الجزء الثالث والخمسين


وصلوا قوم عبدالله كوالالمبور الصبح...كان هوغافي بعد مانامت عنود في الطياره من التعب... نش وهو معقد حياته ويسمع الاصوات ..التفت على يساره حصل راس عنود متساند على جتفه...ولاويه على ايده اليسرى كانه بيشرد عنها...ابتسم ..
عبدالله: عنووودي...حياتي قومي وصلنا..
مانشت...مد ايده ومسك ايدها يهزها..
عبدالله: عنوووووووود...
فزت عنود من رقدتها واستغربت مكانها شوي..
عنود: هااااا...
سكت عبدالله عنها لين ماتستوعب وين هي وهوقاعد يراقبها...فركت عنود ويهها بايدها والتفتت له..
عبدالله: وصلنا عيوني..
عنود: ابا اسير الحمام... ابا اتغسل..
عبدالله: سيري انزين..
عنود: تعال وياي...
نش عبدالله معاها ووداها الحمام اللي في الطايره..تغسلت وهو بعد تغسل عشان يصحصحون شوي..عقب رجعوا خذوا اغراضهم ونزلوا من الطياره..وعنود متمسكه في ايد عبدالله بقوو.. كانه بيطير عنها..اطالع حواليها باعجاب ممزوج باستغراب...
التقوا عبدالله وعنود مع المرشد اللي عبدالله متفق معاه من الاول.. ووداهم فندق حجزوا فيه .. وخذوا رقم المرشد عساس يتصلوبه يوم بيجهزون ويبون يطلعون...المرشد كان مصري.. يسمونه ابو محمدود...والظاهر روحه مرحه من اول ماشافهم قام ينكت ويسولف...
اول ماوصلوا الغرفه قامت عنود تفتش... بس كان كل شي تمام..بالمقابل عبدالله اول ماوصل عق بعمره عالشبريه وعلى ويهه...وهو يتنهد بتعب... طلعت عنود من الحمام بعد ماتفحصته.. وشافت عبدالله وابتسمت..راحت صوب الكبت تعلق شيلتها وعباتها..
عنود: تعبان عبادي..؟؟
عبدالله: همممممممم ...وايد...ظهري بينكسر من يلسة الطياره ولا رقدت بعد...
عنود: حتى انا مارقدت عدل...
ظحك عبدالله ظحكة مخنوقة..واعتدل وانسدح على ظهره ويديه ورا راسه..
عبدالله: مارقدتي..؟؟ متشبصة بايدي ومتسانده عجتفي ونخيرج واصل اخر الطياره ...ومارقدتي..؟؟؟
انصدمت عنود.. ووقفت وهي تبحلق في ويه عبدالله..
عنود: احـــــــــــــلـــــف اني كنت اناخر..؟؟
عبدالله: ههههههههههههههه ...
ارتاحت عنوود...ويت يلست عداله عالشبريه...
عنود: روعتني...احيد عمري انا بعد ماناخر...بس والله ما ارتحت برقادي...
ابتسم عبدالله ومد ايده ومسك ايدها يتفحص الدبله ويلعب بها بصبعه...
عبدالله: حلوة ماليزيا..؟!!..
عنود: ماشفنا غير المطار...ههههههه بس المناطق اللي مرينا بها حلوه كلها خضرة.. وفي اماكن متطوره بعد توقعت انهم عايشين حياة اول..
عبدالله: وايد مدحوها لي الصراحه وقمت ماشي الا هي بسيرلها ويا عنود ان شا ءالله...بس على فكره مابنقعد هني طول الشهر..بنتحوط في الدول المجاورة والجزر...
عنود: احلى شي الجزء.... مشكووور الغالي لانك يبتني هني .. زييييييين انه يبنا الكاميرا ويانا عشان نصور نراويهم...
عبدالله: تراوينهم اسرارنا ويا هالويه...؟!!
عنود: ههههههههههه حرام اكيد يبن يشوفن المناطق اللي رحنالها...عادي بيستانسن...
عبدالله: امي موصتني اتصلبها يوم اوصل...وانا مافيني..
عنود: هات انا بتصلها وبطمنها..
عبدالله: بتطلب انها ترمسني وانا مافيني احين ابا اتسبح وارقد بسسسسسسس...
عنود: انزين بقولها انك راقد...حرام عليك شحقه مافيك تكلمها؟؟؟
عبدالله: خليها الحين الوقت مايندرا عندهم كم...بعدين بتصلبها يوم بنش...
عنود: اطلع لك ثيابك..؟؟
عبدالله: بتسوين زين...انا بدش اتسبح....
