[الطائر المهاجر]

لا تنشديني بعد ما صرت شايب = عن حالتي فالحـال من دون في دون
ولا تسأليني في زمان العجايب = منهو انا مدري ولا اظن يدرون
لو كان لي اسم وهويه فغايب = حيث انني رقم ولا هوب مضمون
ياسرع ما يمسح بفعل الهبايب = مثله مثل غيره اذا جاء المعزون
غـايب بوقتٍ كل ما فيه عايب = من وين ما وجّهت لا قيت فرعون
ظلم وغـدر والكذب في كل نايب = ومن لا ينـافق قالوا الناس مجنون
وان كان لك حقٍ فلا شك سايب= من دون (واوٍ) أو ظهر فوق قانـون
وان كنت ظالم لا تخاف الطلايب= احلف ويكفـي لو سرقت الف مليون
وان كنت مسؤلٍ تجيب القرايب= لا شي يمشي دونمـا السير مدهـون
وين الوظايف للشباب اللهـايب= الفقـر خـلاّهم من القهر يبكون
حتى الدراسة ما تبيهم زلايـب= مجموعهم ناقص ولو صار تسعـون
والواو تجبر ما نقص من معايب= حتى ولو وافـد وما معْه سبعـون
وان كنت خـادم راتبك للضرايب= من غير ما تعلن ترى الناس يدرون
ونقول ليش الجرم ليش النهايب = وليش الأجـانب يسرقوا ما يذلّـون
وليش الفساد بدارنا والغـرايب= وليش المخدر والضحـايا يزيـدون
وليش المواطن دايم الدوم هايب = يسكت لأنه ما لقى إذن وعيــون
وليش الدعاء يرفض فهذي عقايب= وشلون تمطر والخلايق يكفرون
فالـدين أصبح ستره لكل خـايب = واللي ضميره حي بالحيل مغبـون
شرّاية الدنيـا ألا وين تـايب = من قبل ما يرحـل وبالقبر مدفـون