ذود المشاعر

[صعبة المنال]

الشعر طيرٍ عنيد وصار لـه مـده +++ يمر حدب الضلوع ويختفي فيهـا

القلب وكـره وليامنّـه شلـع رده +++ والنادره ف الفضاء عينه تراعيها

يبي شعورٍعلى مطلاعـه أيحـده +++ حتى يفج الضلوع ومعه يطويهـا

والفكر ذوقه رفيع ويمـه ايشـده +++ والذايقه من فضاء الإبداع يرويها

نداوي الشعر من مثله ومن قـده +++ مخالبه تصقط الجزلـه وتدميهـا

ماني مضريه يخلط مزحه وجِـده +++ علامة الجد ف حروفـه مواريهـا

واليوم أبا اعطيه روح الفكر وأهده +++ وأعطيه حريـةٍ محـدٍ يساويهـا

كله لجل من تسوق العشق وتمده +++ في روح وعيون عاشقها ومغليها

تسوق ذود المشاعر سوق وتوده +++ مع جرهد البيد ترعاها وتحميهـا

تسوقها فـي غـرورٍ كـلٍ ايعـده +++ مغرورةٍ ف أول الدنيـا وتاليهـا

تحدى حداها وتاقف قدمهـا نِـده+++ ولسيرة المجد والتاريـخ تدعيهـا

كم من عزيزٍ بغاها صعّرت خـده +++ هام ف هواها وتكبّر لجل يرضيها

مايدري أنه مجرد معجـب أتعـده +++ ما كل الأزوال تعجبهـا وتغريهـا

أليا أدبرت طرفها للخلف ما تلـده +++ زعامة القوم مبدا مـن مباديهـا

مثل البحر لاقبلت في جزره ومـده +++ كل الكتابات فوق السيف يمحيهـا

ألها دروب الصبا والغـي ممتـده +++ ف دروبها أرواح تذبحها وتحييها

تحب مبدا الوضوح ليا طغى ضده +++ وتحب الأشياء تسميها بساميهـا

معها وداع القلوب ولوعة الصـده +++ ومعها عذاب الغياب وحلم أمانيها

وصلت لصدر القصيد وبيحّت سده +++ وجتها القصايـد جزيلاتٍ معانيهـا


للشاعر : عبيد البديري