يلس عالشبريه وعطى عنود بوسه عالسريع على خدها ودخل الحمام.. عنود حطت ايدها على مكان البوسه وهي تبتسم بحيااا.. هزت راسها وهي تظحك..عبدالله شيطان... نشت وفتحت شنطته اطلع له ملابسه الي يباهن...وبعد ماخلصت قامت تفتح الشنط وتحط بعض الملابس في غرفة الملابس وترتبهن..ماحطت كل الملابس لانهم مابيكملون شهر هني..بس اسبوع.. طلع عبدالله من الحمام ولبس ملابسه وانسدح عالشبريه...
عبدالله: عنووووووووود...تعالي همزيني...
ظحكت عنود هالشي...كانت تتوقع انه بيطلب منها هموز...لانها تدريبه من اول انه يموت وحد يهمزه قبل مايرقد او اول ماينش...يتفجج ويكيف...

خليفه كان محتار..متى يرد يكلم ابوه في الموضوع..مايحب يكون لجوج... بس خاف انه حد غير معروف يسبقة مره ثانيه...حصه كانت وايد حلوه في العرس...واكيد وايد حريم حطن العين عليها بما ان نوره مخطوووبه اوووريدي...طلع من غرفته وسفرته على جتفه... خير البر عاجله...
كان الوقت بعد صلاة المغرب...نزل تحت حصل ابوه وامه وحرمه حميد وعيالها..سلم عليهم ويلس...
خليفه: ابوويه... احم..متى تبانا نسير عند قوم عمي..؟؟ عشان الموضوع اللي خبرتك عنه...
فكر شوي بو سلطان..وام سلطان هالمره ما ادخلت ابدا...
بو سلطان: عزمت ابويه..؟؟
خليفه: ان شاء الله...
بو سلطان: باجر بنتغدى عندهم..
خليفه: شقا نتغدى ابويه عندي دوام انا..
بو سلطان: عيل عقب المغرب بنسيرله ...
خليفه: على خير ان شاء الله...
نش خليفه لانه يستحي يقعد مع حريم خوانه... وطلع برا البيت ..كان مظايق بانه مايقدر يسير بيت عمه لانه عبدالله مب هناك...ويستحي صراحه يسير...يوم طلع برا البيت شاف حمدان ماسك فوز الزراعه ويغسسل سيارته...يلس خليفه على الدري الجدامي للبيت وهو يطالع اخوه..
خليفه: اعتقد فيه مغاسل في العين... اقرب وحدة عدال الشيشه اخر الشارع هذا...
حمدان: حرام الواحد يتسلى...
خليفه: عاد خيست البيت كله مياهه...
حمدان: ههههههههه..احين امك بتي تربع مستانسه اتحسبه مطر ...
ابتسم خليفه وسكت... وحمدان خلص من تغسيل السياره وسحب الفوز لين تحت النخله وحطه..وزعج..
حمدان: علوووووووووووه... اطالع عالماااي هاااا..!!!...
ورد للسياره وبطل البيبان وقعد ينظفها من داخل ويطلع الزباله ويفرها..وكل مايطلع زباله يرفع نظرة لخليفه بتفحص...
حمدان: بلاك مويم..؟؟!!!...
خليفه: ماشي... رمست ابويه...باجر بنسير عند عمي نرمسه عشان حصه...بتي ويانا.؟؟
حمدان: والله.؟... اكيــــــــــــــــــد ان شاء الله بسير وياكم ...
سكر حمدان بيبان السياره ونفض ايده .. يا صوب خليفه وقعد عداله...
حمدان: على فكره...يوم السبت رمست حصه...طلبت منها تفنش...ووافقت..
عقد خليفه حياته والتفت لحمدان بحدة...
خليفه: ليش.؟!!!...
حمدان: احم... راشد ذاك اليوم تخبرني...اون شفت اخوك يشل موظفة ويوديها المستشفى ..ويوم سال عرف ان حصه بنت عمنا... (هز راسه حمدان).. ماحقيتها لحصه الصراحه انهاتشتغل ويا واحد من ربعي..قتلها فنشي ..ووافقت...
هز خليفه راسه..موافق على تصرف اخوه...فعلا هو بنفسه كان بيطلب منها هالشي لكن بعد مايخطبها ...لكن ماعليه دام انها وافقت وبتفنش هذا هو المطلوب... فجاه خطر فبال خليفه شي...سهى عنه من قبل...نش عن الدري وسار صوب سيارته .. وحمدان يطالعه ومافكر يساله وين ساير....يطالعه بحسد وهو يريوس بسيارته ويطلع...
