اعمل المعروف وارمه في بحر

[الطائر المهاجر]

اعمل المعروف وارمه في بحر = ولا تفكر بالربح والاّ الخساره
واعرف انه لو يجي منه الضرر= جالبٍ للخير لو طال انتظاره
ادري انك قد تواجه من نكر = جاحد المعروف يحسبها شطاره
وقد تلاقي من يبادرك الشكر= لو نسيته دايمٍ فيك افتكاره
كلمةٍ تشعر بها عز وفخر = من بعيد وجاهل ملفى دياره
تذكرك عن فعل في ماض انحسر = وتدفعك للخير ما تترك مساره
وكلمةٍ من جاهلٍ فيها عبر = لو تحس بحرقها مثل الشراره
تدرك ان الخلق إلا ما ندر = تجحد المعروف في عصر الحضاره
تكشف الشدات انواع البشر= وتعرف الشيهان واشباه الحباره
فالرجل ماهو بماله لو كثر = ولا هو بأصله وفصله وافتخاره
الرجل مثل الذهب طول الدهر= ما تأثر بالبروده و الحراره
والرجل منهو تسامح لااقتدر = ماهو اللي كل همه اخذ ثاره
شعبثيٍ ف المشاكل له نظر= كل يومٍ في المحاكم له خفاره
ينصر الظالم على ضعيف احتقر= وياكل حقوقه بظلمه والفجاره
والرجل بالفعل ماهو بالظهر = ياصل لعلياه عن جد وجداره
حوله رجالٍ تنقى في حذر= مابهم خادع ولا فيهم خكاره
كالمرايه صادقه للي نظر = ما تشوه للحقايق في مهاره
الوطن بقلوبهم سر وجهر = والمواطن همهم في كل غاره
والرجل من يعرف الله ما كفر= دائماً يخشاه في السر وجهاره
ما يتاجر بالعقيده لو طفر = ولا ينافق شان ياصل للصداره
التواضع منهجه مهما كبر = ما تغيّره المناصب والتجاره
عارفٍ للعمر لو طال وقصر = بالنهاية راحل بغير اختياره