ما تستطيع تعيشها = الدنيا اذا منته قوي
لاتنتظر فزعة خوي = ماكان بالدنيا خوي
أحذر ترى اول مايصكك =بالردى كف الخوي
خذها كوي عن علةٍ =مايفيد فيها الا كوي
من واحدٍٍ سود الليالي =مكتوي منها كوي
قم عز نفسك لوجبرك =الوقت دربٍ ملتوي
ترى وهجها لقبلت = يبسط طريقٍ ملتوي
والناس دايم شفها =نبع الحياة المرتوي
لاجف نبعك من ظماء =ماجاك وارد يرتوي
والصيدة اللي ترتجي =لموا حطبها للشوي
خل التمني وانتهض =مايفيدها صبرك شوي
انظر سماء صقر ونسر =حولك به ذياب اتعوي
لا تنتظرها سالمة =نسرٍ صرخ ذيب أيعوي
مالمها حيٍ سوي =لو قيل لك هذا سوي
صعبة مهرها مايطاق =يبلش بها الحي السوي
كانك تبي في دنيتك =من كل شيءٍ تحتوي
خلك بهالدنيا بحر =من كل شيٍء محتوي
أدعس مسامير الخطر =وطوي مسافاته طوي
واغنم حياة ايامها =تطوي خلايقها طوي
ميزت هالدنيا كثير =ماتعشق الا مهتوي
من دق باب أمجادها =قالت هلا يامهتوي