ياحظك طلعت.. الا انا قاعد اتعلث بالتغسيل والتنظيف عشان اشرد من الدراسه...وراي امتحان ولازم ادرسله.. اوووووووفف... نش من الدري ودخل البيت وعلى طول لغرفته ...وفرش كتبه واوراقه عالشبرية مثل ماتعود يوم يدرس...
مسك خليفه تيلفونه وقعد يدور رقم سالم اخو المرحوم سيف...واتصلبه وقاله انه يبا يشوفه هو وامه اذا ماكانوا مشغولين او مرتبطين...ورحب به سالم وقاله انه موجود في البيت وحيالله في أي وقت ... سكر خليفه عن سالم وهو متاكد من ان اللي بيسويه هو عين الصواب... وصل بيت المرحوم...وتسرّط وهو يركز عالمنطقة الفاظيه جدام البيت اللي سيف متعود يوقف سيارته فيها....غمض عيونه يحاول يتمالك الشعور اللي تملكه للذكرى...نزل من السياره ودخل البيت.. سالم كان يترياه.. سالم وسيف يتشابهون..ولاول وهله تراواله سيف يظحك له..بعد على طول تلاشت الصورة من نظرة وشاف ويه اخشن واكبر من ويه المرحوم... سلم عليه ورحب به سالم للميلس اللي كان فاظي.. وقعد يسولف وياه ويتخبره عن عرس عبدالله واحواله كلها.. وبعد ربع ساعه من السوالف..
خليفه: عيل وين الوالده..؟؟
سالم: دقيقه بزقرها ..
طلع سالم شوي ورجع دخل ويلس..
سالم: احين بتي...
خليفه: اخاف ييتكم فوقت مب مناسب سالم..
سالم: لالالالالالالا افا عليك ياخليفه البيت بيتك متى ييت حياك الله والله...
دخلت العيوز متبرقعة ومتحجبه بشيله سودا عووده..مالت عيايز...
ام سالم: يااااامرحبا ..يااامرحبا بمن يااانا...هلا بخلييفه...
نش خليفه احتراما لها..
خليفه: مرحبابج اكثر خالوووه شحالج عساج طيبه..؟؟
ام سالم: بخيييييير ياولدي بخير وعافيه انته شحالك وشحال امك واهلك..؟؟ وبيت عمك.؟؟
خليفه: كلهم بخير وسهاله..عسى ماازعجناج خالوه..
ام سالم: افا عليك ياخليفه انته مثل ولدي وماصدقنا نشوفك ...
خليفه: اله يخليج ويبقيج خالوه...استريحي ابغيج انتي وسالم فرمسه...
يسلت ام سالم عدال ولدها ويلسوا هم من بعدها...
ام سالم: خير ياولدي..
خليفه: خير ان شاء الله... خالووه انا... احم...صراحه مستحي منج ومب عارف شو اقول...
ام سالم: خذ راحتك ابويه شوفيك خوفتني..؟!
خليفه: مافي داعي للخوف...بس..آآآ,,,,انا بدخل بالموضوع سيده.... احم..
كان خليفه مرتبك حده وقافط ..ومب عارف كيف يتكلم بالسالفه...
خليفه: انا ياي اقولكم شي..وماحبيت تسمعونه من غيري..مثل ماتعرفون..حصة ..ارملة المرحوم سيف...هي بنت عمي...وووو... باذن الله انا..ناوي اني اروح ..مع الوالد واخطبها باجر ان شاء الله...
ابتسم سالم بحزن وهداوة.. والعيوز بحلقت بخليفه...
خليفه: انا ماحبيت اخطب و بعدين اخبركم..وبنفس الوقت مابغيت تسمعون هالشي من غيري...لا تحطون بخاطركم علي... مثل ماتعرفون حصه مازالت بنت.. ومحتاجه ريال حالها حال أي بنت...عشان يحفظها ويصونها...
ام سالم: منو قالك ياولدي انه نحن حاطين بخواطرنا عليك...بالعكس..فرحتني وطمنتني على مستقبل هالبنت.. من عقب ما غاب ولدي وانا احاتيها ..واحاتي مستقبلها...
سكتت شوي وعيونها ادمع...شكلها بتفتح مناحه...مسكينه..ذكرتها بولدها بس شو اسوي...حسيت اني لازم ابلغهم.. من باب الادب والعشره يعني..
ردت العيوز تكمل.. وهي تحاول تتمالك دموعها..وتمشهن بشيلتها.. هالشي بروحه خلا خليفه يعورة حلجه من العبره اللي خانقتنه...
ام سالم: الله يوفقك ياولدي وتقدر تسعدها .... الله يوفقك..
نشت العيوز وطلعت وهي امره خلاص تصيح... نزل خليفه راسه وهو يتمالك نفسه.. وحاول يبتسم..
