[الطائر المهاجر]

www.youtube.com

تدري وش اللي فرق الناس ازمان= وخلا القتل بيناتهم ماله حدود
هم مدعين الدين من كل مله = تجار دين وسهمهم دوم بصعود
ولما بدا التسييس في بعض الاديان = وصارت تجاره تكسب البعض مردود
اسهل طريقه للربح دون خسران= لا راس مال ولا ديونٍ ولا قيود
نصوص يحفظها ممثل وفنان= وملابس وديكور بالأصل موجود
تضفي مهابه عند من يجهل الشان= وياثق به اللي ما عرف عنه منقود
ويظهر ورع وانه يبي خير الانسان = زاهد بهالدنيا يبي يوم موعود
ويشوف ويش الناس تبغى من اعلان= واللي يبي المسؤول من هرج مقشود
ويبدا يسب ولو تدنى للاعفان= فذولا كذا وذولا كذا ما بهم فود
وذولا عليهم لعنة الله بالاكوان = والقتل في ذولا حلالٍ ومحمود
وصارت دول تحتل ارضٍ وبلدان= والعذر نصرة من على الدين مضهود
وهي تبي الثروات من كل الافنان = والشعب جاهل ما درى ويش مقصود
فرق تسد قانون مرسوم باتقان = مذهب ودين وعرق في خبث وبرود
وجزء مجزأ تحكمه وين ما كان = وتلعب على كيفك ولا عنك منشود
لولاه ما سادت اميركا بالاوطان= ومن قبلها الانقليز والعالم رقود
ولو البشر حطوا من العقل ميزان= وكلٍ تفكّر لو من الفكر محدود
ادرك بأنه مثل غيره من انسان= الكل متساوي بخلقه بلا زود
والدين مهما كان من بين الاديان = مايجيز قتل النفس إلا على القود
ولا يجيز انك تسلط بعدوان = ولا تستغل انسان تركض ورى الفود
فالدين هو حسن التعامل والاحسان= مع كل خلق الله بلا اية قيود
ومن كان شفته ضل في درب شيطان= فانصحه بالحكمه ولاتكون مشدود
فالهادي الله من خلق كل الاكوان = يعلم خفايا النفس هو خير معبود