في قصيدتها "نفسي عزيزه ما تبي كل مخلوق" والتي تحكي موقف لها مع شاب في السوق ، ارسلت لها رسالة ، وحبيت امزح معها ، فقلت لها : الله اكبر وش هالزين اللي لفت انتباه الشاب ، ما خبرتك (طبعا من علاقتنا بالمنتدى ، إلا انك عجوز) فردت علي بالأبيات الأولى ، ومن هنا بدأ الصوت والصدى عبر الرسائل ، فتم الإتفاق على نشرها هنا
الله هو اللي عالمن بالخفيات= او جيكره والا من الزين شايل
الزين ما يكمل بغير العفيفات=بنت الكرم وجود بنت الحمايل
احذرك يالعود تمشي المتاهات=اخاف تخثع دام للهجو قايل
لاتحسبينك من جمال البنيات= اللي لهن في الدل زين الفعايل
شوفي المرايه تعرفين السوايات= الورد ذابل واطرف الخشم مايل
ومن سمع صوتك صابته بعض روعات= يحط رجله لو تحمل قوايل
اما انا توي شبابي ولا فات = جمال يوسف كاملٍ بالجمايل
الله وكبر ليت تطلع على الشات=ويمسكونك مايك تقراء الرسايل
يمكن يقولوا صوت اهل العصابات=وكل مسك خطه وصارت شلايل
الصوت كنه وايتن بالمحطات=بنقالي السايق ولاهو بسايل
كم مرتن ياالعود تصبغ لشيبات=وملقاطك بيدك ومن الشيب شايل
الظهر محدب مثل قوس الربابات=مراهق السبعين ولاانت بقايل
ولاانا بنت شبابي ولا فات = العين سودا وفوقه الرمش مايل
يامادحه نفسه ترى الزين دلات= وش دلتك واثبات بعض الدلايل
الرمش تركيبه وعينيك حولات= وبراطم الحاشي وشعرك نثايل
مهما تسمكرتي تبين المطبات= عجوز دبه ما لقت له فنايل
شوفي المهاجر كالقمر فيه آيات= كم من غزال تطرده دون طايل
انت البديت بمدح نفسـك بالبيـات=شبهت نفسك يوسفٍ بالجمايـل
وين انت رايح ضايعـن بالمتهـات=الجفن متهطل مثل كـوت سايل
خشمك وحنجك مابينهن من مسافات=عكازتك بيدـك ودمعـك همايـل
ولاانا ما احط رمـش القونـدات=الزين وافي من عزيـز الجلايـل
الطول عود الموز مابـه ميـالات=والعنق ريمـن مرتعـه بالسلايـل
ون كان بعض الزين فيكم ترافـات=ماترجعه لو جبـت كـل القبايـل
خذ الكلام وزبدت الهرج بسكـات=من عمرنا الـي راح مابـه بدايـل
والخاتمه زيـن العمـل بالملفـات=يوم الحشر مافيه قاصـر وطايـل
الرجل مثل الماس في كل حزات = حتى ولوهو شاب ماله مثايل
وانتن كما الموتر صنوف ومدلات= سعره يطيح ولا اعتبر بالحلايل
حدك الي الخمسين مامنه فكات= اليأس دربك بعده العمر زايل
والبنت مثل الورد يذبل بلحظات= سن محدد ما يبي له مسايل
والرجل مثل البدر بين المجرات= لا من طلع غابن جنوب وشمايل
ونا البدر وانت المجره فهيهات = اتنافسين البدر قول وفعايل
انت البدر يالعود واحنا المجرات=من ضاع في مسراه حنا الدلايل
كم واحدآمن حبنا مات حسرات=ما ذاق نوم اليل طوله ملايل
يخضع لنا منهو كبير المقامات=ياشاف زولاُ زين والخصر مايل
عنتر ابن شداد ذاق المرارات=كله لجل عبله وشاف الهوايل
لوي ادل البيت لسري بساعات=واشكيك لأم عبيد واش انت قايل
ونصيحتي ياختك بخمس الصلوات=هي منفعك في يوم شدالرحايل
عنتر لأنه عبد في وسط ازمات= ابوه مايبغاه جاب الفشايل
وفكر بحل يوصله للوساطات = شربك بعبله كود يرقى الطوايل
الرجل مثل الصقر يشرى بالوفات= اما المره تنباع كالعنز حايل
ويضحك عليها هايفٍ في المقامات= بقولة أحبك كاذب في المسايل