خليفه: زعلنا عيوزك ياسالم.. اسمحلي..
سالم: ماعليك.. هي من تسمع طاريه صاحت..بس ابا اسالك سؤال...
خليفه: اسال..
سالم: كنت تبا حصه من قبل مايخطبها المرحوم.؟؟؟
ارتبك خليفه..ابدا ما توقع هالسؤال...وهو مايروم يجذب..... ابتسم ابتسامه صغيره..
خليفه: هممم.... ماكنت متاكد وايد من رغبتي... بس الحين تاكدت..وحصه ماتتعوض...وفوق هذا بنت عمي..
سالم: ولد اصول يا خليفه...الله يوفقك فحياتك وياها...وان شاء الله تسعدك وتسعدها...
خليفه: آمين...تسلم ياسااالم... ماقصرت.. عيل اترخص انا عنكم..
سالم: لا وين.؟؟ والله العشا عندنا...امرره حلفت لا تناقشني...
خليفه: ياريااااال والله ماله داعي..
سالم: خلاص عاد حلفت ولا تردني..تعشا عندنا الليله من زمان ماخذنا علومك..
وافق خليفه ويلس معاه وعقب شوي يا اخو سالم اللي اصغر من سيف هو وربيعه وقعدوا كلهم رباعه..

في بيت حمد..سكرت ام خالد السماعة وهي تبتسم...
ام خالد: يعلني ماخلا منه ...مستانس...
نورة: انا اغااااار...
حصة: عشان قالت يعلني ماخلا...؟
نورة: لا...ابا اسافر...ابا اسير عندهم مالي خص...
فطيم: ناسيه الدراسه.؟؟ وين تبين ترزين بالفيس.؟!!
ام خالد: تريي لين ماتعرسين يمكن يتكرم عليج ولد هلال يوديج مكان...
حصه: ههههههههههههاي...حلوه امايه...
نورة: شحقه يتكرم عليه.؟؟ غصبن عنه بيسفرني..
فطيم: وييييييييه الله يعينك ياخويه...وين تبين تسيرين نورة خانوم.؟
نورة: اول شي ابا اسير اسبانيا...
حصه: هي ..عند الغلا واليلا....
نورة: مالي خص...وعقب ابا اسير الهند....
فطيم: اول شي تبا تعبر فلوسه فاسبانيا ويوم يتم شوي فلوس بتروح الهند لانها رخيصه... مكاره بنتج عمووه...
ام خالد: جان ريتي...!!..مب زد عن ناصر وعبدالله مشابهتنهم بالمكر..ومن قبلهم حمد...
نورة: عيل وين تبيني ادق براسي امايه..؟؟ بلاد عربية ماريد...
ام خالد: والله انتي وسعيد تشاوروا انا مايخصني...
في ماليزيا عبدالله وعنود كانوا عايشين احلى ايااااام.... الحب اللي كانوا يحسون فيه ايام الملجه مايسوى شي جدام الحب اليديد هذا ...شخصياتهم المختلفه كانت متناسبه وايد ... يفهمون على بعض بسرعه..يراعون مشاعر بعض... ولهم حركه غريبه..اشتروا دفتر صغير.. معاه قلم... كل مايظاربون مهما كانت ظرابه صغيره يسجلونها في الدفتر.. عبدالله 1 – عنود 0 ... ويظحكون بعدها عالظرابه هاي...
طلعاتهم لين الحين كانت للاماكن القديمه وللطبيعة.. اماكن مافيها شوارع وعماير وحشره... كل المناطق كانت من اروع مايمكن..تحبس الانفاس من جمالها..كانها الجنه عالارض..سبحان الله... المرشد كان يوديهم المناطق ومن بعدها يخليهم بروحهم ياخذون راحتهم...ويوم يشبعون يسيرون له ويوديهم مكان ثاني ... الكاميرا مافارقتهم.. يصورون كل شي تقريبا..مره عند عنود ومره عند عبدالله... ومره عطوها المرشد يصور يوم دخلوا في الماي يلعبون...جنهم يهال...بس كانوا وايد مستانسين...
في ليله قبل مايرقدون كانوا يطالعون في كيمره الفيديو الفلم اللي صوروه... فجاه طلعت لقطة عنود وهي راقده...عقدت حياتها وشهقت...بينما عبدالله نقطع من الظحك يوم انكشف...كان ناسي انه صور هاللقطة..بس ماقدر يقاوم وهو يشوفها متكوده علىعمرها...ياب الكيمره وقعد يصورها... تمت عنود اطالع الفلم باهتمام..
عنود: قسسسسسسسسم بالله مردووووووده ياعبود...
عبدالله: هههههههههههه عادي انا رقدتي عادية مب انتي..!!!
