[الـزلـزال]

ياصقر وش لك في كثير الحراوي = متروح للبندر تلاقي السكينة
وتركب من اليابان وارد عراوي = وتشوف ريا كيف جارت سكينة
ياصقر قلي ليه منته بقاوي = تترك براري كل ابوها حزينة
شكلك مع البران ياصقر هاوي = وشكلك تدور كيف ريشك تشينة
قالوا بسوق الحضر شمبو مداوي = وبلسم مع الشمبو لريشك يزينة
وبرقع تبرقع به وربي يساوي = حر السجين الي عسى الله يعينة
والكل يم الشكل شكلك يلاوي = يرجي لريشك كيف يلمس يدينة
والي معك مبسوط يومة يخاوي = صقر وكل الخلق تنظر لزينة
وتاكل من الكبدة وتاكل كلاوي = وتدعي على الحرمان يقطع سنينة
وأنته سجين وكل ليلك يواوي = والسجن بعض أحيان محدآ يدينة
مدام سجانك على الطيب ناوي = منته مردد كل سجني مهينة
ياصقر جاك الحظ جاء لك سماوي = ولحدآ بقد الصقر يسكن مدينة
صحيح وسط المدن تلقى البلاوي = وجنب المدن كلآ يفاخر بعينة
بعطيك بعض أشكال منها مساوي = وأشكال كل الطيب ياهي تبينة
رجلآ يداعي ولد عمه دعاوي = ورجلآ تبرى من حياه وجنينة
وحرمه مع الدنيا تصيح وتماوي = وحرمه تدور كيف تصبح لعينة
وطفلآ تمكيج لجل يصبح حياوي = وطفلآ حلوم الرعب يمه رهينة
وشيخأ يشوف الجرح ماهو يداوي = وشيخآ يقول الذل ماهو غبينة
نادر تلاقي من يحبك هواوي = ونادر تلاقي من يقدر جبينة
الله يزيل الي من الطيب خاوي = والله يشتت من يشتت عوينة
بقول لك ياصقر منته بغاوي =تسمع كلامي يوم جالك ونينة
أحسن تعيش الحين تبقى خلاوي = عيشة خلى قالوا وقالوا ثمينة
جيتك بعلمي جيت يمك شقاوي = وجاك الكلام الي يسابق حنينة
خابت بي الدنيا وخابت هقاوي = كنت أعتبرها في حياتي سمينة
من وين مالديت جتني البكاوي = الي على الخافق تزيد وتهينة
وياصقر بختم لك بكثر الدعاوي = يالله عسى دنياك دنيا رزينة
وبقول لك زود وزود حراوي = وأبعد عن البندر تلاقي السكينة