ياحماة الشعر ردوا بالجميل ,,,,

[حرف وشعر]

ياقوافي ذوقهن كالسلسبيل= ياقراح الشعر من فيض النهر
يامزو(ن) من بديعات المثيل=يافصوص الماس فى وسط السطر
يانجوم (ن) نورت والوقت ليل=ياخيوط الشمس من بعد السحر
ياشعور (ن) فاض من فظل الجليل= يامشاعر صورت عذب الصور
ارفعيني فوق هامات النخيل= واكتبي اسمي على سطح القمر
الشعر لوكان مدعات الهبيل= كان كل الناس ابدع واشتهر
الشعر كالزيت فى خيط الفتيل=او كما بدر(ن) بدا نصف الشهر
الشعر احساس بالحرف الجميل= روح تسري فى البدن قبل الحبر
الشعر عندي كما الحر الاصيل= لا دعيته بالعجل عندي حضر
اعشق النص الزنيدي والثقيل= ماتضعضع فى المباني وانكسر
واستمج الحرف فى النص الهزيل=يوم اشوفه ضاق صدري ياعمر
ياحماة الشعر ردوا بالجميل= الشعر يشكوا مطاعن بالظهر
من يدافع عنك يالبحر الطويل=والفرزدق لو يشوفك ماصبر
ولو يشوف الحال هذاك الضليل= ذا القروح اللي بشعره مشتهر
كان ترّك كل قول وكل قيل=واعتزل ياصاحبي قرض الشعر
السموحه ياشعر شعبك بخيل= اعتذر لك واعتذر لك واعتذر
والمصيبه جاك بعد الجيل جيل= مالهم بالشعر حس ولانظر
مير هرج (ن) بالدعاوي والطبيل= ومن حضر يبكي علي المسرح قهر
وشاعرات(ن) مالهن بالشعر طيل= مادرن كيف القوافي تنجبر
ما اعيب البنت والشعر الجزيل= كم بنت (ن) فى الشعر مثل البحر
البنات اللي سحايبهن هميل= هل وبل الشعر منهن وانهمر
كنهن فى محضر الشعر الاصيل= مثل خيل السبق والفارس ضفر
مير انا عيب الجهولي والدخيل = من كلا الجنسين انثي او ذكر
من نصوص(ن) ذابلات (ن) كالذبيل= مالها راس (ن) ولا وجه وظهر
او نصوص جامدات الحس حيل= والمصيبه ذي على نصف البشر
او نصوص (ن) بالركاكه تستخيل=لا قريت النص ودك تنتحر