عنود: انته رقدتك عادية.؟؟؟... ماعليه بتشووفها قريب وبتغير رايك فيها...
تم عبدالله يظحك عليها.... خلصت اللقطة وطلعت لقطة ثانيه كان سبال صغيرون متعلق فرقبة عبدالله وشكله كيووووووووووت ....عنود وهي تصور كانت ميته من الظحك....فجاه السبال نزل عن عبدالله وطار صوبها... صرخت عنود صرخه طرت الدنيا وركظت وهي بعدها مشغله الكيمره وكل الاصوات طالعه ...اللحظة كانت تذبح من الظحك ..خص اللي كان يشوفها وهي شارده عن السبال...صدق كان شكلها تحفه وتمنى عبدالله انه تكون الكاميرا عنده عشان يصورها...

الاثنين بعد المغرب سار خليفه مع حمدان وابوه لبيت عمه... يوم دخلوا البيت بسيارة خليفه كانوا هل البيت متيمعين خاري...فارشين وحاطين الكوار والظو واريه وهم حواليها.. بو خالد وام خالد...البنات حصه ونورة وفطيم... وخالد وميره وعيالهم...
فزولهم الكل يوم شافوهم دخلوا... وتبادلوا السلامات..من بعدها دخل بو خالد وخالد مع محمد وعياله الميلس... حصه لاحظت نظرة خليفه لها بالسلام الخطافي... وحمر ويهها...ييتهم هذي الجماعية ماتعني الا شي واحد....خليفه ماظيع وقته...كملت قعدتها معاهم لكن العقل ماكان موجوود...
في الميلس قعدوا يسولفوون ويتبادلون الاخبار...لين عقب...
بو سلطان: ياخوويه..نحن يايينك اليوم نسلم.. وعندنا شي نبغي نقوله لك..
بو خالد: خير يابو سلطان.؟؟
بو سلطان: الخير بويهك.... وانا بدخل بالمووضوع سيده لانه مابينا رسميات... نحن اليوم يايينك نخطب بنتك حصه...لخليفه...
ابتسم خالد..بينما بو خالد توتر...وتلوم على طول... بو خالد مايطوف عليه شي...وحس وقتها انه غلط يوم ماشاور خليفه من الاول بخطبة حصه... وقتها كان على باله انه خليفه مايبا بنته..بس الحين.... !!..
بو خالد: هيي ماشاء الله..هاي الساعه المباركه ياخوي...وخليفه ولدنا...وحصه بنتك... ونحن القرابه بينا قرابه دم وعقب صارت قرابه نسب... ومايصير خاطرك الا طيب ان شاء الله... بنشاور البنت وبنرد عليكم خبر باسرع وقت ان شاء الله...اما من ناحيتي انا ما اظني تحتاجه لاني موافق اكيد...لكن انته تعرف ان بناتي انا ماغصبنهن على شي..ولاازم اشاورها واخذ موافقتها...
بو سلطان: والنعم فيك يابو خالد ونحن ماقلنا غير هالكلام... ولو ماشاورتها انت انا بنفسي بشاورها...ولا تضغطون عالبنت...امممره على هواها...والله يكتب اللي فيه الخير ان شاء الله..
بو خالد: آآمين يامحمد..بس انا عندي شي ابا اتنشد عنه خليفه...
خليفه: خير عمي... آمر..
بو خالد: مايامر عليك عدو ياولدي.... انا ابا اسالك عشان يطمن قلبي... انته تخطب حصه بسبب الواجب..؟ والا لانك تباها..؟؟ .. جاوبني بصراحه...
ابتسم خليفه..
خليفه: عمي... انا من الاول حصه فبالي...واباها على سنة الله ورسوله... ومابحصل اخير عن بنتك زوجة لي...ولو شاورتوني من البداية بخطبة حصه كنت بقولك اني ابغيها..لكن ماعليه ياعمي اللي صار نصيب.. ومكتوب يصير... ونحن مب في ذيج الايام احين نحن عيال اليوم .. وتاكد اني ما خطبت حصه بسبب الواجب... اطمن انا مب غاصب عمري عليها ... انا اخطبها لاني ابغيها...
هز بو خالد راسه..
بو خالد: عدل كلامك....والنعم فيك ياخليفه... وان شاء الله نتنشد البنت وبنرد عليكم باسرع فرصه... يااااااااحياكم الله ....
وخذتهم السوالف لين ماحطوا العشا....
قبل مايطلعون الرياييل..حصه تعلثت وقالت انها مب مشتهيه عشى وبتروح ترقد...بس الصدق كانت خايفه ... متوتره...مب عارفه كيف بتكون ردة فعل اهلها تجاه هالخطبة...حبست نفسها في الغرفه وهي كلها توتر وترقب..
