[عبدالله الشويمان]

على اقبالة الوسم وتراكم الغيوم في هذه الايام وابتداء اتجاه الجو للبروده..
ازف اليكم هذه الابيات...لأول مره بمنتديات الفطاحله..آمل ان تصل الى درجة اعجابكم..

يا عاشق البر العبر لا تخليه=قم جهِّز العزبه وكمل عددها
طلع سهيل وراحت اكثر لياليه=ونسايم الوسم اقبلت في بردها
الله يجيب الخير بوَّله وتاليه=ينشي مزون كل يومٍ رعدها
تهل ماها وتروي القاع تمليه=الماء لريضان الفلا هو شهدها
يفز فيه العشب ويصبغ مفاليه=خضاره بكل الهضاب ولهدها
يفرح به الباد وحلاله حواليه=ترعى بعارينه وضينه رغدها
ربلٍ مع البسباس وثعلوق عاليه=وحوذان والحنوه تزود مددها
نوّير وقرقاصٍ وصفَّار ماليه=مع الخزاما والنفل وش بعدها
فيه الزبيدي مصلع في خواليه=بيض النعام مشابهه في صعدها
ريحه يفوح بخايعٍ خصب طاليه=رغيب رقروقه علامة مهدها
وشيٍ بقى ما نعرفه في زواليه=والله ينبت بالاراضي جددها
الحاضره تلقى به السلو ويليه=في شوف زهر النبت يحيا سعدها
ما بعده الا شبت النار تدليه=ودله من البن اليماني زودها
معها قصيدٍ من الهجيني يحليه=فنجال وهيل الهند يعدل عمدها
وشمة نسيم البر الهم تجليه=يا عاشق البر العبر جا وعدها