طلعوا الرياييل من الميلس.. لا اراديا التفت خليفه على للمكان اللي كانت قاعده فيه حصه..بس حصله خالي..ابتسم في خاطره.. شردت...وتلاشت الابتسامه بعدها...لا يكون تراجعت بس..!!!...ياويلها بذبحها... انتبه لحمدان عداله وهو يرفع ايده يسلم من بعيد ويظحك...
حمدان: ادري متولهين علي ...بيلس وياكم لو ياي بسيارتي بس الشواب احين بيردون البيت ولازم ارد وياهم...
خليفه: منو شواب..؟؟؟
حمدان: انته وابويه...شو اسويبكم... واحد اصلا شايب والثاني عرس واستوى جدي..وانتي احين بتلحقه...مامنكم فايده...
قال كلامه بصوت واطي لانه الحريم بعدهم مايعرفن بموضوع الخطوبه... ورد يزاعج يرمس نوره..
حمدان: نوروه ربعي هاتي الفلم مال الرزفه...
رفعت نورة راسها بترد عليه..وحست بنغزه من صبع فطيم...عشان ماترد الفلم الحين..
نورة: لااااااااااااااااااا بعدنا ماشبعنا منه حمدان..
حمدان: شوو ماشبعتي منه سيري هاتيييه ربعي يبون يشوفونه...
نورة: خله لين باجر..... بسجل نسخه منه....
حمدان: انتي محد يعطيج شي...
ظحكت نوره عليه ..وسلموا عليهم بو سلطا ن وعياله وركبوا سيارة خليفه وطلعوا...
الساعه عشر في غرفة الشواب..بو خالد كان يعق كندورته ويعلقها... وام خالد تسحي راسها...
ام خالد: ماقلت لي ياحمد... بو سلطان زيارته اليوم هو وعياله مب بدون سبب... شو علومه.؟؟
يلس بو خالد عالشبريه..
بو خالد: علومه تسرج... ياي يبا يخطب حصه لخليفه...
خلت العيوز اللي فايدها والتفتت لشيبتها... سالته وهي فرحانه.
ام خالد: بالله عليك..؟؟؟؟
بو خالد: هي والله.... الظاهر اني ظلمت الولد من البداية يام خالد... كان يبا حصه من زمان ونحن قربنا بربيعه المرحوم..
ام خالد: كل شي نصيب ياحمد... انزين وانته شو رديت عليهم...؟
بو خالد: شو بعد برد عليهم...خليفه حد يفكر يناسبه او لا..؟؟ قتلهم موافق بلا تفكير بس انتي تدرين اني ماروم اغصب بنتي ولازم اشاورها ..وهي احين حرمه ..وتفهم هالامور...
ام خالد: عاد بتكون خبله بنتك ان رفضته...
بو خالد: الله يهديها وتوافق... الله يعلم اني مرتاح من هالخطبه واحس فيها توفيق بنتي وراحتها... محد بيحشمها كثر خليفه...
ام خالد: والله انك صادق ياحمد... ارمس حصه انا والا ترمسها انته..؟؟
بو خالد: انتي رمسيها لكن اخافج تظغطين عليها يا ام خالد...
ام خالد: لا لا تحاتي مابضغط عليها ولا شي...
بو خالد: تاكدي انج ماتضغطين عليها... ورمسيها بالموضوع باجر بمعرفتج..
ام خالد: ان شاء الله يابو خالد..مايصير خاطرك الا طيب... والله يهدي هالبنت وتوافق...

في ماليزيا عبدالله كان منسدح عالشبريه... وعنود توايج من الدريشه وتوها طالعه متسبحه وشعرها منشوول على ظهرها...خرسان شوي.. عبدالله توه مسكر عن حمدان..ويتبسم...عقب ظحك شوي بصوت عالي...
عبدالله: سواها مسود الويه...وفغيابي...ماعليك انزين...!!
التفتت له عنود وهي ترجع الستاره مكانها..
عنود: بلاك تتقحطن روحك..؟؟ منو اللي سواها..؟
يلست عداله عالشبريه...
عبدالله: خوج...خلوووف...
نش عبدالله من تسديحته وتقرب من عنود وحط راسه عريوولها... قعدت عنود تلعب بشعره وهي تساله..
عنود: شو بلاه اخوويه...شو مسوي.؟؟
عبدالله: امس ساحب عمي وسار وخطب حصيص....
صرخت عنود من الفرحه وخوزت راس عبدالله عنها ونشت تناقز وادور عدال الشبريه وانواع الصرييييييخ والتحرطيمه...
عبدالله: عافااااان الله الحمد لله والشكر....بلاج بوي ينيتي... عقب ماخذتج عاد تتخبلين علي.؟؟
عنود: فال الله ولا فاااااااااااالك...فديييييييييي ييييته اخووويه واخيييييييييييييييرا....تلقاة ميت من وناسته..
عبدالله: تعالي يلسي ورديلي تسديحتي الحين...يالله..
ظحكت عنود وردت يلست وحط هو راسه عريوولها وكمل..
عبدالله: يستانس بعد ماترد حصه عليهم بموافقه....لين الحين ماردت عليهم ..مادريبهم رمسوها والا لا...
عنود: بتوافق بتوافق.....انا متاكده...واي فديتك ياخووويه وفديتج ياحصه...لايقين على بعض...
عبدالله: وشدراج عاد انها بتوافق...؟؟؟
سكتت عنود وهي تتذكر نفسها يوم تتسمع كلام خليفه مع حصه..وكلمه حصه "موافقة ياولد عمي".. مستحيل تقول لعبدالله انه خليفه ماخذ موافقه حصه من اول...تتستر على اخوها ابرك...
عنود: احساااااااااااااس..بتوافق ان شاء الله...والله فرحتني بهالخبر...
رفع عبدالله ايده ومسك خصله من قصة عنوود الطويله...وسحب راسها بالخصله لتحت عدال ويهه...يتبسم لها باغراء..
عبدالله: تبينا نطلع نتحوط والا نقعد...؟؟؟
عنود: هممممممممممممم........نطلع...
عبدالله: مالت عليج...
عنود: هههههههههههههههههههه..والله يايين ننحبس هني..؟؟
عبدالله: المهم نكون رباعه...
عنود: بنكون رباعه برع....يالله قوم تلبس..وهالمره لا تتصل بابو محمود..خلنا ناخذ راحتنا رواحنا...
عبدالله: من عيوني الثنتين..

في البلاد...حصه كانت تقرا رساله خليفه للمره 100.... تتامل في المعاني اللي بين السطور...وتفكر...مارمسووني في السالفه لين الحين..يمكن ماكانوا ياييين يخطبون..!!!..لالا .. اكيد يايين يخطبون ييتهم متيمعين جذي مب طبيعية وراهم شي...بس ليش محد رمسني لين الحين..؟؟؟ معقووله يفكرون بخليفه يوافقون او لا..؟؟ ردت الرساله مكانها في العلبه وسكرت العلبه ودستها مكانها في الكبرت ..سحبت شيلتها البيظا ونزلت وهي ماسكه مكان العمليه اللي احيانا تحس بويع خفيف...الحمد لله بدا يخف ويختفي الالم... لولا توصيات عبدالله يوم يتصل اللي ماتخلص كانت بتكون نست سالفة العمليه ..لكن عبدالله مايخلي حد ينسى... حتى وهو بعيد يوصي عليها..حليلك ياخووي...حنون..ان شاء الله يكون مستانس مع عنود في ماليزيا...
دخلت الصاله وحصلت حمدان يالس مع نوره وفطيم وهو ميت من الظحك...ونوره تظحك وتسكت...تبا تظحك لكن خايفه شكلها من فطيم...كالعاده اكيد حمدان معلق على فطيم بشي لانه ويهها منتفخ قهر...
حصه: السلام عليكم...
سكت حمدان وهو يمش دموعه من الظحك..
حمدان: هلا هلا حصه...حياج..
حطت ايدها على خصرها...
حصه: حمدان بسك تعليقات على فطيم والله بطفربها..
فطيم: فديتج والله انتي اللي تحسين فيهم...
نورة: من الصبح طايحبها حليلها..
حمدان: قوليلها لا تحط راسها براسي...
فطيم: انته اللي تحط راسك براسي من شفتني وعرفت اني موجودة بهالدنيا وانته مطفربي ...مادري شو مكتوب على يبهتي "هدف للتعليقات والتغليسات"..!!!..
حمدان: لا يالطويله... شفت بويهج كلام ثاني...
نورة: ياعيني ياعيني... شو شفت بالله...
حمدان: يوووووووووم غايته..بقولها..
فطيم: ماريد اعرف وفره لنفسك...
حصه: ومتى غايته يا حمدان...؟
حمدان: يوم الله بيقول كلمته ...فضوليات تراكن وايد...
قفطت فطوم رغم ظيجتها...
نورة: خلاص فهمنا...هههههههههه...مبروك فطوم....
فطوم: ماعندج سالفه نوروه...
نشت فطوم ميته من القفطة وطلعت وراحت غرفتها... وهم يظحكون عليها ماعدا حمدان اللي يبتسم ببساطه بس نظرته غريبه وهو يطالع فطيم وهي رايحه...
حمدان: قومي نوروه هاتي الفلم...
نورة: هذووه في المكتبه...
نشت نوره وطلعت له الفلم وحطته في الباكيت وعطته حمدان... في هاللحظة دخلت ام خالد .. ووقفت عند الباب...
ام خالد: هلا ابويه حمدان...شحالك الغالي..؟؟
نش حمدان ووقف...
حمداان: مررررررررررحبا الساع... بخير الله يعافيج عمووه شحالج انتي..؟؟
ام خالد: الحمد لله ابويه شحالك اهلك..؟
حمدان: كلهم بخير وسهاله يسلمون عليكم..
ام خالد: الله يسلمك وياهم من الشر ..رد السلام عليهم ابويه..
حمدان: يوصل ان شاء الله...
ام خالد: استريح استريح....حصه امايه...تعالي ابغيج شوي...
طلعت ام خالد من الصاله وراحت للصالة الصغيره..وحمدان ابتسم وعرف بالموضوع...نورة استغربت..وحصه جسمها قام يهتز كله بدقات قلبها القوية... ياويلي..اكيد بترمسني في السالفه شو بقولها..؟!..قالت بصوت بالكاد ينسمع...
حصه: ان شاء الله امايه...
تبعت امها وهي تسحب ريولها سحب...سكرت الباب وراها بعد مادخلت الصاله الصغيره...يلست عدال امها..
حصه: خير اماايه.؟؟
ام خالد: خير يابنتي... انا برمسج بمووضووع.. وماباج تردين عليه الا يوم تفكرين عدل... في النهايه هذي حياتج ومستقبلج..وانتي حرمه وتعرفين مصلحتج...وفاهمة الدنيا...
نزلت حصه راسها وركزت بعيونها لحظنها....
مدت العيوز ايدها ومسكت ايد بنتها تشد عليها...وقالت بلهجة حنونه..
ام خالد: خليفة ولد عمج... يا وخطبج من ابوج..
حاولت حصه تثبت ملامح ويهها ...وما تتاثر وايد..لكن غصبن عنها..تاثرت.. ودرت توها بس انها من سنين..وهي تتريا هالجمله تنقال لها... "خليفه يا وخطبج"...ياللـــــه..!!... من متى وانا احب خليفه وانا ماعندي علم بالموضوع...؟!!!!...من متى..؟؟؟
ام خالد: ها بنتي..؟؟ شو رايج..؟؟
سكتت حصه مب عارفه شو تقول...لسانها مشلول...مثله مثل باقي جسمها... ادراكها بحبها اخيرا شل حركتها ولخبطها فوق تحت... خليفه والا سيف....؟؟؟ سيف والا خليفه..؟؟ منو اللي احبه فعلا؟؟...كلهم.؟!...منو اكثر من الثاني..؟؟؟... والا ولا واحد..؟؟..شو هو الحب اصلا وكيف اعرف اني احب.؟؟؟.. ياربي ...بموت...
ام خالد: حصه.؟؟ بلاج امايه ساكته عني..؟؟ انا مابقولج معلومات عن ولد عمج ولا بمدحه لج لانج تعرفينه زين مازين ومب محتايه حد يخبرج عنه...
حصه: امايه...كيف اعطيج رايي بدون ما اشاور ربي..؟!...(والتفتت لامها)... بصلي استخاره...وان شاء الله خير...اللي كاتبنه الله بيصير...
ام خالد: بارك الله فيج يابنتي... والله يثبتج على دينج وعقلج..ويوفقج فحياتج مع الانسان اللي يسعدج... وصدقيني خليفه مول مايتعوض...ابوج قالي ماضغط عليج وانا ماريد اضغط عليج ولا شي...خذي راحتج بالتفكير ومحد بيغصبج على شي ...لانج بروحج تعرفين مصلحتج وين...وبتختارين بنفسج اللي يصلح لج...
نشت حصه وباست راس امها...
حصه: لا تحاتين يامايه..ان شاء الله مابيصير الا كل خير..اعرف انج شايله همي وتحاتيني... بس صدقيني ماله داعي..نصيبي في هالدنيا بخذه... انابسير احين..تامريني بشي..؟؟
ام خالد: سلامتج يامايه...
طلعت حصه من الصاله الصغيره وراحت للصاله...نورة كانت بروحها مع فطوم..
حصه: حمدان روح..؟؟
نورة: هي استحى يقعد معاي بروحنا... شو تباج امايه..؟؟
حصه: بخبرج عقب... بسير ارقد انا...
ركبت حصه الغرفه وسكرت على نفسها الباب ودخلت تتسبح...